Málsnúmer 2604021

Vakta málsnúmer

Bæjarráð - 655. fundur - 05.05.2026

Lögð fram beiðni sýslumanns um umsögn um umsókn um rekstrarleyfi fyrir íbúð að Grundargötu 12B.



Einnig lagt fram minnisblað lögmanns bæjarins um málið og nýlega breytingu á lögum sem málið varðar.



Aflað var ráðgjafar lögmanns, í ljósi þeirra lagabreytinga sem gerðar voru á lögum um veitingastaði, gististaði og skemmtanahald í apríl 2024, en kanna þarf betur réttarstöðuna hvað varðar útgáfu gistileyfis á þessu svæði.

Bæjarstjóra falið að skoða nánar með lögmanni.

Bæjarráð - 656. fundur - 22.05.2026

Lagður fram tölvupóstur f.h. umsækjanda, frá 18. maí sl., þar sem skorað er á bæinn að veita jákvæða umsögn - en sýslumaður hefur nú til meðferðar umsókn umsækjanda um rekstrarleyfi vegna gistingar í íbúðarhúsnæði, og er bæjarstjórn einn af umsagnaraðilum.



Beiðni sýslumanns um umsögn var áður tekin fyrir á fundi bæjarráðs 5. maí sl. og bókað að skoða ætti málið nánar með lögmanni í ljósi lagabreytinga sem gerðar voru á lögum um veitingastaði, gististaði og skemmtanahald í apríl 2024. Samkvæmt þeim lögum er ekki lengur unnt að veita rekstrarleyfi eða jákvæða umsögn um það, nema viðkomandi húsnæði sé skráð atvinnuhúsnæði í fasteignaskrá HMS. Svo er ekki í þessu tilviki og var umsækjanda leiðbeint um breytingu á skráningu, væri áhugi fyrir að fara þá leið.



Bæjarráð áréttar fyrri afgreiðslu sína sem byggir á því að nýlegar lagabreytingar koma í veg fyrir að sveitarstjórnir geti veitt jákvæðar umsagnir nema skráning húsnæðis sé rétt - þ.e. að húsnæði sé skráð sem atvinnuhúsnæði. Afgreiðsla bæjarráðs er í samræmi við afgreiðslur annarra sveitarfélaga, eftir að lögin breyttust að þessu leyti.

Bæjarráð áréttar þær leiðbeiningar sem gefnar voru til umsækjanda með tölvupóstum 8. maí og 15. maí sl. þar sem bent var á að það heyri undir hlutverk byggingarfulltrúa að leiðbeina um þau atriði sem hér um ræðir.

Hvað varðar það atriði að skorað sé á bæinn að veita, þrátt fyrir þetta, jákvæða umsögn, þá er það bæjarstjórn sem er umsagnaraðili og er erindi þessu því samhliða vísað til verðandi forseta bæjarstjórnar, Fannars Þórs Þorfinnssonar hvað varðar afgreiðslu þeirrar áskorunar.

Samþykkt samhljóða.

Bæjarstjórn - 313. fundur - 11.06.2026

Fyrir liggur beiðni Sýslumannsins á Vesturlandi um umsögn bæjarstjórnar um umsókn Jónu Bjarkar Ragnarsdóttur um rekstrarleyfi til reksturs gististaðar í flokki II, íbúðir, sem rekið verður sem Íbúð Jónu að Grundargötu 12B, Grundarfirði.



Skv. breytingu á lögum þarf húsnæði, í dag, að vera skráð sem atvinnuhúsnæði, til að unnt sé að veita rekstrarleyfi (sýslumaður) og jákvæða umsögn (bæjarstjórn).



Fyrir liggur minnisblað lögmanns bæjarins um lagabreytinguna og afleiðingar hennar.



Málið var á dagskrá bæjarráðs 5. maí, staðfest í bæjarstjórn 12. maí sl.



Í framhaldi af því voru veittar leiðbeiningar til umsækjanda, um að sækja þurfi um breytingu á skráningu íbúðar í atvinnuhúsnæði, eigi að vera kostur á að veita leyfið (sýslumaður) og jákvæða umsögn (bæjarstjórn), skv. þeim lögum sem hér gilda.



Fulltrúi umsækjanda hefur skorað á bæjarstjórn að veita þrátt fyrir þetta jákvæða umsögn til sýslumanns um málið og var sú beiðni tekin fyrir 22. maí sl. í bæjarráði.



Í samræmi við afgreiðslu bæjarráðsins 22. maí sl. er þessi áskorun lögð fyrir nýja bæjarstjórn til að taka afstöðu til.

Til máls tóku AJ og JÓK, SG og BS.

Bæjarstjórn getur ekki tekið afstöðu í þessu máli fyrr en skráningu íbúðar sem atvinnuhúsnæðis er lokið.

Samþykkt samhljóða.