Grundarfjarðarhöfn - Deiliskipulag suðurhluta hafnarsvæðis

Í verkefninu felst að gera deiliskipulag fyrir nýtt þróunarsvæði Grundarfjarðarhafnar, þ.e. stækkun hafnarsvæðisins sunnan Miðgarðs yfir að Suðurgarði og að honum meðtöldum. Einnig fyrir svæði í kringum hafnarvog og hafnarhús, þar sem einnig er tekið á móti ferðafólki. Gert er ráð fyrir vegi eftir landfyllingunni, sem tengir hafnarsvæði (norður) við þjóðveginn austan við þéttbýlið. Þessi áform eru í samræmi við gildandi aðalskipulag.

Halldóra fór yfir verkefnistillöguna. Ennfremur fór hún yfir framlagða tillögu að skipulagslýsingu fyrir deiliskipulagið og gerði grein fyrir hvernig deiliskipulagstillagan, ásamt umhverfismati hennar, verður unnin. Farið var yfir fyrirkomulag á samráði og kynningu.

Fyrir liggur fohönnun Vegagerðarinnar að stækkun hafnarsvæðisins með nýjum bryggjukanti, sunnan Miðgarðs. Byggt verður m.a. á þeirri forhönnun, á fyrirliggjandi deiliskipulagsforsögn fyrir svæðið og á niðurstöðum úr vinnu sem fram hefur farið síðustu mánuði.

Samkvæmt 3. gr. hafnarreglugerðar fyrir Grundarfjarðarhöfn gerir hafnarstjórn tillögur til bæjarstjórnar um skipulagsmál á hafnarsvæðinu, enda hafi tillögurnar fengið umfjöllun skipulagsnefndar.

Hafnarstjórn samþykkir framlagða verkefnistillögu. Hafnarstjórn samþykkir einnig framlagða skipulagslýsingu deiliskipulagsins og leggur til við skipulags- og umhverfisnefnd og bæjarstjórn að hún verði samþykkt til auglýsingar skv. 40. gr. skipulagslaga.

Hafnarstjórn felur hafnarstjóra, í samvinnu við skipulagsfulltrúa, að vinna áfram að verkefninu.

Halldóra fór yfir verkefnistillöguna. Ennfremur fór hún yfir framlagða tillögu að skipulagslýsingu fyrir deiliskipulagið. Hún gerði einnig grein fyrir hvernig deiliskipulagstillaga, ásamt umhverfismati hennar, verður unnin. Farið var yfir fyrirkomulag á samráði og kynningu.

Fyrir liggur forhönnun Vegagerðarinnar að stækkun hafnarsvæðisins með nýjum bryggjukanti, sunnan Miðgarðs. Byggt verður m.a. á þeirri forhönnun, á fyrirliggjandi deiliskipulagsforsögn fyrir svæðið og á niðurstöðum úr vinnu sem fram hefur farið síðustu mánuði.

Skipulags- og umhverfisnefnd samþykkir fyrir sitt leyti framlagða verkefnistillögu. Nefndin samþykkir einnig framlagða skipulagslýsingu og leggur til við bæjarstjórn að hún verði samþykkt til auglýsingar skv. 40. grein skipulagslaga. Ennfremur er skipulagsfulltrúa falið að vinna áfram að verkefninu í samstarfi við hafnarstjóra.

Herborg Árnadóttir og Halldóra Hreggviðsdóttir, skipulagsráðgjafar frá Alta, eru í fjarfundi undir þessum lið. Herborg fór yfir tillöguna og rætt var um hana.

Skipulags- og umhverfisnefnd samþykkir að mörkum skipulagssvæðisins verði breytt í samræmi við framangreint og að hluti af „Deiliskipulagi Framness austan Nesvegar“ (mál 2301003) sameinist deiliskipulagi suðurhluta hafnarsvæðisins undir breyttu heiti, þ.e. Deiliskipulag Grundarfjarðarhafnar.

Jafnframt samþykkir nefndin fyrir sitt leyti framlagða skipulagslýsingu og leggur til við bæjarstjórn að hún verði samþykkt til auglýsingar skv. 40. gr. skipulagslaga.

Ennfremur er skipulagsfulltrúa falið að vinna áfram að verkefninu, í samstarfi við hafnarstjóra.

Fulltrúar úr hafnarstjórn, Arnar og Björg, styðja þessa tillögu.

Farið var yfir drög að deiliskipulagi á vinnslustigi til rýni.
Góðar umræður voru á fundinum.

Hafnarstjórn var almennt sátt við drögin en bað um eftirfarandi breytingar:

- Að sleppa landfyllingu austan við Suðurgarð. Sú stækkun kallaði á meiri skoðun og mögulega samþættingu við enn frekari stækkun til framtíðar. Verði landfyllingin stækkuð geti lóðin austan við Suðurgarð verið til trafala.
- Skoða þurfi vel samþættingu við aðliggjandi lóðir við Grundargötu.
- Sameina skuli 4 lóðir við Miðgarð og nýja hafnarbakkann í tvær.
- Taka skuli bílastæði við Norðurgarð.

Auk þess var farið yfir örfá atriði til viðbótar sem Alta mun lagfæra.

Niðurstaða fundar:

- Hafnarstjórn samþykkir að senda Deiliskipulag Grundarfjarðarhafnar með framangreindum lagfæringum til skipulags- og umhverfisnefndar og leggur til að nefndin taki það til kynningar á vinnslustigi skv. 40. gr. skipulagslaga, á fund nefndarinnar 10. nóvember. Í framhaldi verði vinnslutillagan lögð fyrir bæjarstjórn til samþykktar til auglýsingar.
- Haldnir verði tveir samráðsfundir 17. nóvember um vinnslutillöguna. Sá fyrri með fulltrúum úr atvinnulífinu og sá síðari með íbúum.
- Ráðgjafar taka saman hagaðilagreiningu vegna samráðsfundanna í samstarfi við hafnarstjórn, bæjarstjóra, skipulagsfulltrúa, verkefnisstjóra skipulags- og umhverfismála og forstöðumann menningar- og markaðsmála.

Herborg Árnadóttir og Halldóra Hreggviðsdóttir, skipulagsráðgjafar hjá Alta eru gestir fundarins í fjarfundi undir dagskrárliðum 1, 2 og 3 vegna hafnarinnar. Auk þess sitja fundinn undir sömu dagskrárliðum bæjarfulltrúarnir Sigurður Gísli Guðjónsson, í fjarfundi, og Garðar Svansson, sem jafnframt er fulltrúi í hafnarstjórn.

Skipulags- og umhverfisnefnd hefur farið yfir framkomnar umsagnir. Ekki er þörf á að svara umsögnum sem berast við skipulagslýsinguna. Umsagnir voru hins vegar nýttar við frekari mótun fyrirliggjandi tillögu að deiliskipulagi á vinnslustigi, sbr. næsta dagskrárlið.

Umsögn Skipulagsstofnunar hefur ekki borist en það kemur þó ekki í veg fyrir afgreiðslu málsins að mati skipulags- og umhverfisnefndar, þar sem hægt verður bregðast við ábendingum Skipulagsstofnunar við gerð endanlegrar skipulagstillögu til auglýsingar skv. 41. gr. skipulagslaga.

Skipulags- og umhverfisnefnd hefur fjallað um tillöguna og leggur til við bæjarstjórn að hún samþykki að vinnslutillagan verði auglýst skv. 40. gr. skipulagslaga.

Mánudaginn 17. nóvember nk. eru fyrirhugaðir þrír kynningar- og samráðsfundir um Deiliskipulag Grundarfjarðarhafnar á vinnslustigi; opinn fundur með íbúum og öðrum áhugasömum, opinn fundur með fulltrúum fyrirtækja og atvinnulífs og auk þess sérstakur fundur með eigendum húsa sem liggja að fyrirhugaðri landfyllingu og nýrri vegtengingu innan deiliskipulagssvæðisins sunnanverðs.

Rætt var um heiti á nýrri götu, sem einnig er væntanlegur þjóðvegur sem vegtenging við hafnarsvæðið. Skipulags- og umhverfisnefnd leggur til að hafnarstjórn verði falið að finna heiti á nýju götuna, enda liggur hún um hafnarsvæðið.

Hafnarstjórn fór yfir framlögð gögn með skipulagsráðgjafa og skipulagsfulltrúa.

Hafnarstjórn ræddi um útfærslur í skipulaginu og bætti við atriðum inní lista yfir "tillögur að áherslum og mögulegum breytingum".

Hafnarstjórn leggur til að fulltrúar úr skipulags- og umhverfisnefnd, bæjarfulltrúar og hafnarstjórn, hittist á vinnufundi um tillögugerðina, eftir að auglýsingatíma og umsagnarfresti um vinnslutillöguna lýkur, þ.e. eftir 1. des. nk. Tillaga um dagsetningu er mánudaginn 8. desember nk., fyrir fund skipulags- og umhverfisnefndar sem haldinn verður þann dag.

Ennfremur stefnir hafnarstjórn að því að hittast á fundi 2. desember nk. til undirbúnings og rýna þarfir á hafnarsvæði og útfærslur í skipulagstillögu. Þá munu einnig liggja fyrir allar umsagnir/athugasemdir um vinnslutillöguna.

Bæjarráð tekur undir tillögu hafnarstjórnar um að koma á sameiginlegum fundi skipulags- og umhverfisnefndar, hafnarstjórnar og bæjarfulltrúa þann 8. desember nk.

Hafnarstjórn fór yfir framlögð gögn með skipulagsráðgjafa.

Farið lauslega yfir þær umsagnir og athugasemdir sem bárust, en helstu skilaboðin verða tekin saman í yfirlit fyrir fund skipulags- og umhverfisnefndar 8. des. nk.

Hafnarstjórn ræddi um helstu efnisatriði í skipulagstillögu, s.s. um fjölda og stærð lóða, fyrirkomulag þeirra og skilmála, um þarfir á hafnarsvæði, um tilhögun vegar og fleira.

Vinna þessa fundar verður nýtt til frekari útfærslu skipulagstillögu.

Mánudaginn 8. desember nk. er stefnt að sameiginlegri umræðu hafnarstjórnar, bæjarfulltrúa og skipulags- og umhverfisnefndar um þetta mál, og verður það hluti af dagskrá fundar skipulags- og umhverfisnefndar.

Fundinn sitja Jósef Ó. Kjartansson forseti bæjarstjórnar, Arnar Kristjánsson fulltrúi í hafnarstjórn, Garðar Svansson, fulltrúi í hafnarstjórn og bæjarfulltrúi, Hafsteinn Garðarsson hafnarstjóri og Pálmi Jóhannsson forstöðumaður menningar- og markaðsmála, sem einnig vinnur fyrir Grundarfjarðarhöfn, en hann sat í fjarfundi.

Halldóra Hreggviðsdóttir og Herborg Árnadóttir skipulagsráðgjafar hjá Alta eru gestir fundarins í fjarfundi.

---

Farið var yfir umsagnir og athugasemdir sem bárust í Skipulagsgátt og einnig vísað í umræður á samráðsfundum.
Ekki er nauðsynlegt að bregðast formlega við ábendingum á þessu skipulagsstigi, þar sem tillagan var kynnt á vinnslustigi, en þær verða nýttar við áframhaldandi mótun deiliskipulagsins.

Einnig er greint frá fundi með fulltrúum Vegagerðarinnar 1. des. sl. Vegagerðin er sátt við legu vegarins og hönnun gatnamótanna við þjóðveg. Fram kom að Vegagerðin vill að beygjuhornið sé 90° eins og það er á tillögunni og telur forhönnun á uppdráttum uppfylla hönnunarskilyrði varðandi legu, breidd vegar og beygjuradíusa. Nýr þjóðvegur liggi frá Snæfellsnesvegi að Hafnartorgi.

Skipulagsfulltrúi og hafnarstjóri greindu frá fundi og samskiptum við lóðarhafa á Norðurgarði D.

Einnig er greint frá tveimur fundum hafnarstjórnar o.fl. og hver talin eru meginviðfangsefni í næstu skrefum skipulagsferlisins.

Bæjarstjóri/formaður hafnarstjórnar spurði í upphafi umræðu hvort fundarmenn teldu viðbrögð og þær athugasemdir sem borist hafa vera þess eðlis að rétt sé að stöðva eða gera hlé á þessari skipulagsvinnu. Samhljómur var meðal fundarmanna um að halda ætti skipulagsgerðinni áfram og þó bregðast þurfi við mörgum þeirra ábendinga sem borist hafa, þá séu þær ekki þess eðlis að þær eigi að stöðva skipulagsgerðina.

Ræddar voru ábendingar sem fram komu, á samráðsfundum og í athugsemdum íbúa, um að kanna ætti valkost um nýjan hafnargarð norðan við Norðurgarð, fyrir fiskiskip, frekar en þá landfyllingu og nýjan viðlegukant sem vinnslutillagan gerir ráð fyrir. Bent var á mikið dýpi á þessu svæði og að uppland fyrir slíkt mannvirki sé ekki til staðar. Aldrei hefur verið gert ráð fyrir slíku mannvirki í aðalskipulagi. Skipulagsráðgjafi leggur til að komið verði inná þetta atriði í umhverfismati tillögu.

Rætt var um skilmála lóða og einstakar lóðir. Engin teljandi gagnrýni hefur komið fram á nýjan þjóðveg eða legu hans. Vegagerðin vill skoða fækkun innakstursleiða á lóðir, frá nýja veginum.

Rætt var um lækkun hæðar húsa á hluta lóðanna. Einnig var rætt um að fækka metralóðunum og/eða breyta þeim. Hafnarstjórn hefur lagt til að á nyrsta hluta núverandi metralóða verði gerð lóð nr. 13, svipuð að stærð og lóðir nr. 15 og 17.

Einnig var rætt um að gefa Gilósnum meira rými við Grundargötu og skera af lóð nr. 6 og áfram niður að sjó. Svæðið sem núna er undir lóðir 1-5 gæti hentað vel undir ferðaþjónustu með tengingu við Suðurgarðinn og Gilósinn og rætt um fordæmi að uppbyggingu í öðrum höfnum, með mögulega minni lóðum.

Rætt um þá áherslu að verið sé að gera hafnarskipulag. Sýn um uppbyggingu á þessu svæði hafi verið í skipulagi síðan 1969. Þetta sé dýrt svæði í uppbyggingu og þessi stækkun sé nauðsynleg til að geta nýtt betur þá fjárfestingu sem lögð hefur verið í uppbyggingu hafnaraðstöðu á síðustu árum með stækkun Norðurgarðs og verði haldið áfram með uppbyggingu nýs garðs á landfyllingunni. Með þessu sé verið að styrkja atvinnustarfsemi í Grundarfirði. Tækifæri opnist til að bjóða nýjum fyrirtækjum aðstöðu á þessu mikilvæga svæði. Uppbygging íbúðarhúsnæðis á landfyllingunni henti ekki í bland við þá starfsemi sem þarna muni verða. Bærinn eigi aðrar hentugri lóðir fyrir slíkt.
Setja þurfi skýra skilmála í deiliskipulagið um leiðir til að tryggja aðlaðandi ásýnd að þessari stækkun hafnarsvæðisins, sem er um leið ásýnd að bænum.

Hafnarstjóri vill leiðrétta rangar upplýsingar sem komu fram á íbúafundum um hæð húss að Borgarbraut 1, en þar var sagt það væri tíu metra hátt. Rétt hæð er 12 metrar.

Rætt um framsetningu gagna. Hluti af vinnu við gerð skipulagstillagnanna sjálfra (næsta stig) er að gera góðar ásýndarmyndir og tryggja einnig að byggingarreitir og nýtingarhlutfall lóða séu greinileg á uppdráttum.

Sérstaklega var rætt um þær góðu ábendingar sem fram komu á samráðsfundunum, um lóðir og hús sem ekki eru í markvissri notkun eða hafa lokið upphaflegu hlutverki sínu á og við hafnarsvæðið. Ábendingar komu þar fram um að hvetja þurfi eða ýta á lóðarhafa/húseigendur að losa um slík mannvirki og nýta þau og lóðir betur til uppbyggingar atvinnustarfsemi í Grundarfirði.

Þessum lið var lokið kl. 15:35 og gestir yfirgáfu þá fundinn.

Halldóra Hreggviðsdóttir og Herborg Árnadóttir skipulagsráðgjafar hjá Alta eru gestir fundarins undir þessum lið, í fjarfundi.

Herborg fer yfir hugmyndir að frekari breytingum sem skoðaðar hafa verið til að koma til móts við athugasemdir sem komið hafa fram og sýnir hvernig þær gætu litið út. Meðal annars farið yfir vegtengingu við hafnarsvæði austan landfyllingar, lækkað nýtingarhlutfall og byggingarmagn á lóðum númer 6-14, hætt er við metralóðir og þess í stað komnar minni lóðir frá 7-17 en mögulega með heimild til sameininga þeirra. Þá er búið að auka svæðið umhverfis Gilós. Rætt um göngustíg eftir Lengju og lagt til að setja kvöð um samræmt útlit á suðurenda lóða við hann. Rætt um útlit og hönnun.

Rætt er um hugmyndir sem fram komu um að áfangaskipta landfyllingunni. Hafnarstjóri greinir frá samtölum við Vegagerðina þar sem niðurstaðan varð að það sé ekki raunhæft verklag vegna stóraukins kostnaðar.

Björg greinir frá fundi sem hún átti með einum húseiganda við Grundargötu. Hún leggur til að haldinn verði annar lokaður fundur með eigendum fasteigna í Gröf og á norðanverðri Grundargötu við skipulagssvæðið til samtals og skýringa og var það samþykkt.

Skipulagsfulltrúa falið að vinna áfram ásamt hafnarstjórn að útfærslu á deiliskipulagstillögu.

Tillögur verða aftur teknar fyrir hjá skipulags- og umhverfisnefnd áður en þær verða lagðar fram til auglýsingar.

Herborg Árnadóttir og Halldóra Hreggviðsdóttir, skipulagsráðgjafar hjá Alta eru gestir fundarins í fjarfundi undir þessum lið. Auk þess sitja fundinn hafnarstjóri og hafnarstjórn.

Farið yfir umræður og sjónarmið sem fram komu á fundum sem efnt var sérstaklega til með húseigendum við neðanverða Grundargötu, frá nr. 4-28, og í Gröf I-IV. Fyrir fundi 4. og 5. febrúar sl. voru kynnt drög í vinnslu sem gerðar höfðu verið á ýmsar breytingar frá vinnslutillögu.

- Byggingarmagn á lóðum sem eru næst Grundargötu hefur verið minnkað um 20%.
- Lóðir næst Grundargötu hafa verið minnkaðar og lóðir ná ekki eins langt að Gilósi og í vinnslutillögu.
- Hámarkshæð bygginga á þessum lóðum var lækkuð úr 7,5 í 7 metra.
- Á svæði sjávarmegin við tilvonandi nýja götu hafa metralóðir verið teknar út.
- Lóðarmörkum breytt á lóðum næst nýjum viðlegukanti.
- Gilósinn fær nú mun rýmra grænt svæði.
- Lóðir sunnan Gilóss, við smábátahöfn, hafa verið betur skilgreindar og skilmálum þeirra breytt.
- Lóðarmörkum á lóðum á Norðurgarði hefur verið breytt og þær færðar frá grjótvörn á grunni tilmæla frá Vegagerðinni um aðgengi. Þar er einnig lagnasvæði fyrir neðanjarðarlagnir.
- Settir hafa verið skýrari skilmálar varðandi aðlaðandi ásýnd og frágang frá lóðum við Grundargötu að iðnaðarsvæði og göngustíg þar á milli gert hærra undir höfði hvað varðar umhverfisfrágang.
- Göngustígur á milli iðnaðarsvæðis og húsa við Grundargötu verði akfær og akstur heimill fyrir húseigendur, gesti og viðhald á þeim hluta stígsins sem tekur við til suðurs, þegar götu sleppir.


Óskað er eftir fleiri skýringarmyndum í deiliskipulagstillöguna, þar á meðal ásýndarmyndum og betri hæðarmerkingum. Rætt um hugsanlega ljósmengun frá þungaflutningum þegar keyrt er af hinni nýju götu og uppá þjóðveg 54.

Rætt um áhyggjur af frágangi og fráleggi lausafjármuna á iðnaðarlóðum á landfyllingu og skilmálagerð þar að lútandi. Rætt um forgangsröðun við uppbyggingu svæðisins.
Rætt er um vegalengdir. Fram kemur að fjarlægð núverandi íbúðarhúsa við Grundargötu að byggingarreitum sem lagðir eru til sé á bilinu 27-32 metrar. Þá eru 142 metrar frá mörkum núverandi lóða við Grundargötu að sjóvarnargarði áformaðrar landfyllingar.

Skipulagsfulltrúi leggur áherslu á það í lok umræðu að enn sé hægt að breyta deiliskipulagstillögunni eftir að auglýsingatíma lýkur. Góðar ábendingar hafi komið fram á fundi með íbúum og á þessum fundi nefndarinnar.

Samhljómur er meðal fundarmanna um að halda skipulagsgerðinni áfram, en áfram verði leitað leiða til að bregðast við ábendingum og draga úr grenndaráhrifum þeirra sem eiga fasteignir næst landfyllingunni.

Formaður leggur til að skipulagsfulltrúi, að fengnu samþykki hafnarstjórnar og staðfestingar bæjarstjórnar, fái umboð til að auglýsa tillögu að nýju deiliskipulagi Grundarfjarðarhafnar í samræmi við 41. gr. skipulagslaga nr. 123/2010, að teknu tilliti til framkominna ábendinga í umræðum nefndarinnar varðandi viðbótarskýringarmyndir. Skilmálum verði ekki breytt. Var það samþykkt samhljóða.

Hafnarstjórn vísar í bókun um málið í fundargerð 275. fundar skipulags- og umhverfisnefndar, sem haldinn var í gær, 9. febrúar 2026. Hafnarstjórn og hafnarstjóri voru gestir á þeim fundi og tóku þátt í umræðu um þetta mál.

Hafnarstjórn samþykkir fyrir sitt leyti og leggur til við bæjarstjórn að auglýst verði framlögð tillaga að nýju deiliskipulagi Grundarfjarðarhafnar, í samræmi við 41. gr. skipulagslaga nr. 123/2010, að teknu tilliti til ábendinga í umræðum skipulags- og umhverfisnefndar um viðbótarskýringarmyndir.

Samþykkt samhljóða.

Samþykkt samhljóða.

Í samræmi við breyttar forsendur og fyrrnefnda ákvörðun bæjarstjórnar 26. febrúar sl. er nú hafin vinna við gerð breyttrar deiliskipulagstillögu hafnarsvæðisins. Í samræmi við tillögu hafnarstjórnar þann 24. febrúar, sem samþykkt var af bæjarstjórn, er gert ráð fyrir að áfram sé "unnið að nýjum neðanbyggðarvegi og viðlegukanti, enda tekur mörg ár að tryggja stuðning fyrir fjárhagshlut ríkisins í slík mannvirki" eins og segir í bókun hafnarstjórnar.

Farið var yfir forsendur og helstu breytingar, sem vilji er til að gera á tillögu að deiliskipulagi Grundarfjarðarhafnar, í samræmi við samþykkt bæjarstjórnar.

Áfram er gengið út frá því að nýr vegur komi sem tengi hafnarsvæðið (norðurhluta) við þjóðveginn, austan Gilóss. Einnig er gert ráð fyrir að nýr viðlegukantur komi meðfram landfyllingu eins og í fyrri tillögu, en það er í samræmi við óskir hafnarstjórnar um að falla frá lengingu Miðgarðs sem viðbótarviðlegu fiskiskipa. Viðlegukantur við landfyllingu er talinn betri kostur en lenging Miðgarðs, skv. ráðgjöf Vegagerðarinnar (hafnasvið), m.t.t. áhrifa á hafnaraðstæður.

Helstu breytingar sem ræddar voru á fundinum og unnið verður að eru eftirfarandi:

- Ný landfylling sunnan Miðgarðs verði minnkuð sjávarmegin
- Lóðum á þeirri landfyllingu verði fækkað frá fyrri tillögu
- Svæði kringum Gilós verði enn opnara, landfylling stytt/minnkuð til austurs.
- Skoðað verði fyrirkomulag lóða austan Gilóss/við Suðurgarð, sem og á fremstu lóð vestan Gilóss (nr. 6 í tillögu) og skerpt á skilmálum þeirra. Lóðir nr. 1-5 verði minnkaðar, svo og byggingareitir. Þar verði áfram lögð áhersla á aðlaðandi og snyrtilega ásýnd, sbr. fordæmi t.d. frá Torfunesbryggju á Akureyri og áréttað að lóðirnar séu ætlaðar fyrir þjónustu, eins og fram hefur komið í þegar kynntum skilmálum.
- Breyting verði gerð á lóðum á landfyllingu sunnan við (ofan við) nýjan neðanbyggðarveg. Endurskoðaðar verði stærðir og lóðarmörk. Áréttuð verði enn frekar í skilmálum aðlaðandi ásýnd göngustígs (Lengju) og gróðurbeðs sem komi á milli núverandi íbúðarbyggðar og hafnarsvæðis. Einnig verði áréttuð snyrtileg ásýnd bygginga og lóða á landfyllingu, séð frá húsum við Grundargötu og göngustígnum.

Fleiri atriði nefnd og rædd, en framangreindar eru þær forsendur sem lagðar eru til grundvallar í vinnu við gerð breyttrar deiliskipulagstillögu.

Formaður ber upp tillögu um að vinna við breytta deiliskipulagstillögu muni byggja á þessum forsendum. Samþykkt með fjórum atkvæðum nefndarmanna, ÁEK situr hjá.
Aðrir gestir fundarins, bæjarfulltrúar og hafnarstjórn, lýstu sig ennfremur samþykka þessum forsendum.

Skipulagsfulltrúa falið að vinna áfram að undirbúningi breyttrar tillögu á þessum forsendum.

Á fundi sínum 24. febrúar sl. lagði hafnarstjórn til við bæjarstjórn að gerðar yrðu breytingar á framlagðri deiliskipulagstillögu Grundarfjarðarhafnar, í kjölfar breyttra forsendna við undirritun bindandi kauptilboðs hafnarinnar á Nesvegi 4 þann 20. feb. sl. Bæjarstjórn samþykkti þá tillögu á fundi sínum 26. febrúar sl. og var deiliskipulagstillaga sú sem auglýst hafði verið 17. febrúar sl. tekin úr auglýsingu. Vísað er í dagskrárlið 1 á þessum fundi, sem og fundargerð 28. fundar hafnarstjórnar 24. febrúar sl.

Í samræmi við breyttar forsendur og fyrrnefnda ákvörðun bæjarstjórnar 26. febrúar sl. er nú unnið að gerð breyttrar deiliskipulagstillögu hafnarsvæðisins. Eins og rætt var á fundi skipulags- og umhverfisnefndar fyrr í dag eru helstu breytingar þær að ný landfylling sunnan Miðgarðs er minnkuð og lóðum þar með fækkað frá fyrri tillögu, svæði kringum Gilós breytist, skerpt verður á skilmálum fyrir lóðir austan Gilóss/við Suðurgarð o.fl. Tillagan er í vinnslu og styður hafnarstjórn þá vinnu og þær breytingar sem samþykkt var að leggja til sem forsendur breyttrar tillögu á fundi skipulags- og umhverfisnefndar nú áðan.

Á 651. fundi bæjarráðs 26. febrúar sl. lagði bæjarráð til að ónefnd gata nr. 14 í (eldri) deiliskipulagstillögu Grundarfjarðarhafnar verði tekin frá fyrir slökkvistöð, mögulega með breyttum lóðarmörkum út frá þörfum um stærð lóðar. Um er að ræða lóð sem kæmi við hlið (fyrir sunnan) hús Soffaníasar Cecilssonar hf. sem stendur við Borgarbraut 1. Hafnarstjórn samþykkir fyrir sitt leyti að í framsetningu nýrrar deiliskipulagstillögu verði sú lóð merkt og tekin frá undir þessi not.

Hafnarstjórn fór yfir gamlar ljósmyndir og loftmyndir af hafnarsvæðinu, m.a. af svæðinu neðan Grafar, austan við Gilósinn. Í greinargerð fyrri deiliskipulagstillögu er m.a. að finna ljósmynd frá 1957 sem sýnir íshús og fleiri byggingar á kambi rétt austan við Gilós. Athyglisvert er hve mikið land hefur verið austan Gilóss á þessum tíma og byggingar.
Með vísan í "íshús" sem þarna stóð á sínum tíma leggur hafnarstjórn til að nýr neðanbyggðarvegur, sem tengja á hafnarsvæði norður við þjóðveg 54 austan Gilóss, fái heitið "Íshúsvegur".

Samþykkt samhljóða.

Haldið var áfram umræðum um gerð nýrrar tillögu að breyttu deiliskipulagi í framhaldi af sameiginlegum fundi skipulags- og umhverfisnefndar, hafnarstjórnar og bæjarstjórnar þann 3. mars sl.

Rætt um þá stjórnsýslumeðferð að afturkalla deiliskipulagsbreytingu og á hvaða stigi sé þá eðlilegt að ný tillaga komi fram (skipulagslýsing, vinnslutillaga eða tillaga til auglýsingar). Að sögn skipulagsráðgjafa er nokkuð um að auglýstar tillögur séu dregnar til baka, unnið að breytingum á þeim og að þær fari aftur í auglýsingu og þá á sama stigi.

Rætt um samspil þessa skipulags við lóðina á Nesvegi 4, en lóðin er óregluleg í laginu og "útskot" sem snýr að Nesvegi 2 (hafnarhúsi) fyrir bílastæði hefur að mörgu leyti þótt önugt. Einnig er rætt um tækifærin sem tengjast lóð og húsi. Rætt um notkun á því sem oft er kallað "hús í biðstöðu", þ.e.a.s. hús sem hafa verið keypt til niðurrifs, en ætla má að standi einhver ár til viðbótar.

Farið heildstætt yfir svæðið að nýju miðað við breyttar forsendur. Sérstaklega farið yfir mikilvægi skilmála. Hægt er að gera þá stífari og nota þá til að beina tiltekinni starfsemi á ákveðin svæði innan skipulags. Þannig má beina hafntengdum iðnaði og sölutengdri starfsemi fyrir ferðamenn inn á ólíka reiti innan deiliskipulagssvæðisins. Tekin dæmi af uppbyggingu á öðrum hafnarsvæðum og sýnd dæmi af húsagerðum. Hægt er að setja skilmála um þakform og liti. Séu slíkir skilmálar fyrir hendi er hægt taka mið af því við gerð ásýndarmynda í kynningarefni.

Sérstaklega rætt um skilmála um sameiginlegt útlit á syðstu lóðunum, þar sem er aðkoman að bænum. Rætt um skýra skilmála fyrir það svæði um útlit, klæðningarefni og liti. Fyrsta lóð norðan Gilóss yrði hluti þess reits og með sömu skilmála.

Rætt um hönnun útlits og að það fari ekki að öllu leyti eftir stærð húsa hversu stór þau virðast. Brjóta megi upp útlit þeirra þannig að ásýnd breytist og þetta mætti ef til vill útfæra í skilmálum.

Rætt um stóru myndinga aftur. Hvaða þjónustu þarf og hvar hún sé að dreifast um bæinn. Rifjað upp að á hafnarsvæðinu hafa ekki verið lausar neinar atvinnulóðir um árabil. Verið sé að hugsa langt fram í tímann með þessu skipulagi og það sé bæði mikil fyrirhöfn og óhagstætt að vinna skipulag fyrir lítil svæði í einu. Þá glatast líka tækifærið til að ná heildstæðri hugsun í gegnum svæði. Nefnt var, að það sé einstök staða að náðst hafi að vinna upp deiliskipulagsáætlanir fyrir mörg svæði bæjarins á ekki lengri tíma, en staðan var þannig fyrir örfáum árum að afar lítill hluti þéttbýlisins var deiliskipulagður.

Einnig rætt um meðferð vinnugagna. Við gerð bæði aðal- og deiliskipulags hefur skipulagsráðgjafi sýnt uppköst og hugmyndir að útfærslum til að kalla fram umræður og draga fram áherslur skipulags- og umhverfisnefndar. Ekki er litið á þessi gögn sem tillögur og þau hafa ekki verið vistuð sem slík í skjalakerfi, enda endurspegla þau ekki endilega hvað koma mun fram í endanlegum tillögum. Ekki eru gerðar athugasemdir við þetta vinnulag.

Skipulagsfulltrúa falið að vinna áfram að nýrri deiliskipulagstillögu með hliðsjón af umræðum nefndarinnar.