Málsnúmer 2511031

Vakta málsnúmer

Skipulags- og umhverfisnefnd - 273. fundur - 08.12.2025

Landeigandi Hamra spyrst fyrir um það hvort það rúmist innan almennra heimilda í aðalskipulagi Grundarfjarðarbæjar að breyta núverandi húsum í gistirými. Hann hefur látið útbúa kynningargögn með hugmyndum að breytingum og vonast til að geta hafið framkvæmdir við breytingu húsa sem þegar eru til staðar.



Taka þarf afstöðu til þess hvort þær framkvæmdir/breytingar sem kynntar eru rúmist innan almennra heimilda í aðalskipulagi og jafnframt hvort óska eigi eftir gerð deiliskipulags eða grenndarkynningu.
Samkvæmt Aðalskipulagi Grundarfjarðarbæjar 2019-2039 (sjá bls. 128) er heimilt að reka gististað fyrir allt að 20 gesti á hverju lögbýli sem í aðalskipulagi sé skilgreint sem landbúnaðarsvæði. Fari gestafjöldi umfram það kallar það á aðalskipulagsbreytingu. Sé einungis um að ræða notkun núverandi bygginga og gestafjöldinn sé undir 20 þurfi ekki aðalskipulagsbreytingu. Áður en leyfi er veitt þarf, eftir umfangi og eðli framkvæmda, að vinna deiliskipulag eða grenndarkynna framkvæmdirnar fyrir eigendum lóða/fasteigna í upprunalandi Hamra.

Skipulags- og umhverfisnefnd felur skipulagsfulltrúa að ræða við landeiganda/framkvæmdaraðila um umfang fyrirhugaðrar starfsemi og leiðbeina honum um næstu skref. Jafnframt felur nefndin skipulagsfulltrúa umboð til að setja málið í þann farveg sem við á, byggt á niðurstöðum úr samtali við eiganda/framkvæmdaraðila.

Skipulags- og umhverfisnefnd - 274. fundur - 20.01.2026

Grenndarkynningu fyrirhugaðra framkvæmda lauk föstudaginn 16. janúar sl. Eigendur lóðarskika út úr jörðinni Hömrum fengu senda kynningu áforma.



Framkvæmdir felast skv. framlögðum gögnum í breytingum á íbúðarhúsi, sem félli þó ekki undir rekstrarleyfi, að gamla eggjabúið yrði gert að fimm einingum með 10 gistirými og að vélageymslan yrði gerð að þremur einingum með 6-9 gistirými.



Einn lóðarhafa skilaði inn umsögn. Auk þess voru gerðar lítilsháttar athugasemdir við mörk framkvæmdasvæðis á kynningartíma og voru þau leiðrétt af framkvæmdaraðila og send út til sömu aðila áður en kynningartíma lauk.



Farið var yfir athugasemd sem barst frá eigendum Árbrekku. Þeir lýsa yfir ánægju með fyrirhuguð áform í heild sinni en fara fram á að tekið verði tillit til nokkurra atriða. Skipulagsfulltrúa falið að ræða við framkvæmdaraðila um ábendingar um tilhögun framkvæmda og samráð vegna lagna í jörðu og koma á framfæri óskum eigenda Árbrekku hvað varðar hönnun lýsingar.

Skipulagsfulltrúi fær umboð til að samþykkja fyrirhuguð áform að teknu tilliti til þessara ábendinga.

Undir þessum lið var rætt um nefnda ljósmengun frá Grundarfjarðarhöfn vegna sterkrar flóðlýsingar á bryggju og skipum, sbr. ábendingar.