Farið var í heimsókn í húsnæði Tónlistarskóla Grundarfjarðar og það skoðað í fylgd Sigurðar Gísla Guðjónssonar skólastjóra og Lindu Maríu Nielsen aðstoðarskólastjóra.
Linda María sagði frá endurbótum og helstu breytingum innanhúss í tónlistarskólanum og þeim ávinningi sem þessar breytingar fela í sér fyrir kennslu og alla aðstöðu skólans.
Einnig var farið í heimsókn í kennslustofur leikskóladeildarinnar Eldhamra í fylgd Sigurðar Gísla skólastjóra og Kristínar Ölmu Sigmarsdóttur, deildarstjóra, sem fræddi okkur um starfsemina.
Farið var í heimsókn í húsnæði Grunnskóla Grundarfjarðar og það skoðað í fylgd skólastjóra, Sigurðar Gísla Guðjónssonar. Einnig var farið í heimsókn í íþróttahúsið í fylgd Hinriks Konráðssonar, íþrótta- og tómstundafulltrúa.
Skoðaðar voru þær framkvæmdir á skólahúsnæði sem gerðar hafa verið í ár og síðustu ár, skoðuð almenn aðstaða til kennslu, og aðstaða heilsdagsskólans, bókasafn, eldhúsaðstaða og kennarastofa o.fl. Rætt almennt um starfsemina, rými hússins og aðstöðu.
Farið var í íþróttahúsið og rætt við Hinrik íþrótta- og tómstundafulltrúa. Skoðaðar voru endurbætur sem gerðar voru í búningsklefum sl. sumar og rætt um viðhaldsþörf hússins, einkum klæðningu og gluggaskipti, sem eru á döfinni, bætta hljóðvist sem unnið hefur verið að, lýsingu í íþróttasal ofl. Einnig var farið í tæknirými hússins og skoðaðar varmadælur og tæknibúnaður sem settur var upp og keyrir nú varmaorku inná kyndikerfi íþróttahúss, sundlaugar og skólamannvirkja. Frá 16. janúar 2025 hefur verið nýtt varmaorka og rafmagn, til kyndingar, í stað olíukyndingar áður.