Leita á vef Grundarfjarðar

Bæjardyr
Íbúagátt
ISL
ENG
POL

Þjónusta
Stjórnsýsla
Mannlíf

Bæjardyr
Íbúagátt
430 8500

Forsíða / Sjöa vikunnar

Sjöa vikunnar

1381 stk.
19.07.2021

Fyrri 5 6 7 8 9 10 11 12 13 14 Næsta

Dagur kvenfélagskonunnar er laugardaginn 1. febrúar, af því tilefni setjum við inn nokkrar valdar myndir sem sýna frá leik og störfum kvenfélagskvenna í Gleym mér ei. Glæsilegar og sparibúnar kvenfélagskonur í kvenfélaginu Gleym mér ei. Efri röð talið frá vinstri, Sigurlín Guðmundsdóttir, Elna Bárðarson, Björg Hermannsdóttir, Ólöf Þorleifsdóttir, Þórdís Þorleifsdóttir, Elísabet Jóhannesdóttir og Petrea Guðný Pálsdóttir. Neðri röð talið frá vinstri, Vigdís Gunnarsdóttir, Bára Hallgrímsdóttir og Marta Böðvarsdóttir.

Stund milli stríða, á þessari skemmtilegu mynd eru kvenfélagskonur að fá sér smá næringu eftir annasaman dag. Myndin er tekin í nýa barnaskólanum í Grundarfirði sem tók til starfa 6 janúar árið 1962 og væri gaman að vita hvert tilefnið er af þessari veislu. Konur hafa löngum verið duglegar að redda málum og vinna við allskonar aðstæður, það hefur ekki verið nein aðstaða í skólanum til þess að þvo upp leirtauið þannig að þvottabali er notaður til verksins. Í hægra horninu sést mjólkurbrúsi og spurning hvort hann geymir vatn til afnota í uppvaskið eða hvort hann geymir mjólk sem notur hefur verið í veislunni, en þess skal getið að Mjólkurstöðin í Grafarnesi tók til starfa 20 febrúar árið 1964, einnig gæti verið að mjólkin komi í svona stórum brúsum beint frá sveitabæ í nágrenninu? Margir muna enn þann dag í dag eftir skólastofunni, borðunum með snaga fyrir skólatöskur kennaraborðinu og töflunni. Þessar myndarlegu konur eru talið frá vinstri, Valgerður Skarphéðinsdóttir frá Kirkjufelli, Inga Jóna Kristjánsdóttir Kvíabryggju, Hulda Valdimarsdóttir?, Jónína Kristjánsdóttir og Jónína Arndal.

Kvennahlaupið sem var stór viðburður í rúm 30 ár var í umsjá kvenfélagsins fyrstu árin, hér kemur skemmtileg mynd frá fyrsta hlaupinu og þáttaka kvenna og barna í Grundarfirði var mjög góð í fallegu veðri. Farið var inn á Grundarkamb þar sem Bæring hefur tekið þessa skemmtilegu mynd. Tilgangurinn með Kvennahlaupinu í upphafi var að fá konur til að stunda líkamsrækt og sýna samstöðu í því efni. Þess vegna er konum boðið að leggja mislangar vegalengdir að baki á þeim hraða sem hver þeirra ræður við. Í hlaupinu geta konur sameinað holla hreyfingu og útiveru og lögð er áhersla á samstöðu kvenna. Það gefur hlaupinu aukið gildi að það fer jafnan fram á kvenréttindadeginum 19. júní eða sem næst honum. Fyrsta kvennahlaup ÍSÍ haldið árið 1990, aðalhlaupið var í Garðabæ en einnig var hlaupið frá sjö öðrum stöðum á landinu.

Þessi skemmtilega mynd er líklega frá aðalfundi kvenfélagsins ef horft er á borðið fyrir framan sviðið, myndin er líklega frá miðjum sjöunda áratugnum. Þarna er verið að kynna tísku og að myndinni að dæma spannar tískan yfir aldir. Lengst til vinstri á myndinni er Ólöf Pétursdóttir að kynna þátttakendur sýningarinnar, lengst til hægri sytja tvær konur og gæti önnur þeirra verið Þorbjörg Daníelsdóttir?

Kvenfélagið var duglegt að halda skemmtanir, bæði fyrir sig og aðra. Hér er mynd af einni skemmtun þar sem þær setja upp leikþátt í samkomuhúsinu í byrjun sjöunda áratugsins.

Á þessari mynd má sjá börn og félagskonur á jólatréskemmtun Kvenfélagsins upp úr árinu 1960, Kvenfélagskonan fremst á myndinni er Guðríður Sigurðardóttir eða eins og við þekktum hana Gauja á Stöðinni, það væri gaman að fá nöfn á fleirum á myndinni.

Kvenfélagskonur í Eyrarsveit, myndin er tekin að Hömrum 23. júlí 1939. Kvenfélagið Gleym mér ei var stofnað sunnudaginn 10. júlí 1932 í Þinghúsinu að Grund, voru stofnendur sautján að tölu. Félagið stóð fyrir jólatrésskemmtunum fyrir börn í fimm áratugi, gekkst fyrir starfrækslu matjurtagarða og hélt saumanámskeið til að efla heimilisiðnað. Félagið keypti spunavél sem staðsett var á Grund fyrstu árin en var á Hömrum eftir að nýja húsið reis. Kvenfélagið gekkst fyrir því að styðja barnmörg og fátæk heimili og upp úr því var stofnaður Líknar¬sjóður sem veitti bæði peningagjafir en keypti einnig ýmis tæki og lyf til útláns eða sölu eftir aðstæðum. Kirkju- og safnaðarmál voru félagskonum hugleikin. Keypt var orgel fyrir safnaðarstarfið í Grafarnesi, hökull og fermingarkirtlar fyrir Setbergskirkju og átti félagið stóran þátt í byggingu og búnaði Grundarfjarðarkirkju sem vígð var árið 1966. Kvenfélagið hefur víða látið muna um sig í gegnum árin: Leiktæki í Leikskólann Sólvöllum og Grunnskóla Grundarfjarðar, Saumavélar í grunnskólann, stillanleg rúm og lyfjaskápur fyrir Dvalarheimilið Fellaskjól, styrkur til skammtímavistunar á Gufuskálum, lækningatæki fyrir Heilsugæslustöðina og fjölskyldur studdar vegna veikinda. Landssafnanir fyrir stórum lækninga-tækjum eru studdar og Krabbameinsfélag Íslands - selt glossið „Á allra vörum“. Á árunum 1999-2009 styrkti kvenfélagið ýmsa aðila, þar á meðal fjölskyldur vegna veikinda, um 3,2 millj. Þetta er bara brot af því sem Gleym mér ei hefur staðið fyrirog gefið til samfélagsins í gegn um áratugina en félagið verður 86 ára í sumar.

Fyrri 5 6 7 8 9 10 11 12 13 14 Næsta

Grundarfjörður

Borgarbraut 16

350 Grundarfirði

Kt. 520169-1729

Opið virka daga 10:00-14:00

grundarfjordur@grundarfjordur.is

Þjónusta
Stjórnsýsla
Mannlíf