Málsnúmer 2607001F

Vakta málsnúmer

Bæjarráð - 658. fundur - 21.07.2026



Bæjarráð samþykkir samhljóða fundargerð 280. fundar skipulags- og umhverfisnefndar.
  • .1 2607004 Erindisbréf skipulags- og umhverfisnefndar, kosning formanns, varaformanns og ritara
    Erindisbréf skipulags- og umhverfisnefndar lagt fram. Skipulags- og umhverfisnefnd - 280 Erindisbréf nefndarinnar kynnt fyrir fundarmönnum.

    Skipulags- og umhverfisnefnd samþykkti að formaður nefndarinnar verði Þuríður Gía Jóhannesdóttir og að varaformaður nefndarinnar verði Signý Gunnarsdóttir. Jafnframt var samþykkt að skipulagsfulltrúi verði ritari nefndarinnar.

    Nýr formaður tók við stjórn fundarins.

    Formaður nefndarinnar lagði fram tillögu að reglulegum fundardegi og fundartíma í samræmi við ákvæði 8. gr. samþykktar um stjórn Grundarfjarðarbæjar og verða fundir að jafnaði haldnir í Ráðhúsi Grundarfjarðar fyrsta fimmtudag hvers mánaðar, kl. 15:00.
  • .2 2606019 Siðareglur kjörinna fulltrúa
    Siðareglur kjörinna fulltrúa lagðar fram. Skipulags- og umhverfisnefnd - 280 Siðareglur kynntar og fulltrúar beðnir um að kynna sér þær vel.
  • .3 2606022 Samþykkt um stjórn Grundarfjarðarbæjar
    Samþykktir um stjórn Grundarfjarðarbæjar lagðar fram Skipulags- og umhverfisnefnd - 280 Samþykktir um stjórn Grundarfjarðarbæjar kynntar og fulltrúar beðnir um að kynna sér þær vel.
  • .4 2606038 Umhverfisviðurkenningar Grundarfjarðarbæjar 2026
    Bæjarráð samþykkti á 657. fundi sínum að veittar verði umhverfisviðurkenningar sumarið 2026 og fól bæjarstjóra umsjón verkefnisins. Lagt er til að veittar verði umhverfisviðurkenningar Grundarfjarðarbæjar 2026. Markmið viðurkenninganna er að hvetja íbúa og fyrirtæki til að leggja rækt við umhverfi sitt og gefa gott fordæmi í samfélaginu. Lagt er til að Grundarfjarðarbær veiti í upphafi tvær tegundir umhverfisviðurkenninga, annars vegar heimili ársins 2026, þ.e. snyrtilegasta hús og garður, og hins vegar prýði atvinnulífsins 2026, þ.e. snyrtileg atvinnustarfsemi
    Skipulags- og umhverfisnefnd - 280 Bæjarstjóra er falið að vinna málið áfram. Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .5 2607005 Skipulagsdagurinn 2026
    Húsnæðis-, mannvirkja- og skipulagsstofnun halda árlegan Skipulagsdag í samstarfi við Samband íslenskra sveitarfélaga. Dagurinn verður haldinn 5. nóvember nk.. Daginn eftir þann 6. nóvember er haldinn skipulagsfulltrúadagur, þar sem stofnunin fundar með starfandi skipulagsfulltrúum. Skipulags- og umhverfisnefnd - 280 Skipulags- og umhverfisnefnd leggur til við bæjarstjórn að formaður nefndarinnar, skipulagsfulltrúi og verkefnastjóri skipulags- og umhverfismála mæti fyrir hönd sveitarfélagsins á Skipulagsdaginn 2026. Enn fremur að skipulagsfulltrúa og verkefnisstjóra verði falið að taka þátt í skipulagsfulltrúadeginum. Óskað hefur verið eftir að hálfu HMS við verkefnisstjóra skipulags- og umhverfisnefndar að halda erindi á Skipulagsdeginum. Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .6 2606041 Fyrirspurn um heimild til byggingar garðskála á Hrannarstíg 36
    Eigandi Hrannarstígs 36 fyrirhugar að byggja sólskála sunnan við húsið. Um er að ræða raðhúsalengju sem er innan svæðis sem skilgreint er sem samfélagsþjónusta og er merkt S-2 í aðalskipulagi sveitarfélagsins. Stærð lóðar Hrannarstígs 36 er 281 fm og nýtingarhlutfall er 0,4. Heimilað byggingarmagn á lóð er því 112,4 fm. Stærð íbúðar er 88,3 fm. Fyrirhugaður sólskáli er áætlaður skv. framlögðum teikningum 10,4 fm að stærð. Heildar byggingarmagn lóðar eftir framkvæmd yrði þá 97,7 fm sem samræmist nýtingarhlutfalli lóðar skv. gildandi deiliskipulagi. Á deiliskipulagsuppdrætti eru sýndir byggingarreitir og skulu allir meginhlutar byggingar vera innan byggingarreits. Í greinargerð deiliskipulags kemur fram að einstaka hlutar bygginga, eins og td. þakskegg, má fara út fyrir byggingarreit að einhverju leyti og gera skal grein fyrir því á aðaluppdrætti. Æskilegt er að valin séu byggingarefni sem fengið hafa viðurkennda umhverfisvottun. Mælt er með að nota byggingarefni og útfærslur sem eru viðhaldslétt og auðveld í þrifum. Óheimilt er að nota byggingarefni sem geta haft í för með sér útskolun skaðlegra efna í vatn, svo sem þungmálma. Samþykki eigenda fasteignar þarf að liggja fyrir í samræmi við lög um fjöleignahús nr. 26/1994. Skipulags- og umhverfisnefnd - 280 Skipulags- og umhverfisnefnd tekur jákvætt í málið svo fremi að aðaluppdrættir sýni fram á að megin bygging rúmist innan byggingarreits samþykkts deiliskipulags. Enn fremur að lagt verði fram samþykki eigenda fasteignar í samræmi við lög um fjöleignahús nr. 26/1994. Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .7 2607007 Upplýsingar um nýjar framkvæmdir og sjálfbær umsvif í vatnaáætlun 2028-2033
    Umhverfis- og orkustofnun vinnur að endurskoðun vatnaáætlunar samkvæmt lögum nr. 36/2011 um stjórn vatnamála. Fyrsta vatnaáætlun tók gildi í apríl 2022 og gildir til 2027. Endurskoðuð vatnaáætlun verður staðfest í byrjun árs 2028.

    Í 20. grein laganna segir frá þeim þáttum sem gera þarf grein fyrir í vatnaáætlun. Í e-lið segir að gera skuli grein fyrir áætlunum um nýjar framkvæmdir, ný sjálfbær umsvif eða breytingum á vatnshlotum. Umhverfis- og orkustofnun óskar því eftir upplýsingum um áætlanir um verkefni sem stefnt er að komi til framkvæmda á tímabilinu 2028-2033 sem munu líklega valda því að umhverfismarkmið vatnshlots næst ekki og sækja þurfi um heimild til breytinga á vatnshloti skv. 18 gr. laga um stjórn vatnamála.
    Skilafrestur er til og með 30. september 2026.     Skipulags- og umhverfisnefnd - 280 Skipulags- og umhverfisnefnd felur verkefnisstjóra skipulags- og umhverfismála að kanna og afla upplýsinga um hvort að áætlanir um verkefni, sem stefnt er að komi til framkvæmda á tímabilinu 2028-2033, munu líklega valda því að umhverfismarkmið vatnshlots náist ekki og sækja um heimild til breytinga á vatnshloti skv. 18 gr. laga um stjórn vatnamála ef umhverfismarkmið vatnshlots næst ekki.
  • .8 2607002 Landmótun og uppbygging iðnaðarsvæðis vestan Kverná
    Grundarfjarðarbær (kt. 520169-1729), sækir hér með um framkvæmdaleyfi skv. 13. gr. skipulagslaga nr. 123/2010 m.s.br. fyrir landmótun og uppbyggingu á iðnaðarsvæði vestan Kvernár sem er skilgreint sem landnotkunarsvæði I-1 í Aðalskipulagi Grundarfjarðarbæjar 2019-2039. Sótt er um framkvæmdaleyfi á grunni Deiliskipulags iðnaðarsvæðis vestan Kvernár, sem staðfest var þann 13.2.2025. Sem fylgiskjal með framkvæmdaleyfisumsókninni er áætlun um landmótun af iðnaðarsvæðinu vestan Kvernár skv. 7. gr. reglugerðar um framkvæmdaleyfi nr. 772/2012. Framkvæmdin fellur ekki undir lög nr. 111/2021 um umhverfismat framkvæmda og áætlana enda er um að ræða eðlilega landmótun á nýbyggingarsvæði. Landeigandi fyrirhugaðs framkvæmdasvæðis er Grundarfjarðarbær. Fyrirhuguð framkvæmd felst í því að útbúa lóðir fyrir iðnaðarstarfsemi en aukin eftirspurn er eftir iðnaðarlóðum í Grundarfirði, sem nauðsynlegt er að verða við fyrir þróun og uppbyggingu í sveitarfélaginu. Svæðið er eins og er mishæðótt og því er landmótun nauðsynleg fyrir hagkvæma uppbyggingu lóða og gatna. Með deiliskipulaginu og efnistökuáætluninni er tryggt að saman fari hagkvæm nýting á landi, innviðum og jarðefnum. Nánari lýsingu á framkvæmd má sjá í meðfylgjandi fylgiskjölum og verður framkvæmd í samræmi við lýsingu og skilmála sem þar koma fram.
    Skipulags- og umhverfisnefnd - 280 Herborg Árnadóttir kynnti framkvæmdina. Skipulagsfulltrúa falið að vinna málið áfram.
  • .9 2607006 Endurskoðun aðalskipulags
    Samanber 35. gr. skipulagslaga nr. 123/2010 m.s.br. ber sveitarstjórn að loknum sveitarstjórnarkosningum að meta hvort ástæða sé til að endurskoða aðalskipulagið. Skal sú ákvörðun m.a. taka mið af því hvort landsskipulagsstefna kalli á endurskoðun aðalskipulagsins. Um málsmeðferð á endurskoðaðri áætlun fer sem um gerð nýs aðalskipulags sé að ræða. Ef niðurstaða sveitarstjórnar er að aðalskipulagið þarfnist ekki endurskoðunar heldur það gildi sínu. Skal ákvörðun sveitarstjórnar að jafnaði liggja fyrir innan tólf mánaða frá sveitarstjórnarkosningum og skal niðurstaðan tilkynnt Húsnæðis-, mannvirkja- og skipulagsstofnun jafnskjótt og hún liggur fyrir. Skipulags- og umhverfisnefnd - 280 Skipulags- og umhverfisnefnd leggur til við bæjarstjórn að verkefnisstjóra skipulags- og umhverfismála verði falið í samráði við skipulagsfulltrúa að skoða hvort að landsskiplagsstefna eða aðrir þættir kalli á endurskoðun aðalskipulags sveitarfélagsins. Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .10 2508011 Blágrænt ofanvatnsskipulag - Rammahluti aðalskipulags
    Aðalskipulagstillagan var auglýst í Skipulagsgátt HMS á tímabilinu 21. apríl - 2. júní 2026. Hún var einnig auglýst á heimasíðu Grundarfjarðar, í héraðsblaðinu Skessuhorni og í Lögbirtingablaðinu. Enn fremur var opið hús í Sögumiðstöðinni 27. apríl 2026. Umsagnir um tillögu að rammahluta aðalskipulags Grundarfjarðarbæjar 2019-2039 um blágrænar ofanvatnslausnir eru almennt mjög jákvæðar og gefa ekki tilefni til breytinga á tillögunni. Alls bárust 8 umsagnir frá eftirfarandi aðilum: Veðurstofu Íslands, Minjastofnun Íslands, Náttúruverndarstofnun, Breiðarfjarðarnefnd, Vegagerðinni, Náttúrufræðistofnun, Landi og skógi og Hafrannsóknastofnun. Umsagnaraðilar fagna margir metnaðarfullum áætlunum Grundarfjarðarbæjar um innleiðingu náttúrumiðaðra lausna við meðhöndlun ofanvatns. Texta um viðeigandi mótvægisaðgerðir og vöktun var bætt við tillöguna og umhverfismatið eftir kynningu á vinnslustigi. Vanda þarf til verka við gerð deiliskipulags og framkvæmdir við innleiðingu blágrænna ofanvatnslausna m.t.t. verndarsvæða, vistgerða, vatnshlota og líffræðilegs fjölbreytileika eins og fjallað er um í rammahlutanum. Skipulags- og umhverfisnefnd - 280 Skipulags- og umhverfisnefnd leggur til við bæjarstjórn að samþykkja auglýsta tillögu rammahluta aðalskipulags Grundarfjarðarbæjar 2019-2039 um blágrænar ofanvatnslausnir sbr. 1. og 2. mgr. 32. gr. skipulagslaga nr. 123/2010 m.s.br. og skipulagsfulltrúa verði falið að senda samþykkt skipulag ásamt athugasemdum og umsögn um þær til staðfestingar hjá HMS sbr. 3. mgr. 32. gr. sömu laga. Skipulagsfulltrúa falið að vinna málið áfram.

    Nefndin þakkar þeim, sem komu að mótun tillögunnar og vinnslu hennar, fyrir vel unnin störf.     Bókun fundar Afgreiðsla tekin fyrir í 5. lið þessa fundar.
  • .11 2511004 Háubakkar (ÍB-4) - Aðalskipulagsbreyting
    Aðalskipulagstillagan var auglýst í Skipulagsgátt HMS á tímabilinu 21. apríl - 2. júní 2026. Hún var einnig auglýst á heimasíðu Grundarfjarðar, í héraðsblaðinu Skessuhorni og í Lögbirtingablaðinu. Skipulagsgögn voru aðgengileg í Ráðhúsi Grundarfjarðarbæjar og á bókasafni bæjarins í Sögumiðstöð. Kynningarfundur var haldinn í Sögumiðstöðinni þann 27. apríl sl. Alls bárust 6 umsagnir frá eftirfarandi aðilum: HMS, Slökkviliði Grundarfjarðar, Veitum, Minjastofnun Íslands, Veðurstofu Íslands og Breiðafjarðarnefnd. Athugasemdir snéru fyrst og fremst að nýju deiliskipulagi íbúðarbyggðar á Háubökkum sem auglýst var samhliða. Umsagnir og athugasemdir hafa því ekki áhrif á auglýsta tillögu. Skipulags- og umhverfisnefnd - 280 Skipulags- og umhverfisnefnd leggur til við bæjarstjórn að samþykkja auglýsta tillögu breytingar aðalskipulags Grundarfjarðarbæjar 2019-2039 um íbúðarbyggð á Háubökkum sbr. 1. og 2. mgr. 32. gr. skipulagslaga nr. 123/2010 m.s.br. og skipulagsfulltrúa verði falið að senda samþykkt skipulag ásamt athugasemdum og umsögn um þær til staðfestingar hjá HMS sbr. 3. mgr. 32. gr. sömu laga. Skipulagsfulltrúa falið að vinna málið áfram. Bókun fundar Afgreiðsla tekin fyrir í 6. lið þessa fundar.
  • .12 2509002 Háubakkar (ÍB-4) Viðbótarlóðir, Nýtt deiliskipulag
    Deiliskipulagstillaga var auglýst í Skipulagsgátt HMS á tímabilinu 21. apríl - 2. júní 2026. Hún var einnig auglýst á heimasíðu Grundarfjarðar, í héraðsblaðinu Skessuhorni og í Lögbirtingablaðinu. Skipulagsgögn voru aðgengileg í Ráðhúsi Grundarfjarðarbæjar og á bókasafni bæjarins í Sögumiðstöðinni á Grundargötu 35. Enn fremur var haldinn kynningarfundur um tillögurnar í Sögumiðstöðinni þann 27. apríl sl. Alls bárust 6 umsagnir frá eftirfarandi aðilum: HMS, Veitum, Veðurstofu Íslands, Minjastofnun Íslands, Breiðafjarðarnefnd og Vegagerðinni. Breiðafjarðarnefnd gerir þær athugsemdir að í ljósi þess að fjara Breiðafjarðar nýtur verndar skv. lögum um vernd Breiðafjarðar nr. 54/1995 að þá telur Breiðafjarðarnefnd æskilegt að lóðir verði útfærðar með þeim hætti að tryggð verði 50 m fjarlægð frá strandlínu og að fjarlægð mannvirkja frá strandlínunni verði sem mest. Vegagerðin gerir athugasemdir við auglýsta tillögu og óskar eftir beinu samráði við sveitarfélagið og hönnuð skipulagsins þannig að tryggt sé að tenging verði í samræmi við veghönnunarreglur og öryggiskröfur. Aðrar umsagnir fela ekki í sér athugasemdir við tillöguna. Skipulags- og umhverfisnefnd - 280 Herborg Árnadóttir kynnti auglýsta tillögu. Skipulagsfulltrúa falið að vinna málið áfram í ljósi innsendra athugasemda.
  • .13 2508014 UMFG - Grasblakvöllur
    Blakdeild hefur óskað eftir að setja upp grasblakvöll. Upphaflega var samþykkt að setja upp völlinn á borholusvæði. Eftir nánari skoðun er talið að það sé ekki skynsamlegt vegna vatnavaxta sem eru þar á stórum rigningardögum. Verið er að vinna í áætlun til þess að drena svæðið, en það mun ekki takast á þessu ári. Íþrótta- og tómstundarfulltrúi og verkefnastjóri skipulags- og umhverfismála hafa skoðað aðrar staðsetningar og óska hér með eftir leyfi til þess að setja upp þennan blakvöll við Paimpol garð á móts við grunnskóla. Þar er góð mön sem hægt er að nýta sem stúku, bílastæði er við völlinn, gott aðgengi er að honum, svæði er ekki nýtt í neitt nema grasslátt. Samkvæmt aðalskipulagi er svæðið skilgreint sem samfélagsþjónusta S-3. Þar er í gildi deiliskipulag Ölkeldudals. Á umræddu svæði er fyrirhugað að byggja á þessari lóð en þessi lóð er neðarlega í forgangsröðun í lóðaúthlutun á þessu svæði. Hægt er svo að setja upp girðingu eða gróður til þess að koma í veg fyrir að boltar fari út á götu. Blakdeildin er tilbúin með allan búnað til þess að setja upp völlinn, en vantar heimild fyrir staðsetningu vallarins. Skipulags- og umhverfisnefnd - 280 Skipulags- og umhverfisnefnd leggur til við bæjarstjórn að gerður verður samningur við blakdeildina um bráðabirgðastaðsetningu vallarins. Verkefnastjóra skipulags- og umhverfismála falið að vinna málið áfram í samstarfi við íþrótta- og tómstundarfulltrúa. Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .14 2606048 Niðurtekt á gangstétt við Fellabrekku 5
    Verið er að endurnýja gangstétt við Fellabrekku 5 sem er nýbygging. Gert var ráð fyrir í verðkönnunargögnum að niðurtekt við Fellabrekku 5 yrði 5 m. Deiliskipulag er ekki í gildi fyrir umrætt svæði. Íbúi óskar eftir að niðurtektir fyrir innkeyrslur verði annars vegar 7,5 m og hins vegar 2,5 m. Samtals 10 m af niðurtekt. Íbúi hefur ekki aðgengi að bílastæðum í götu. Skipulags- og umhverfisnefnd - 280 Skipulags- og umhverfisnefnd samþykkir niðurtekt 7,5 m, en hafnar niðurtekt um 2,5 m vegna öryggissjónarmiða.
  • .15 2511002 LIFE Icewater
    Borist hefur minnisblað frá Umhverfis- og orkustofnun þar sem ætlunin er að kynna LIFE Icewater verkefnið, skýra helstu markmið þess og hvernig það tengist innleiðingu vatnaáætlunar Íslands. Þar er farið stuttlega yfir efni vatnaáætlunar og LIFE Icewater verkefnisins ásamt því að fjallað er almennt um hlutverk sveitarfélaga í verkefninu.

    Samband Íslenskra sveitarfélaga hefur einnig sent minnisblað sem fjallar um þátttöku sveitarfélaga og Sambands íslenskra sveitarfélaga í Evrópuáætlunum, þar á meðal LIFE Icewater verkefnum.

    Þetta er gert til þess að fræða nýja kjörna fulltrúa sveitafélagsins um LIFE Icewater verkefnið.

    Lagt hefur verið til að vera með fræðsludag í lok ágúst um þessi mál og veitir til dæmis Samband íslenskra sveitafélaga íslenskum sveitarfélögum ráðgjöf og aðstoð við að afla viðbótartekna vegna þessara mála.

    Einnig hafa Sæmundur Sveinsson verkefnastjóri LIFE Icewater á landsvísu og Gestur Pétursson Forstjóri Umhverfis- og orkustofnunar boðist til að koma og kynna sig og LIFE Icewater verkefnið fyrir kjörnum fulltrúum.

    Fræðsludagur verður haldinn 1. september nk.     Skipulags- og umhverfisnefnd - 280 Verkefnisstjóri LIFE Icewater verkefnisins kynnti stöðu mála og það sem fram undan er.
  • .16 2607003 Skóla- og íþróttasvæði - ofanvatn
    Mikið ofanvatn hefur verið til vandræða á svæði ofan við íþróttahús og niður að íþróttavelli. Ákveðið var að fara markvist í greiningu á vatninu og finna heildstæða lausn á málinu. Vandræði hafa skapast meðal annars í seyrulosun, í ærslabelg, borholusvæði, tjaldsvæði við ruslaskýli, og á íþróttasvæði við stúkur. Allt þetta vatn á sömu upptökin og hefur COWI útbúið fyrir okkur blágrænt skipulag um hvernig við komum vatninu á öruggan hátt í gegnum svæðið og út í Gilsá. Til kynningar er skýrsla COWI ásamt ráðleggingum á framkvæmdum og forgangsröðun verkefna. Málið er til kynningar upp á að finna út hvað skal framkvæma strax og hvað skal setja í næstu fjárhagsáætlanir Skipulags- og umhverfisnefnd - 280 Verkefnisstjóri skipulags og umhverfismála kynnti ofangreinda vinnu. Skipulags- og umhverfisnefnd leggur til við bæjarstjórn að gert verði ráð fyrir ofangreindum landmótunum í næstu fjárhagsáætlun sveitarfélagsins. Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .17 2201020 Önnur mál umhverfis- og skipulagssviðs
    Skipulags- og umhverfisnefnd - 280 Ýmis mál rædd.
  • .18 2606049 Selsker - Klæðning á Grundargötu 84
    Íbúi við Grundargötu 84 tilkynnir hér með endurnýjun klæðningar á íbúðarhúsi sínu, sbr. gr. 2.3.6.a í byggingarreglugerð nr. 112/2012 (nýklæðning þegar byggðra mannvirkja).
    Ekkert deiliskipulag er í gildi fyrir svæðið. Í Aðalskipulagi Grundarfjarðarbæjar 2019- 2039 er íbúðarhúsið á svæði merkt ÍB-4. Samkvæmt aðalskipulagi er heimilt að leyfa breytingar á núverandi húsnæði sem falla vel að einkennum og yfirbragði þeirrar byggðar sem fyrir er. Skipulags- og umhverfisnefnd þarf að meta hvort framkvæmdin samræmist aðalskipulagi Grundarfjarðar 2019-2039 (m.a. ákvæðum um yfirbragð byggðar). Þetta er gert skv. gr. 2.3.6 og 2.3.4 í byggingarreglugerð.     Skipulags- og umhverfisnefnd - 280 Skipulags- og umhverfisnefnd telur fyrirhugaða breytingu vera óverulega skv. 2.3.4. gr. byggingarreglugerðar og ekki skerða hagsmuni nágranna. Breytingin kallar því ekki á grenndarkynningu skv. 44. gr. skipulagslaga nr. 123/2010.