Skipulags- og umhverfisnefnd

Í samræmi við breyttar forsendur og fyrrnefnda ákvörðun bæjarstjórnar 26. febrúar sl. er nú hafin vinna við gerð breyttrar deiliskipulagstillögu hafnarsvæðisins. Í samræmi við tillögu hafnarstjórnar þann 24. febrúar, sem samþykkt var af bæjarstjórn, er gert ráð fyrir að áfram sé "unnið að nýjum neðanbyggðarvegi og viðlegukanti, enda tekur mörg ár að tryggja stuðning fyrir fjárhagshlut ríkisins í slík mannvirki" eins og segir í bókun hafnarstjórnar.

Farið var yfir forsendur og helstu breytingar, sem vilji er til að gera á tillögu að deiliskipulagi Grundarfjarðarhafnar, í samræmi við samþykkt bæjarstjórnar.

Áfram er gengið út frá því að nýr vegur komi sem tengi hafnarsvæðið (norðurhluta) við þjóðveginn, austan Gilóss. Einnig er gert ráð fyrir að nýr viðlegukantur komi meðfram landfyllingu eins og í fyrri tillögu, en það er í samræmi við óskir hafnarstjórnar um að falla frá lengingu Miðgarðs sem viðbótarviðlegu fiskiskipa. Viðlegukantur við landfyllingu er talinn betri kostur en lenging Miðgarðs, skv. ráðgjöf Vegagerðarinnar (hafnasvið), m.t.t. áhrifa á hafnaraðstæður.

Helstu breytingar sem ræddar voru á fundinum og unnið verður að eru eftirfarandi:

- Ný landfylling sunnan Miðgarðs verði minnkuð sjávarmegin
- Lóðum á þeirri landfyllingu verði fækkað frá fyrri tillögu
- Svæði kringum Gilós stækkar og breytist talsvert
- Skoðað verði fyrirkomulag lóða austan Gilóss/við Suðurgarð, sem og fremstu lóð sunnan Gilóss (nr. 6 í tillögu) og skerpt á skilmálum þeirra. Þar verði áfram lögð áhersla á aðlaðandi og snyrtilega ásýnd, og að lóðirnar séu ætlaðar fyrir þjónustu, sbr. þegar kynnta skilmála.
- Breyting verði gerð á lóðum á landfyllingu næst Grundargötu, endurskoðaðar verði stærðir og lóðarmörk.

Fleiri atriði nefnd og rædd, en framangreindar eru þær forsendur sem lagðar eru til grundvallar í vinnu við gerð breyttrar deiliskipulagstillögu.

Formaður ber upp tillögu um að vinna við breytta deiliskipulagstillögu muni byggja á þessum forsendum. Samþykkt með fjórum atkvæðum nefndarmanna, ÁEK situr hjá.
Aðrir gestir fundarins, bæjarfulltrúar og hafnarstjórn, lýstu sig ennfremur samþykka þessum forsendum.

Skipulagsfulltrúa falið að vinna áfram að undirbúningi breyttrar tillögu á þessum forsendum.