Skipulags- og umhverfisnefnd

Vélsmiðja Grundarfjarðar leggur fram umsókn um byggingarleyfi vegna viðbyggingar við Ártún 3. Um er að ræða seinni hluta viðbyggingar, en fyrri hlutinn var byggður vorið 2020.

Leiguþjónustan ehf. sækir um lóðina Grundargötu 82 til byggingar parhúss.

Lóðin er á ódeiliskipulögðu svæði sem í Aðalskipulagi Grundarfjarðar 2019-2039 er skilgreint sem íbúðarsvæði (ÍB-4). Í skipulagsskilmálum fyrir ÍB-4 segir að "[heimilt sé] að byggja íbúðarhús sem falla vel að þeirri byggð sem fyrir er s.s. hvað varðar hæð húsa."

Í 1. mgr. 44. gr. skipulagslaga nr. 123/2010 segir jafnframt að "Þegar sótt [sé] um byggingar- eða framkvæmdaleyfi fyrir framkvæmd sem er í samræmi við aðalskipulag en deiliskipulag liggur ekki fyrir getur sveitarstjórn [...] ákveðið að veita megi leyfi án deiliskipulagsgerðar ef framkvæmdin er í samræmi við landnotkun, byggðamynstur og þéttleika byggðar. Skal skipulagsnefnd þá láta fara fram grenndarkynningu. Þegar um er að ræða óverulega breytingu á deiliskipulagi skal skipulagsnefnd láta fara fram grenndarkynningu, sbr. 2. og 3. mgr. 43. gr."

Leiguþjónustan ehf. sækir um lóðina við Grundargötu 90 til byggingar á parhúsi.

Lóðin er á ódeiliskipulögðu svæði sem í Aðalskipulagi Grundarfjarðar 2019-2039 er skilgreint sem íbúðarsvæði (ÍB-4). Í skipulagsskilmálum fyrir ÍB-4 segir að "[heimilt sé] að byggja íbúðarhús sem falla vel að þeirri byggð sem fyrir er s.s. hvað varðar hæð húsa."

Í 1. mgr. 44. gr. skipulagslaga nr. 123/2010 segir jafnframt að "Þegar sótt [sé] um byggingar- eða framkvæmdaleyfi fyrir framkvæmd sem er í samræmi við aðalskipulag en deiliskipulag liggur ekki fyrir getur sveitarstjórn [...] ákveðið að veita megi leyfi án deiliskipulagsgerðar ef framkvæmdin er í samræmi við landnotkun, byggðamynstur og þéttleika byggðar. Skal skipulagsnefnd þá láta fara fram grenndarkynningu. Þegar um er að ræða óverulega breytingu á deiliskipulagi skal skipulagsnefnd láta fara fram grenndarkynningu, sbr. 2. og 3. mgr. 43. gr."

Leiguþjónustan ehf. sækir um lóðina Ölkelduveg 17 til byggingar parhúss.

Lóðin er á deiliskipulögðu svæði (Ölkeldudalur 2003 m.s.br.). Samkvæmt gildandi deiliskipulagsskilmálum fyrir lóðina, takmarkast uppbygging við byggingu 1-2 hæða einbýlishúss.

Leiguþjónustan ehf. sækir um lóðina Ölkelduveg 19 til byggingar parhúss.

Lóðin er á deiliskipulögðu svæði - Deiliskipulag Ölkeldudals frá 2003 m.s.br. Samkvæmt gildandi deiliskipulagsskilmálum takmarkast uppbygging á lóðinni við byggingu 1-2 hæða einbýlishúss.

Leiguþjónustan ehf. óskar eftir að gerð verði breyting á gildandi deiliskipulagi fyrir Ölkeldudal vegna lóðanna við Ölkelduveg 17 og 19.

Í gildandi deiliskipulagi Ölkeldudals eru lóðirnar skilgreindar sem einbýlishúsalóðir á 1-2 hæðum. Óskað er eftir að breyta þeim í parhúsalóðir.

Lagður er aftur fram til kynningar uppfærð breytingartillaga með minniháttar lagfæringum er varða Fellasneið 5 og 7.

Forsaga:
Á 239. fundi skipulags- og umhverfisnefndar þann 30. ágúst sl. voru lagðar fram til kynningar umsagnir og athugasemdir sem bárust á auglýsingartíma breytingartillögunnar.

Á 240. fundi skipulags- og umhverfisnefndar þann 27. september sl. tók nefndin afstöðu til framkominna athugasemda og fól skipulagsfulltrúa að vinna að minniháttar breytingum til þess að koma til móts við athugasemdir sem bárust. Bæjarstjórn staðfesti á 264. fundi sínum þann 20. október sl. afgreiðslu nefndarinnar, sbr. 3. mgr. 41. gr. skipulagslaga nr. 123/2010.

Á 242. fundi skipulags- og umhverfisnefndar þann 15. nóvember sl. samþykkti nefndin uppfærða deiliskipulagsbreytingu með minniháttar lagfæringum. Á 265. fundi sínum þann 24. nóvember sl. staðfesti bæjarstjórn tillögu að minniháttar breytingum að undanskilinni einni óbókaðri minniháttar breytingu á lóðum við Fellasneið 5 og 7, en skipulagsfulltrúi gerði bæjarstjórn grein fyrir því atriði á fundi bæjarstjórnar.

Lögð eru fram til umræðu drög að deiliskipulagsbreytingu á athafna- og iðnaðarsvæðinu vestan Kvernár.

Forsaga:
Í gildi er deiliskipulag frá 1999 með síðari breytingum frá 2008 (Ártún 1, 2, 3 og 5), 2015 (Ártún 1), 2021 (Ártún 3) og 2022 (Ártún 4 - tekur gildi í desember 2022).

Á 263. fundi sínum þann 13. september sl. samþykkti bæjarstjórn að hefja vinnu við endurskoðun deiliskipulags fyrir iðnaðar- og athafnasvæðið vestan Kvernár á grunni verk- og kostnaðaráætlunar ráðgjafarfyrirtækisins Alta.

Á 242. fundi skipulags- og umhverfisnefndar þann 15. nóvember sl. kynntu skipulagsráðgjafar frá Alta stöðuna í verkefninu sem er þrískipt og felst í óverulegri deiliskipulagsbreytingu vegna Ártúns 4 (tekur gildi í desember 2022), verulegri breytingu vegna metralóða við Hjallatún og breytingu á heildarskipulagi svæðisins.

Deiliskipulagsbreyting þessi tekur til þess hluta skipulagssvæðisins sem í dag er að mestu byggður. Markmiðið með deiliskipulagsbreytingunni er að auka nýtingu á svæðinu með því að hliðra til lóðarmörkum, breyta hluta metralóða við Hjallatún í 1-2 lóðir, bæta við lóð við Ártún 8, laga göturnar Ártún og Hjallatún betur að raunnotkun og að finna hentuga staðsetningu fyrir útivistarstíg í gegnum eða framhjá iðnaðarsvæðinu.

Lögð fram til kynningar greinargerð Guðmundar Jónssonar frá 29. nóvember sl. um framtíðarskíðasvæði ofan við núverandi skíðasvæði en hann og Guðmundur Pálsson frá stjórn Skíðasvæðis Snæfellsness skoðuðu svæðið í haust.

Forsaga:
Greinargerðin var tekin fyrir á 598. fundi bæjarráðs þann 7. desember sl. og vísaði bæjarráð erindinu til kynningar hjá íþrótta- og tómstundanefnd og skipulags- og umhverfisnefnd. Bæjarstjóri hefur einnig sent greinargerðina til stjórnar Skíðasvæðis Snæfellsness.

Stefnt er að fundi fulltrúa bæjarins og Skíðadeildar/Skíðasvæðis í janúar um erindi skv. máli nr. 2211011.

Lagður fram til kynningar tölvupóstur með erindi frá eigendum jarðanna Búða, Háls og Kirkjufells með ósk um að Grundarfjarðarbær skipi fulltrúa í samráðshóp landeigenda og hagsmunaaðila. Hópurinn hafi það hlutverk að svara ýmsum spurningum um aðgengi að og öryggi fólks á Kirkjufelli.

Forsaga:
Á 598. fundi bæjarráðs 7. desember sl. samþykkt bæjarráð að tilnefna bæjarstjóra sem fulltrúa bæjarstjórnar í samráðshópinn og að skipulagsfulltrúi komi að vinnunni eftir þörfum.

Skipulagsfulltrúi sagði frá kynningum nemenda í landslagsarkitektúr við Landbúnaðarháskóla Íslands sem fram fóru 7. desember sl. í Samkomuhúsinu í Grundarfirði. Nemendur unnu hönnunarverkefni sem öll höfðu Grundarfjörð sem viðfangsefni. Kynningarnar verða gerðar nefndarfólki aðgengilegar í fundarkerfi.

Byggingarfulltrúi og skipulagsfulltrúi gerðu grein fyrir stöðu ýmissa mála sem eru í vinnslu hjá sviðinu.

Minnt var á að opið hús er á morgun, 13. desember, til kynningar á skipulagslýsingu fyrir deiliskipulag hafnarsvæðis og Framness.