Málsnúmer 2508001F

Vakta málsnúmer

Bæjarráð - 641. fundur - 28.08.2025

Bæjarráð samþykkir samhljóða 270. fundargerð skipulags- og umhverfisnefndar.

  • .1 2312014 Tillaga um breytingu á deiliskipulagi Ölkeldudals
    Til kynningar:

    Deiliskipulag Ölkeldudals tók gildi 7. júlí sl. og var gildistakan auglýst í B-deild Stjórnartíðinda og á vef bæjarins. Kærufrestur rann út 7. ágúst sl. Þeim sem gert höfðu athugasemdir eða umsagnir við tillöguna var tilkynnt um málskotsrétt sinn.

    Engin kæra barst vegna gildistöku deiliskipulagsins.     Skipulags- og umhverfisnefnd - 270 Lóðir í Ölkeldudal verða auglýstar á næstunni í samræmi við fyrirliggjandi ákvörðun og forgangsröðun bæjarstjórnar. Hönnun á lögnum og gatnagerð vegna lóða vestan við Fellaskjól er í vinnslu.
  • .2 2508010 Grundarfjarðarhöfn - Deiliskipulag Suðurhluta hafnarsvæðis
    Lögð fram verkefnistillaga dags 7. ágúst 2025 um vinnu við deiliskipulag suðursvæðis hafnarinnar. Ennfremur tillaga að skipulagslýsingu fyrir deiliskipulagið.

    Í verkefninu felst að gera deiliskipulag fyrir nýtt þróunarsvæði Grundarfjarðarhafnar, þ.e. stækkun hafnarsvæðisins sunnan Miðgarðs yfir að Suðurgarði og að honum meðtöldum. Einnig fyrir svæði í kringum hafnarvog og hafnarhús, þar sem einnig er tekið á móti ferðafólki. Gert er ráð fyrir vegi eftir landfyllingunni, sem tengir hafnarsvæði (norður) við þjóðveginn austan við þéttbýlið. Þetta yrði þjóðvegur niður að höfninni. Þessi áform eru í samræmi við gildandi aðalskipulag.

    Hafnarstjórn er verkkaupi og fundaði í gær, 19. ágúst 2025, um tillöguna. Hafnarstjórn samþykkti verkefnistillögu og skipulagslýsingu deiliskipulagsins og leggur til við skipulags- og umhverfisnefnd og bæjarstjórn að tillagan verði samþykkt til auglýsingar skv. 40. gr. skipulagslaga.

    Halldóra Hreggviðsdóttir skipulagsráðgjafi hjá Alta er gestur fundarins undir þessum lið gegnum fjarfund.
    Skipulags- og umhverfisnefnd - 270 Halldóra fór yfir verkefnistillöguna. Ennfremur fór hún yfir framlagða tillögu að skipulagslýsingu fyrir deiliskipulagið. Hún gerði einnig grein fyrir hvernig deiliskipulagstillaga, ásamt umhverfismati hennar, verður unnin. Farið var yfir fyrirkomulag á samráði og kynningu.

    Fyrir liggur forhönnun Vegagerðarinnar að stækkun hafnarsvæðisins með nýjum bryggjukanti, sunnan Miðgarðs. Byggt verður m.a. á þeirri forhönnun, á fyrirliggjandi deiliskipulagsforsögn fyrir svæðið og á niðurstöðum úr vinnu sem fram hefur farið síðustu mánuði.

    Skipulags- og umhverfisnefnd samþykkir fyrir sitt leyti framlagða verkefnistillögu. Nefndin samþykkir einnig framlagða skipulagslýsingu og leggur til við bæjarstjórn að hún verði samþykkt til auglýsingar skv. 40. grein skipulagslaga. Ennfremur er skipulagsfulltrúa falið að vinna áfram að verkefninu í samstarfi við hafnarstjóra.
    Bókun fundar Bæjarráð samþykkir samhljóða afgreiðslu skipulags- og umhverfisnefndar og samþykkir að auglýsa skipulagslýsingu fyrir suðursvæði Grundarfjarðarhafnar í samræmi við 40. gr. skipulagslaga.

  • .3 2508020 Framnes - lóðarsamningar og uppbygging
    Bæjarstjóri og skipulagsfulltrúi sögðu frá stöðu málsins. Skipulags- og umhverfisnefnd - 270 Í undirbúningi er samningsgerð sem snýr að þróun og uppbyggingu á Framnesi, sbr. stefnu aðalskipulags sem og nýlega aðalskipulagsbreytingu fyrir fremsta hluta Framness, þar sem nú er VÞ-svæði (verslun og þjónusta). Málið hefur verið í vinnslu vegna samningsgerðar, en vinna við deiliskipulag svæðisins var sett til hliðar á meðan.

    Málið verður til umfjöllunar á næsta fundi bæjarráðs.

    Bókun fundar Málið er einnig sér liður á dagskrá þessa fundar bæjarráðs, dagskrárliður nr. 2.
  • .4 2503031 Breyting aðalskipulags - miðbæjarreitur
    Skipulagsfulltrúi auglýsti þann 11. júní sl. tillögu um breytingu á aðalskipulagi í tengslum við uppbyggingu á miðbæjarreit. Frestur til að skila inn umsögnum og athugasemdum var til 30. júlí sl. og alls bárust sex umsagnir/athugasemdir í Skipulagsgátt á auglýsingatíma tillögunnar.

    Lagt fram yfirlit yfir athugasemdir og umsagnir sem bárust og tillaga að viðbrögðum og svörum við þeim.
    Skipulags- og umhverfisnefnd - 270 Halldóra Hreggviðsdóttir skipulagsráðgjafi hjá Alta er gestur fundarins undir þessum lið gegnum fjarfund.

    Eftirtaldir aðilar skiluðu umsögnum/athugasemdum í Skipulagsgátt á kynningartímanum:

    Ásthildur Elva Kristjánsdóttir
    Minjastofnun Íslands
    Veitur ohf.
    Vegagerðin
    Heilbrigðiseftirlit Vesturlands
    Einar Sveinn Ólafsson

    Farið var yfir þær athugasemdir/umsagnir sem bárust.

    Skipulags- og umhverfisnefnd samþykkir fyrirliggjandi tillögu að svörum/viðbrögðum við athugasemdum/umsögnum frá framangreindum aðilum.

    Á grunni umsagna og athugasemda er ekki talin þörf á að gera breytingu á auglýstri tillögu að breytingu á aðalskipulagi.

    Skipulags- og umhverfisnefnd vísar tillögunni til bæjarstjórnar og leggur til að hún verði samþykkt.

    Vísað er í fylgiskjal um einstakar athugasemdir og viðbrögð við þeim, sem einnig verður birt í Skipulagsgáttinni.

     Bókun fundar Bæjarráð samþykkir samhljóða afgreiðslu skipulags- og umhverfisnefndar.

    Bæjarráð samþykkir samhljóða tillögu nefndarinnar að svörum/umsögn við athugasemdum sem bárust á auglýsingatíma skipulagstillögunnar, og ennfremur að hin auglýsta tillaga verði nú send til Skipulagsstofnunar til staðfestingar, óbreytt, sbr. 1. mgr. 32. gr. skipulagslaga.

    Í samræmi við 2. mgr. 32. gr. skipulagslaga, felur bæjarráð skipulagsfulltrúa að senda Skipulagsstofnun tillöguna til staðfestingar, ásamt athugasemdum sem bárust og umsögn sveitarstjórnar um þær. Þeim aðilum er athugasemdir gerðu, verður kynnt afgreiðsla þessi og svör, gegnum Skipulagsgáttina.


  • .5 2508011 Blágrænt ofanvatnsskipulag - Rammahluti aðalskipulags
    Lögð fram til kynningar og umræðu tillaga að nálgun við gerð blágræns ofanvatnsskipulags, sem verði gert að rammahluta aðalskipulags.
    Verkefnið er framhald stefnumótunar bæjarins í aðalskipulagi Grundarfjarðarbæjar um endurnýjun ofanvatnskerfis bæjarins með innleiðingu blágrænna ofanvatnslausna og er kostað að hluta af fjárstyrk bæjarins til ICEWATER-verkefnisins.

    Með þessu blágræna ofanvatnsskipulagi er verið að móta stefnu um tilhögun fráveitu og meðferðar ofanvatns í allri byggðinni. Á grunni þess verði tryggð markviss innleiðing og uppbygging blágrænna innviða og almenningsrýma í Grundarfjarðarbæ, samhliða endurnýjun ofanvatnskerfisins.
    Skipulags- og umhverfisnefnd - 270 Halldóra Hreggviðsdóttir skipulagsráðgjafi hjá Alta var gestur fundarins undir þessum lið gegnum fjarfund.

    Halldóra fór yfir verkefnistillöguna. Viðfangsefnin eru m.a. að fá yfirlit yfir rennsli/rennslisleiðir ofanvatns frá upplandi bæjarins og í gegnum bæinn, með skiptingu í vatnasvið og áætlun um magn ofanvatns og marka á þeim grunni örugga meðferð ofanvatns í almenningsrýmum og innan lóða. Finna þarf leiðir við skipulag blágrænna innviða til að samnýta almenningsrými fyrir meðferð ofanvatns og önnur not, s.s. græn svæði og göturými. Markmiðið er m.a. að bærinn verði grænni og seigla hans aukin gagnvart loftslagsbreytingum.

    Skipulags- og matslýsing á grundvelli þessarar verkefnistillögu ætti að verða tilbúin til auglýsingar á næstu vikum.

    Sigurður Valur Ásbjarnarson skipulagsfulltrúi tók til máls undir þessum lið. Hann sagðist telja að þetta sé sú umgjörð sem þurfi til að halda utan um verkefnið og leggur til að tillagan verði samþykkt. Rammahlutinn muni auðvelda vinnu við deiliskipulagsverkefni og framkvæmdaverkefni í almenningsrýmum almennt.

    Skipulags- og umhverfisnefnd samþykkir tillöguna fyrir sitt leyti og felur Nönnu Vilborgu, verkefnisstjóra skipulags- og umhverfismála, að vinna áfram að málinu í samráði við skipulagsfulltrúa og aðra starfsmenn bæjarins.

    Ennfremur leggur skipulags- og umhverfisnefnd til að sótt verði um mótframlag úr Skipulagssjóði við gerð þessa rammahluta aðalskipulags, þar sem þetta er fyrsta skipulag af þessu tagi sem unnið er fyrir heilt bæjarfélag.
    Bókun fundar Bæjarráð samþykkir samhljóða framkomna tillögu um gerð blágræns ofanvatnsskipulags, sem unnið verði sem rammahluti Aðalskipulags Grundarfjarðar. Jafnframt samþykkir bæjarráð að sótt verði um styrk til Skipulagssjóðs á grundvelli sérstöðu verkefnisins.
  • .6 1610008 Hraðahindranir og umferðamerkingar
    Mál lagt fram til kynningar og umræðu.

    Vegna kvartana frá íbúum og umræðu um hraðalækkandi aðgerðir hefur verið til skoðunar að setja upp hraðahindranir í prufuskyni á völdum stöðum í bænum.

    Nanna Vilborg Harðardóttir, verkefnisstjóri skipulags- og umhverfismála, sagði frá tilögum sem hafa komið fram og fundum með Vegagerðinni um hraðalækkandi aðgerðir á Grundargötunni, sem er þjóðvegur í þéttbýli.

    Skipulags- og umhverfisnefnd - 270 Skipulags- og umhverfisnefnd, sem jafnframt fer með hlutverk umferðarnefndar, tekur jákvætt í hugmyndir um að prófa mismunandi útfærslur af hraðahindrunum, eða hraðalækkandi aðgerðum, á Grundargötu og öðrum viðkvæmum stöðum í bænum.

    Verkefnisstjóra skipulags- og umhverfismála falið að vinna áfram að málinu.
     Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .7 2508012 Fyrirspurn um breytta landnotkun Hamra
    Zeppelin Arkitektar hafa sent erindi fyrir hönd nýrra landeigenda að Hömrum, þar sem gerð er fyrirspurn til bæjarstjórnar um afstöðu til breyttrar landnotkunar á jörðinni.

    Gert er ráð fyrir að hluti jarðarinnar fari úr landbúnaði í ferðaþjónustu.
    Nýr landeigandi hyggst nýta núverandi hús að hluta eða öllu leyti undir gistiþjónustu og jafnframt byggja nokkur stök eða samliggjandi gistihús sunnan við núverandi íbúðarhús á bakkanum sem snýr að Kirkjufelli. Engar útfærslur liggja fyrir að svo komnu máli.
    Skipulags- og umhverfisnefnd - 270 Skipulags- og umhverfisnefnd minnir á almennar heimildir í aðalskipulagi um ferðaþjónustu á lögbýlum, en heimilt er án breytinga á aðalskipulagi að hafa gististað með rýmum fyrir allt að 20 gesti á hverju lögbýli, og auk þess allt að fimm litla gistikofa (einingar).
    Verði umfangið meira en það þarf aðalskipulagsbreytingu úr landbúnaðarsvæði í verslunar- og þjónustusvæði.

    Hægt er að fara fram á deiliskipulagsgerð fyrir uppbyggingu ferðaþjónustu þó hún sé innan þessarar heimildar í aðalskipulagi og veltur það á nánara umfangi og útfærslum.

    Ekki eru komnar fram upplýsingar um umfang fyrirhugaðrar uppbyggingar og vísar nefndin erindinu því til bæjarstjórnar til frekari skoðunar og umfjöllunar.

    Nefndin gerir þó ekki athugasemd við það að hluta landbúnaðarlands í landi Hamra verði breytt í verslunar- og þjónustusvæði, en minnir á að ekki liggja fyrir upplýsingar um til hve stórs hluta jarðarinnar slík áform nái.

    Bókun fundar Vísað er til erindis Zeppelin arkitekta, dags. 28. júlí 2025, fyrir hönd eigenda jarðarinnar Hamra í Eyrarsveit, vegna hugmynda um gististarfsemi á jörðinni. Í erindinu kemur fram að eigendur jarðarinnar hafi í hyggju að nýta núverandi hús á jörðinni að hluta eða öllu leyti fyrir gistiþjónustu en auk þess byggja fleiri hús sunnan við núverandi íbúðarhús. Óskað er eftir afstöðu sveitarstjórnar til hugmynda eigendanna og þess að breyta notkun hluta jarðarinnar úr landbúnaði í ferðaþjónustu. Áður en erindið barst höfðu Zeppelin arkitektar sent fyrirspurnir um hugsanlegar breytingar á aðalskipulagi.

    Ekki liggja fyrir nánar útfærðar tillögur um staðsetningu og fyrirkomulag bygginga sem tengjast verkefninu og er því ekki unnt að svara því, hvort þörf kunni að verða á breytingar á aðalskipulagi fyrir Grundarfjarðarbæ, hvað þá hvort þörf kunni að vera á umhverfismati.

    Grundarfjarðarbær leggur því til að kynntar verði sæmilega mótaðar „konsept-hugmyndir“ fyrir skipulagsnefnd, sem síðan tekur afstöðu hvort heimila eigi gerð deiliskipulags, mögulega með einhverjum breytingum á hugmyndinni sem nefndin telur nauðsynlegar. Það kemur svo í ljós í ferlinu, hvort aðalskipulagsbreyting er nauðsynleg og yrði þá sett í farveg.

    Samþykkt samhljóða.
  • .8 2506035 Leikskólinn Sólvellir - umsókn um stöðuleyfi fyrir bambahúsi
    Leikskólinn Sólvellir óskar eftir stöðuleyfi fyrir Bambahúsi (gróðurhús) á lóð leikskólans.

    Skipulags- og umhverfisnefnd - 270 Skipulags- og umhverfisnefnd samþykkir umsóknina og felur skipulagsfulltrúa að gefa út stöðuleyfi.
    Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .9 2508009 Samgöngustofa - Drónabann yfir hesthúsahverfi
    Erindi frá forstöðumanni menningar- og markaðsmála, hafnarstjóra og bæjarstjóra, þar sem óskað er umsagnar hjá skipulags- og umhverfisnefnd.

    Nokkur truflun hefur verið af drónaflugi frá ferðamönnum og hefur Hesteigendafélagið óskað eftir því að kannað verði hvort hægt sé að banna drónaflug staðbundið yfir hesthúsahverfinu, sbr. umræður á fundi fulltrúa hafnar og bæjar með stjórn Hesteigendafélagsins 7. júlí sl.
    Skipulags- og umhverfisnefnd - 270 Farið var yfir málið og útfærslur á slíku drónabanni. Á vinsælum ferðamannastöðum og á viðkvæmum stöðum má sjá merkingar um slíkt bann.

    Skipulags- og umhverfisnefnd gerir fyrir sitt leyti ekki athugasemd við að slíku banni verði komið á, og nái eftir atvikum yfir aðliggjandi svæði hestamanna.

    Bókun fundar Bæjarráð samþykkir samhljóða afgreiðslu skipulags- og umhverfisnefndar.

  • .10 2508013 Umsókn um byggingarheimild eða -leyfi - Hamrahlíð 7 - Flokkur 2
    Að ósk byggingarfulltrúa er lögð fyrir fundinn byggingarleyfisumsókn frá eigendum að Hamrahlíð 7.

    Samkvæmt teikningu verður útlitsbreyting og hærri þakhæð á útvegg sem stendur við lóðarmörk að Hamrahlíð 5. Einnig bætist við útgangur austast á húsinu, þ.e. þeirri hlið sem snýr að Hamrahlíð.

    Skipulags- og umhverfisnefnd - 270 Ekki er til deiliskipulag af svæðinu.

    Skipulags- og umhverfisnefnd felur skipulagsfulltrúa að grenndarkynna fyrirhugaða framkvæmd við breytingu hússins fyrir eigendum húsa í Hamrahlíð 2, Hamrahlíð 4 og Hamrahlíð 5, og Fossahlíð 2, Fossahlíð 4 og Fossahlíð 6, í samræmi við 44. gr. skipulagslaga.

     Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .11 2508007 Umsókn um byggingarheimild eða -leyfi - Gilósflöt 136911 - Flokkur 1
    Grundarfjarðarbær óskar eftir heimild fyrir staðsetningu tveggja gámaeininga (húseininga) sem verði nýttar sem aðstaða við íþróttavöll (salerni og bækistöð fyrir iðkendur, og sem áhaldageymsla fyrir íþróttir.

    Ekki er til deiliskipulag fyrir svæðið, en í skilmálum aðalskipulags fyrir ÍÞ-5 íþróttasvæði kemur fram:

    "Gert er ráð fyrir uppbyggingu sem nýtist til fjölbreyttrar íþróttaiðkunar. Gott aðgengi fótgangandi og hjólandi verði að svæðinu og frágangur vandaður. Möguleiki er á uppbyggingu nýrrar áhaldageymslu og/eða aðstöðuhúsi tengdu íþróttavelli og skíðasvæðinu sunnar á vegum Ungmennafélags Grundarfjarðar."
    Skipulags- og umhverfisnefnd - 270 Skipulags- og umhverfisnefnd telur að fyrirhugaðar einingar falli að skilmálum aðalskipulags og samþykkir fyrir sitt leyti þá staðsetningu sem sótt er um.

     Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .12 2503011 Fornir birkiskógar Hallbjarnareyri
    Á 267. fundi nefndarinnar þann 3. apríl sl. var tekin fyrir fyrirspurn frá Skógræktarfélagi Eyrarsveitar vegna hugmynda um birkiskógrækt í landi Hallbjarnareyrar. Landeigandi er ríkissjóður. Var skipulagsfulltrúa falið að ræða við hlutaðeigandi aðila.

    Signý vék af fundi undir þessum dagskrárlið.


    Skipulags- og umhverfisnefnd - 270 Skipulagsfulltrúi lagði fram minnispunkta um það sem fram hefur komið á fundi sem hann átti með fulltrúum Fjársýslunnar/Ríkiseigna, sem fer með málefni ríkisjarða, og í frekari samskiptum við Skógræktarfélag Eyrarsveitar.

    Með vísan í framlagða minnispunkta er erindinu vísað til afgreiðslu bæjarstjórnar.

    Signý tók aftur sæti sitt á fundinum.
     Bókun fundar Áður en ákvörðun er tekin um þetta mál, felur bæjarráð bæjarstjóra og skipulagsfulltrúa að óska eftir afstöðu Skógræktarfélagsins til þess sem fram kemur í meðfylgjandi minnispunktum um samtal skipulagsfulltrúa við FSRE, m.a. um umfang ræktunar og um girðingar, sem FSRE telur nauðsynlegar utan um skógrækt sem þessa.


  • .13 2505018 Umsókn um framkvæmdaleyfi vegna vegagerðar í landi Hamra
    Á 269. fundi skipulags- og umhverfisnefndar var tekin fyrir umsókn um framkvæmdaleyfi til vegagerðar í landi Hamra, þar sem sumarbústaðaland yrði tengt við þjóðveg sunnan vegar.

    Skipulagsfulltrúa var falið að gefa út framkvæmdaleyfi með fyrirvara um umsögn Vegagerðarinnar. Vegagerðin samþykkti fyrir sitt leyti að vegtenging yrði sett sunnan þjóðvegar í landi Hamra, en benti þó jafnframt á að samkvæmt veghönnunarreglum þyrftu hið minnsta að vera 400 metrar milli vegtenginga. Með vísan til þess yrði því ekki hægt að bæta við annarri vegtengingu síðar.
    Skipulags- og umhverfisnefnd - 270 Skipulagsfulltrúa er falið að ræða við hlutaðeigandi hagaðila (landeiganda jarðarinnar Hamra og mögulega fleiri) og gefa út framkvæmdaleyfi þegar samkomulag um staðsetningu vegtengingar sunnan þjóðvegar liggur fyrir.
    Bókun fundar Bæjarráð samþykkir samhljóða afgreiðslu skipulags- og umhverfisnefndar.
  • .14 2205033 Umhverfisrölt 2022-2026
    Árlegt umhverfisrölt bæjarstjórnar og skipulags- og umhverfisnefndar var haldið 24. og 25. júní sl., fyrra kvöldið með opnu húsi í Samkomuhúsinu og hins vegar með göngu um bæinn kvöldið eftir.

    Nokkrar ábendingar komu fram og rætt var almennt um verkefni bæjarins og umhverfi bæjarbúa.
    Skipulags- og umhverfisnefnd - 270 Skipulags- og umhverfisnefnd leggur til að Grundarfjarðarbær veiti í ár umhverfisviðurkenningar til lóðarhafa, í nokkrum flokkum, eins og gert var á árum áður.

    Nefndin vísar erindinu áfram til bæjarstjórnar.     Bókun fundar Bæjarráð þakkar nefndinni kærlega fyrir þessa góðu hugmynd og samþykkir samhljóða að veittar verði umhverfisviðurkenningar bæjarins í haust.
    Starfsfólki í skipulags- og umhverfismálum er falið að leggja upp og ákveða flokkun viðurkenninga og hrinda þessari hugmynd í framkvæmd ásamt nefndarmönnum.


  • .15 2410010 Stofnun götu neðan Grundargötu 12-28
    Framhald fyrri umræðu, um tillögur að götuheiti fyrir botnlanga ónefndrar götu sem liggur norðan Grundargötu 12-28. Hluti húsanna er með heimilisfang við Grundargötu en aðkomu frá botnlanganum. Málið var lagt til hliðar m.a. vegna yfirstandandi undirbúnings og skoðunar á nýrri landfyllingu á suðursvæði hafnar, sem gæti tengst umræddum götustubbi til suðurs.
    Skipulags- og umhverfisnefnd - 270 Skipulags- og umhverfisnefnd samþykkir einróma og leggur til við bæjarstjórn að gatan fái nafnið "Lengja" með skírskotun til samnefnds húss sem lengi stóð þarna við sjávarsíðuna.

    Bókun fundar Bæjarráð samþykkir samhljóða tillögu skipulags- og umhverfisnefndar um að gata þessi skuli heita Lengja.

  • .16 2201020 Önnur mál umhverfis- og skipulagssviðs
    Engin önnur mál komu fram. Skipulags- og umhverfisnefnd - 270