Beiðni um þriggja mánaða einkarétt á kostgæfnisathugun á lóð í eigu Grundarfjarðarbæjar

Skipulags- og umhverfisnefnd telur fyrir sitt leyti, að hér sé á ferðinni áhugaverð hugmynd sem vert sé að skoða, en að hún muni kalla á skipulagsbreytingar.

Nefndin vekur athygli á að um er að ræða umfangsmikið svæði, eins og það er afmarkað í erindinu, og telur að ekki liggi fyrir forsendur á þessu stigi, til að taka ákvörðun sem skuldbinda muni bæinn við kaup eða leigu á landinu í heild eða hluta.

Bæjarstjórn hefur farið yfir erindið og lýsir yfir eftirfarandi:

1. Grundarfjarðarbær mun ekki, næstu þrjá mánuði frá dagsetningu þessarar bókunar, eiga í samskiptum eða viðræðum við aðra aðila um það svæði sem vísað er til í beiðninni varðandi kaup eða leigu eða samþykkja skipulagsbreytingar á svæðinu sem gætu breytt forsendum verkefnisins.

2. Grundarfjarðarbær er ekki reiðubúinn að skuldbinda sig til viðræðna um kaup eða leigu á landinu í heild eða hluta á þessu stigi.

Framangreint felur hvorki í sér samþykki á greiðsluþátttöku bæjarstjórnar eða loforð um kauprétt á því svæði sem erindið tekur til.

Farið yfir spurningar í framlögðu erindi, m.t.t. afstöðu bæjarstjórnar til þeirra.

Lagt til að fulltrúar bæjarins hitti málsaðila á fundi fljótlega.

Samþykkt samhljóða.

Bæjarráð ræddi málið við lögmanninn. Bæjarstjóra falið umboð til að vinna áfram að málinu og undirbúa gerð viljayfirlýsingar á þeim forsendum sem ræddar voru á fundinum.

Samþykkt samhljóða.

Málið er í vinnslu.

Björg bæjarstjóri og Sigurður Valur skipulagsfulltrúi sögðu frá fundi sem þau sátu í gær, 12. maí, í Grundarfirði, með fjárfesti í þessu máli, í framhaldi af fyrri samskiptum, ásamt tengiliðunum tveimur sem hófu þetta verkefni.

Halldór Jónsson lögmaður fór yfir stöðu málsins og gerð viljayfirlýsingar, í samræmi við það sem áður hefur verið rætt. Þar kæmi fram að skoðað hve stórt land þyrfti undir verkefnið, helgunarsvæði þar í kring o.þ.h.

Rætt um málið, allir tóku til máls.

Bæjarstjórn er einhuga um að staðfesta vilja bæjarins til þess að taka verkefnið áfram.
Bæjarstjórn felur bæjarstjóra og lögmanni bæjarins að stilla upp sameiginlegri viljayfirlýsingu (skilmálaskjali) í samræmi við umræður fundarins, og ljúka gerð sameiginlegrar viljayfirlýsingar í samráði við fjárfestinn.

Á fundinum var rætt um hvort rétt væri að kynna málið opinberlega. Halldór Jónsson lögmaður taldi ekki rétt að kynna aðila verkefnisins opinberlega á þessu stigi nema með samþykki þeirra.

Bæjarstjórn felur lögmanni jafnframt að útbúa minnispunkta um málið, sem verði grunnur að fundargerð og fylgiskjal.

Samþykkt samhljóða.

Á fundi bæjarstjórnar 13. maí sl. kom bæjarstjórn saman til umræðu um frágang viljayfirlýsingar, sem hún fól lögmanni og bæjarstjóra að ganga frá.

Yfirlýsingin lögð fram til kynningar, en bæjarstjóri hefur umboð til undirritunar.

Til máls tóku AJ og JÓK.

Bæjarstjórn tekur málið upp til umræðu og felur bæjarráði, í umboði bæjarstjórnar í sumarleyfi hennar, að kynna sér málið og leggja mat á framhald þess, í samráði við Halldór Jónsson, lögmann bæjarins.

Samþykkt samhljóða.