Lögð fram drög að skýrslu Vífils Karlssonar hjá Samtökum sveitarfélaga á Vesturlandi um þróun tekna og fjárhagsþátta Grundarfjarðarbæjar.
Í yfirferð Vífils og bæjarstjóra eftir síðasta fund bæjarstjórnar var ákveðið að skýra nokkra þætti frekar. M.a. hefur verið óskað frekara niðurbrots frá Jöfnunarsjóði og frekari gögnum um skiptingu útsvars frá Hagstofu. Drögin sem nú liggja fyrir eru með smávægilegri viðbót frá síðustu útgáfu, en eru að öðru leyti í vinnslu.
Lagður fram tölvupóstur bæjarstjóra til Skattsins, 23. júní 2025, með beiðni um upplýsingar og greiningu gagna, í framhaldi af umræðu bæjarstjórnar á fundi sínum 8. maí sl., þar sem farið var yfir greiningu útsvarstekna bæjarins aftur í tímann.
Lögð fram til kynningar fyrir bæjarráði samskipti bæjarstjóra við Skattinn, í framhaldi af beiðni Grundarfjarðarbæjar til Skattsins í júní sl., sem ekki hefur enn verið svarað.
Um er að ræða ósk um upplýsingar, sem nýttar verða í greiningu á útsvarstekjum bæjarins, sem SSV - Vífill Karlsson - hefur unnið að fyrir bæinn.
Einnig lagt fram erindi bæjarstjóra til fjármálaráðherra og Sambands íslenskra sveitarfélaga um þá stöðu að Skatturinn svari ekki erindi bæjarins sem varðar möguleika sveitarfélaga á að greina útsvarstekjur sínar með réttmætum hætti.
Svar barst 9. desember sl. um að erindinu yrði svarað með gögnum í þessari viku.
Lögð fram til kynningar skýrsla SSV, Vífils Karlssonar, úttekt á tekjum og fjárhagsþáttum Grundarfjarðarbæjar, maí 2026.
Rætt um efni skýrslunnar, sem er samantekt og greining á tekjum, m.a. útsvarstekjum bæjarins og fleiri fjárhagsþáttum. Skýrslan er afrakstur af rýni SSV fyrir bæjarstjórn sem segja má að staðið hafi yfir sl. átta ár, eða allt frá því fyrsta skýrsla af þremur var unnin haustið 2018.
Bæjarráð og bæjarstjórn hafa í átta ár vakið athygli á þeirri óboðlegu stöðu að sveitarfélög landsins hafi ekki aðgang að upplýsingum um útsvarstekjur sínar, sem ríkið innheimtir fyrir þau. Álagningarskrá fæst ekki afhent sveitarfélögum og engar upplýsingar berast með uppgjöri til sveitarfélaganna um skiptingu útsvarstekna eftir atvinnugreinum o.fl.
Niðurstöður skýrslunnar sýna að óútskýrður munur sé á útsvarstekjum Grundarfjarðarbæjar og flestum þeim sveitarfélögum sem við berum okkur saman við, þar sem okkar tekjur eru lægri.
Bæjarráð samþykkir að senda þessa skýrslu til fjármálaráðherra og Ríkisskattstjóra, til upplýsingar og frekari skoðunar. Ennfremur til Sambands íslenskra sveitarfélaga, sem fylgst hefur náið með vinnu bæjarins að málinu síðustu árin. Bæjarráð ítrekar jafnframt fyrri afstöðu sína og bæjarstjórnar, um að gera þurfi verulega bragarbót á upplýsingagjöf ríkisins til sveitarfélaga um útsvarstekjur þeirra.
Páll S. Brynjarsson og Vífill Karlsson, frá SSV, sátu fundinn undir þessum lið.
Farið yfir drög að skýrslu, sem á eftir að fullklára.
Bæjarstjórn samþykkir samhljóða að leita til Jöfnunarsjóðs sveitarfélaga um að taka til athugunar framlög til Grundarfjarðarbæjar úr sjóðnum.