Framundan

• 26. sep. 2019
  UMFG - Afturelding B
• 5. okt. 2019
  UMFG - Vestri
• 7. okt. 2019
  Atvinnuráðgjafi viðvera
• 4. nóv. 2019
  Atvinnuráðgjafi viðvera

13. maí 2019 08:52

Ársreikningur Grundarfjarðarbæjar 2018

Ársreikningur 2018 var samþykktur í bæjarstjórn Grundarfjarðarbæjar við síðari umræðu þann 9. maí 2019. Hér eru teknar saman helstu lykiltölur úr ársreikningnum:

Reksturinn á árinu var í góðu samræmi við fjárhagsáætlun, heildartekjur voru 1,1% yfir áætlun og rekstrargjöld samstæðunnar voru 1,8% undir áætlun.

Rekstrartekjur A og B hluta bæjarsjóðs voru 1.114,6 millj. kr., þar af voru 962,6 millj. kr. vegna A hluta. Samkvæmt samanteknum ársreikningi A og B hluta bæjarsjóðs var rekstrarniðurstaðan jákvæð um 52,1 millj. kr. en í fjárhagsáætlun hafði verið gert ráð fyrir jákvæðri afkomu upp á 30,8 millj. kr. Niðurstaðan sýnir nokkurn viðsnúning frá árinu 2017, en þá var rekstrarniðurstaða samstæðunnar neikvæð um 12,2 millj. kr. Rekstarniðurstaða A hlutans 2018 var að sama skapi betri en áætlun hafði gert ráð fyrir, hún var jákvæð um 30,6 millj. kr. en fjárhagsáætlun gerði ráð fyrir 11,3 millj. kr.  
Framlegðarhlutfall rekstrar af samanteknum ársreikningi var 17,9%.

Fjárfest var á árinu fyrir 95 millj. kr. í fastafjármunum og tekin voru ný lán á árinu 2018 upp á 311 millj. kr. Greidd voru niður lán að fjárhæð 148 millj. kr. en stærsti hluti lántökunnar var vegna skuldbindingar sem bærinn þurfti að taka á sig vegna samnings við ríkissjóð um uppgjör lífeyrisskuldbindinga við Brú lífeyrissjóð, eða um 180,6 millj. kr.

Heildareignir sveitarfélagsins í samanteknum ársreikningi námu 2.403 millj. kr. í árslok 2018.

Skuldir bæjarsjóðs námu í árslok 2018 um 1.481 millj. kr., heildarskuldbindingar (A og B hluta) námu um 1.629 millj. kr. og höfðu hækkað um réttar 200 millj. kr. frá árinu 2017, sem er að stærstum hluta vegna samnings um fyrrgreindar lífeyrisskuldbindingar, eins og áður segir.

Skuldahlutfall var 109,7% í árslok 2018, en var 126,4% árið áður, skv. breyttum reglum um útreikning skuldahlutfalls 2018, í kjölfar uppgjörs sveitarfélaga á lífeyrisskuldbindingum við Brú.

Eigið fé sveitarfélagsins samkvæmt samanteknum ársreikningi var 774,5 millj. kr. í árslok 2018 og eiginfjárhlutfall var 31,3% en var 32,5% árið áður.

Veltufé frá rekstri í samanteknum ársreikningi var 22,3 millj. kr. og handbært fé frá rekstri var í árslok 107,6 millj. kr. en var 9,9 millj. kr. árið áður.  

Hér má finna ársreikning 2018 á vef Grundarfjarðarbæjar.

Til baka

yfirlit frétta