Bæjarráð

Heimsókn í slökkvistöðina, Borgarbraut 16.

Valgeir Þ. Magnússon slökkviliðsstjóri tók á móti bæjarráðsfulltrúum í slökkvistöðinni. Hann sýndi húsnæðið, en aðstaða liðsins nær nú yfir alla neðri hæðina á Borgarbraut 16. Til stendur að bæta aðstöðu til að geyma búninga slökkviliðsmanna. Hirslur munu færast yfir í austurhluta hússins og verða þá ekki lengur í sama rými og slökkvibílarnir, einnig mun hver og einn fá sinn sérstaka skáp eða hólf.
Rætt um loftpressu sem þarf að endurnýja, um hvaða möguleikar séu fyrir hendi þegar kemur að því að velja og kaupa nýjan slökkvibíl, um samstarf slökkviliða o.fl.

Valgeiri var þakkað fyrir móttökurnar og haldið í næstu heimsókn.

---

Heimsókn í þjónustumiðstöð, Nesvegi 19, sem hýsir áhaldahús og eignaumsjón.

Þar tóku á móti bæjarráði þau Elvar Þór Gunnarsson, bæjarverkstjóri, Bergvin Sævar Guðmundsson, eignaumsjónarmaður og Halldóra Dögg Hjörleifsdóttir starfsmaður þjónustumiðstöðvar.

Rætt var um helstu verkefni, um tæki og tækjakaup og fleira. Ný Avant 860 vinnuvél var keypt á árinu, gamli Avant-inn er þó enn óseldur. Keypt voru rafmagnssláttuorf og ný sláttuvél sl. vor. Rætt var um umbætur á lóð áhaldahússins, en í sumar var plan norðan og austan við húsið malbikað.

Að lokum var starfsmönnum þjónustumiðstöðvar þakkað fyrir móttökurnar og samtalið.

---

Heimsókn í Leikskólann Sólvelli, Sólvöllum 1.

Þar tók á móti bæjarráði Heiðdís Lind Kristinsdóttir, skólastjóri Sólvalla.
Í leikskólanum eru nú 32 börn. Heiðdís sagði frá starfseminni og sýndi aðstöðuna, einkum þær breytingar sem orðið hafa á árinu.

Farið var í nýja gróðurhúsið sem kom í júní sl., þar er ýmislegt ræktað en einnig eru gróðurkassar úti. Einnig eru komnar fjórar hænur í hluta gróðurhússins og hafa þær sitt eigið útisvæði. Skoðaðar voru umbætur sem fóru fram á lóð leikskólans sl. sumar. Nýjar rólur voru settar upp, á nýjum stað, nýr sandkassi byggður á nýjum stað, lögð var malbikuð hjólabraut í stóra garðinn og málaðar á hana umferðarmerkingar, auk þess sem girðing og leiktæki voru máluð.

Að því búnu var farið inn í leikskólann og sýndi leikskólastjóri þær breytingar sem gerðar hafa verið á húsi og aðstöðu. Nefna má ný gólfefni í eldhúsi og inná drekadeild, ný föndurstofa útbúin á drekadeild, keypt voru og sett upp salerni í stærð/hæð barnanna á drekadeild, og skemmtilegar myndskreytingar gerðar á veggi. Síðar í október er von á nýjum gardínum og nýrri útihurð með sjálfvirkri opnun í aðalinngangi.

Verið er að skoða hvernig nýta megi anddyri og fatageymslu betur.

Heiðdísi var í lokin þakkað fyrir móttökuna og upplýsingar.