Íþrótta- og æskulýðsnefnd Grundarfjarðarbæjar vann, í umboði bæjarstjórnar, hugmyndavinnu og tillögur um uppbyggingu útikennslu- og fjölskyldugarðs í Þríhyrningnum árið 2020. Hugmyndir voru kynntar nágrönnum, íbúum og félagasamtökum og leitað eftir viðbrögðum þeirra. 

Hvar og hvað er Þríhyrningurinn?

Þríhyrningurinn er opið, grænt svæði inní miðri byggð. Hann markast af íbúðarhúsum við Hlíðarveg, Borgarbraut og Grundargötu og er aðkoma að honum á þessa þrjá vegu.

Þríhyrningurinn á sér merka sögu sem spannar a.m.k. vel á sjötta áratug. Kvenfélagið Gleym-mér-ei kom að uppbyggingu hans, þar var rekinn róló á sjöunda og áttunda áratug síðustu aldar og þar var lengi leiksvæði fyrir börn. Í Þríhyrningi voru oft haldnar skemmtanir eins og t.d. á sautjánda júní. Ýmsar útfærslur hafa verið á svæðinu í gegnum árin, en einnig áform um frekari uppbyggingu, sem ekki gengu eftir. Á meðfylgjandi myndum má sjá nokkrar af myndum Bærings Cecilssonar af lífinu á róló á árum áður. Smellið á myndirnar til að stækka þær.

  

Framtíðarsýn og undirbúningsvinna

Draumurinn er að Þríhyrningurinn öðlist aftur þann sess að vera sameign og sælureitur bæjarbúa, að hann verði meira nýttur og að þar verði aðstaða sem hentar íbúum á öllum aldri. 

Í Aðalskipulagi Grundarfjarðarbæjar er gert ráð fyrir aðstöðu til útikennslu fyrir leik- og grunnskóla í Þríhyrningi. Skólarnir nota svæðið mikið og það er vinsælt til útivistar og samveru, m.a. fyrir viðburði í bæjarlífinu.

Tillögur íþrótta- og æskulýðsnefndar um hlutverk og uppbyggingu í Þríhyrningi voru settar fram í grófum tillögum, til frekari útfærslu, sem gengið hefur eftir. Útgangspunkturinn er að nýta sem best sól og skjól, það hve garðurinn er vel lagaður og í „faðmi“ nærliggjandi húsa. Mikilvægt er að taka tillit til þess að svæðið liggur upp við íbúðarbyggð og því þarf að taka tillit til nágranna. Í Þríhyrningi er útikennslustofa með litlu sviði sem er í mótun og setsvæði, útigrill, nestisborð og bekkir, náttúrulegt leiksvæði með einföldum lausnum o.fl.

Markmiðið var að uppbygging garðsins væri samfélagslegt samvinnuverkefni. Það hefur ræst - Þríhyrningurinn hefur notið velvilja og stuðnings fyrirtækja og félagasamtaka, sem hafa lagt uppbyggingunni lið og hlúð að svæðinu.

Smellið hér til að sjá uppbyggingartillögur nefndarinnar, sem samþykktar voru af bæjarstjórn 2020. 

Notum Þríhyrninginn!

Setbekkir og borð eru í Þríhyrningi og það er kjörið að taka göngutúr þangað, taka með nesti og nýta aðstöðuna til að hitta vini og fjölskyldu.

   

 

Eldri teikningar 

Til gamans má hér sjá teiknaðar tillögumyndir frá 1966, en þær gerði Vilhjálmur Sigtryggsson. Hann var á þeim tíma starfsmaður hjá Skógræktarfélagi Reykjavíkur.

  

  

Tillöguteikningar gerðar af Inga Hans Jónssyni:

 

 

Teiknistofa Hauks Viktorssonar, teikning frá 1985: 

 

 

Teikning frá 1992, Pétur H. Jónsson arkitekt: