Málsnúmer 2508010Vakta málsnúmer
Grundarfjarðarhöfn er meðal bestu hafna landsins, býr við góðar náttúrulegar hafnaraðstæður og byggð hafa verið upp góð hafnarmannvirki. Tækifæri til að auka breidd í starfseminni hafa verið nýtt, ekki síst með markaðssetningu fyrir skemmtiferðaskip í ríflega 20 ár. Meira en 50% útsvarstekna bæjarins koma af hafnsækinni starfsemi, einkum veiðum, vinnslu, flutningum o.fl. Það eru því fjölmörg tækifæri fólgin í starfsemi og aðstöðu hafnarinnar, til framtíðar litið.
Á hafnarsvæðinu sjálfu eru engar lausar athafnalóðir og hafa ekki verið í dágóðan tíma.
Með vaxandi umsvifum á hafnarsvæðinu hefur þörfin aukist fyrir opið rými, bílastæði og öruggar umferðarleiðir.
Þann 17. febrúar sl. var auglýst tillaga að deiliskipulagi Grundarfjarðarhafnar, þar sem gert er ráð fyrir athafnalóðum á nýrri landfyllingu sunnan við Miðgarð, auknu rými fyrir umferð og öruggari umferðarleiðum, m.a. gönguleiðum. Deiliskipulagstillagan er í samræmi við aðalskipulag bæjarins frá 2019 og í samræmi við eldri aðalskipulagsáætlanir.
Með staðfestu tilboði þann 20. febrúar sl. festi hafnarsjóður kaup á eigninni Nesvegi 4. Með því hafa forsendur breyst umtalsvert. Með kaupunum mun höfnin ráða yfir rúmlega 7200 m2 lóð á lykilstað á hafnarsvæðinu. Tilgangur kaupanna er að tryggja full yfirráð yfir lóð sem mun gegna lykilhlutverki í tengslum við hafntengda starfsemi og þar með framtíðartekjum hafnar og bæjar.
Hafnarstjórn áréttar mikilvægi þess að nýta nálægð við góða höfn og tækifæri til uppbyggingar sem því tengist, en telur að þörf fyrir nýjar lóðir sé nú minni eftir þessi kaup. Í ljósi þessara breyttu forsendna leggur hafnarstjórn því til við bæjarstjórn að gerð verði breyting á fyrirkomulagi lóða og landfyllingar frá því sem fram kemur í nýkynntri tillögu að deiliskipulagi hafnarsvæðis. Breytt tillaga verði mótuð og kynnt, þar sem gert sé ráð fyrir minna umfangi lóða, en áfram unnið að nýjum neðanbyggðarvegi og viðlegukanti, enda tekur mörg ár að tryggja stuðning fyrir fjárhagshlut ríkisins í slík mannvirki.