Málsnúmer 2602006F

Vakta málsnúmer

Bæjarstjórn - 307. fundur - 17.02.2026

Bæjarstjórn staðfestir fundargerð hafnarstjórnar.



Samþykkt samhljóða. Sjá næsta dagskrárlið.

  • .1 2602012 Grundarfjarðarhöfn - Nesvegur 4, fasteignakaup
    Fasteignin að Nesvegi 4, Grundarfirði, var auglýst til sölu hjá fasteignasölunni Re/Max þann 28. janúar sl. og er söluyfirlit lagt fram. Húsið er í eigu Fiskmarkaðs Snæfellsbæjar ehf.

    Hafnarstjóri og bæjarstjóri hafa átt tvo fundi með formanni stjórnar fyrirtækisins, ásamt með starfsmanni og síðar framkvæmdastjóra félagsins. Ákveðið var að efna til viðræðna milli Grundarfjarðarhafnar og félagsins um möguleg kaup á fasteigninni.

    Nú hefur náðst samkomulag um helstu skilmála, m.a. kaupverð, en lögmaður bæjarins, Halldór Jónsson, hrl., hefur verið í samskiptum við fasteignasala eignarinnar.

    Hafnarstjórn - 27 Fyrir þennan fund, nú síðdegis, var farið í skoðunarferð um eignina í fylgd framkvæmdastjóra félagsins og fyrrverandi starfsmanns, sem þekkir eignina. Í þá skoðunarferð fóru hafnarstjórn og bæjarstjórn, ásamt starfsmönnum bæjarins og byggingarfulltrúa. Byggingarfulltrúi mun taka saman greinargerð og gróft mat eða lýsingu á ástandi eignarinnar. Verður greinargerðin lögð fyrir hafnarstjórn til upplýsingar og úrvinnslu.

    Um er að ræða atvinnushúsnæði, alls 4.786,4 m2, byggingarár er skráð 1941, fasteignanúmer 2115199, en hlutar byggingarinnar eru byggðir síðar. Lóð er ríflega 7.200 m2 að flatarmáli.

    Fasteignasali eignar tók að sér að stilla upp tilboði, en samkomulag liggur fyrir um kjör.

    Lögmaður bæjarins fór yfir helstu skilmála.

    Kaupverð er 30 millj. kr. sem greiðist við undirritun kaupsamnings. Í húsinu eru um 90 ferðavagnar sem leigt hefur verið pláss í húsinu og verða þeir fram í byrjun maí í húsinu. Aðrir leigutakar/samningar liggja fyrir, bæði fyrir mastur á turni húss og um aðstöðu á komandi sumri fyrir starfsemi í neðsta hluta húss.

    Tilgangur hafnarsjóðs með kaupum á húsinu er að tryggja yfirráð yfir dýrmætri lóð, alls yfir 7.200 m2 að stærð, alveg við Norðurgarð, meginviðlegukant og athafnasvæði hafnarinnar. Á lóðinni stendur gamalt frystihús sem hafnarstjórn sér fyrir sér að muni í framtíðinni víkja fyrir nýrri byggingu eða byggingum, á dýrmætri byggingarlóð á hafnarsvæðinu. Taka gæti þurft upp nýtt deiliskipulag Framness austan Nesvegar, vegna skipulags á lóðinni og í tengslum við möguleg ný áform um nýtingu lóðarinnar. Það er þó ekki tímabært umræðuefni.

    Hafnarstjórn samþykkir að ganga til kaupa á fasteigninni Nesvegi 4, með þeim skilmálum sem farið hefur verið yfir. Hafnarstjórn felur hafnarstjóra og formanni stjórnar umboð til að undirrita og samþykkja sölutilboð frá eiganda fasteignarinnar með kaupverð 30 millj. kr. Einnig umboð til að undirrita kaupsamning og afsal, sem og önnur tilheyrandi skjöl í samræmi við þetta.

    Hafnarstjórn leggur til við bæjarstjórn að gerður verði viðauki við fjárhagsáætlun ársins 2026, þar sem gert verði ráð fyrir viðbótarfjármagni til þessara kaupa.

    Samþykkt samhljóða.