Landeigandi í útsveit sendir fyrirspurn um afstöðu bæjarins til þess að komið verði upp fjárrétt í fjallskilasvæðinu.
Erindi lagt fyrir nefndina sem fer skv. erindisbréfi sínu með fjallskilamálefni skv. ákvæðum laga nr. 6/1986. Einnig lagt fram minnisblað þjónustufulltrúa skipulags- og byggingarfulltrúa með upplýsingum um málefnið.
Í dag er fé af fjalli rekið í fjárhús einnar bújarðarinnar og dregið sundur þar. Ekki er lögð fram tillaga að staðsetningu og ekki liggur fyrir afstaða annarra sauðfjáreigenda á fjallskilasvæðinu.
Samkvæmt 49. gr. laga um fjallskil ber sveitarfélagi að tryggja að til sé fjárrétt, en af 51. gr. sömu laga má ráða að það sé samkomulagsatriði við fjallskilaskylda aðila hvort og þá hve mikill hluti kostnaðar er greiddur af sveitarfélaginu. Sjá nánar í minnisblaði.
Í umræðum nefndarinnar kom fram að við gerð nýlegrar réttar í Kolgrafafirði hafi bærinn lagt til timbur í réttargerðina auk vinnu starfsmanns úr áhaldahúsi, en að fjallskilaskyldir aðilar hafi að öðru leyti tekið að sér alla vinnu við smíði réttarinnar í góðu samkomulagi sín á milli.
Samkvæmt 51. gr. laga nr. 6/1985 um afréttarmálefni, fjallskil og fleira skal kostnaður við byggingu nýrrar réttar greiddur af fjallskilasjóði, hafi ekki náðst samkomulag um annað, og sveitarstjórn er heimilað að leggja gjald á fjallskilaskylda aðila vegna réttarbyggingar. Komi fram beiðni um réttarbyggingu á fjallskilasvæðinu er það verkefni bæjarráðs eða bæjarstjórnar að kanna grundvöll þess að samkomulag náist milli Grundarfjarðarbæjar og fjallskilaskyldra aðila um þátttöku sveitarfélagsins í kostnaði við bygginguna.