Bæjarstjórn

Málsnúmer 1808018Vakta málsnúmer

Málsnúmer 1808012Vakta málsnúmer

Málsnúmer 1808013Vakta málsnúmer

Málsnúmer 2203002FVakta málsnúmer

• 4.1 2203038 Skipulagsmál í vinnslu 2022-2023
  Kristín Þorleifsdóttir sviðsstjóri umhverfis- og skipulagsmála og skipulagsfulltrúi er gestur undir þessum dagskrárlið.
  
  Formaður bauð Kristínu velkomna á fundinn.
  Bæjarráð - 585 Kristín fór yfir helstu verkefni við uppbyggingu nýs sameiginlegs skipulags- og umhverfissviðs, sem bærinn stendur að í samvinnu við Stykkishólmsbæ, Eyja- og Miklaholtshrepp og Helgafellssveit.
  
  Kristín tók til starfa í ágúst sl. og Fannar Þór Þorfinnsson, sem er byggingarfulltrúi, í október sl. Að auki er Þuríður Gía Jóhannesdóttir í 50% starfi sem aðstoðarmaður á sviðinu með aðsetur í Grundarfirði og í Stykkishólmi er annar aðstoðarmaður í 50% starfi. Undir sviðið heyra áhaldahús og fasteignaumsjón og hafa Kristín og Fannar Þór verklega yfir þeim einingum að segja, en bæjarstjórarnir fara með það sem lýtur að ráðningar- og starfsmannahluta eininganna. Lagt hefur verið uppúr því að koma á skilvirku verklagi og verkaskiptingu. Haldnir eru mánaðarlegir sviðsfundir þar sem farið er yfir verkefnastöðu sviðsins, auk þess sem Fannar vinnur með verkstjórum og fasteignaumsjón og fylgist með framgangi verkefna þeirra.
  
  Komið hefur verið á fastri viðveru skipulagsfulltrúa og byggingarfulltrúa í Grundarfirði og Stykkishólmi, og í hinum sveitarfélögunum tveimur eftir þörfum.
  
  Unnið hefur verið að því að uppfæra ýmis grunngögn, sem nauðsynleg eru í starfseminni. Fram kom t.d. að skipulagsvefsjá Grundarfjarðarbæjar sé að nýtast mjög vel og alltaf sé að bætast við virkni og gögn. Sjá hér: https://geo.alta.is/grundarfjordur/vefsja/
  
  Gjaldskrár mun þurfa að endurskoða og samræma að einhverju leyti.
  
  Kristín sagði ennfremur frá skipulagsverkefnum sem eru í gangi í Grundarfirði.
  
  Unnið hefur verið að endurskoðun á deiliskipulagi Ölkeldudals. Í samræmi við aðalskipulag, verður gert ráð fyrir nýjum íbúðarlóðum upp eftir Ölkelduvegi. Auk þess verður bætt við lóðum vestan við dvalar- og hjúkrunarheimilið Fellaskjól, fyrir íbúðir ætlaðar fólki 60 ára og eldri. Fram kom hjá bæjarstjóra að lóðirnar eru innan eignarlóðar Fellaskjóls og að stjórn Fellaskjóls óski eftir því að bærinn kaupi svæðið út úr lóð Fellaskjóls.
  
  Í undirbúningi er vinna við nýtt deiliskipulag á Framnesi, sem bæjarstjórn hefur ákveðið að láta vinna. Auk þess endurskoðun á gildandi deiliskipulagi Framness austan Nesvegar (hafnarsvæði). Ætlunin er þá að útvíkka skipulagið þannig að það nái yfir Norðurgarð og athafnalóðirnar þar, og mögulega stærra svæði einnig.
  Kristín sagði frá vali á skipulagsráðgjöfum í þessi tvö deiliskipulagsverkefni sem fara eiga af stað á næstunni. Það er orðið mjög aðkallandi að breyta deiliskipulagi Framness austan Nesvegar (hafnarsvæðis). Áhersla er á að ljúka því sem fyrst - og á undan deiliskipulagi Framness - þó í upphafi séu svæðin rýnd samhliða.
  
  Rætt var um uppbyggingu og lóðir fyrir íbúðarhúsnæði og um miðbæjarreit (Grundargata/Hrannarstígur/Hamrahlíð) og möguleika til uppbyggingar þar, sjá reit innan miðbæjarsvæðis, M-1 í skipulagsuppdrætti - sjá hér:
  https://www.grundarfjordur.is/static/files/Byggingarfulltrui/Ask_2019_2039/ask-grfj-thettbylisuppdrattur.pdf
  
  Einnig rætt um tækifæri tengd frístundabyggð (F-2) sem skipulögð er sunnan hesthúsabyggðar.
  
  Að lokum voru einnig ræddar hugmyndir um að fegra miðbæjarreitinn ("Víkingasvæðið" og nærliggjandi plan) með einföldum hætti í sumar, en bæjarstjórn gerði ráð fyrir fjármunum í einfaldar aðgerðir í því skyni.
  
  Kristínu var þakkað fyrir komuna og góðar upplýsingar og vék hún hér af fundinum.
  
• 4.2 2202005 Greitt útsvar 2022
  Bæjarstjóri sagði frá því að dr. Vífill Karlsson / Samtök sveitarfélaga á Vesturlandi (SSV) vinni nú úttekt á tekjum Grundarfjarðarbæjar.
  
  Bæjarráð - 585 Bæjarstjóri sagði frá því að hún hefði óskað eftir því að SSV myndu rýna tekjuþróun Grundarfjarðarbæjar. Sambærileg úttekt var unnin af SSV haustið 2018, fyrir bæjarstjórn.
  
  Úttektin nú snýr einkum að útsvari og þróun þess, sveiflum í útsvarstekjum, atvinnugreinaflokkun, áhrifum íbúafjölda o.fl., auk þess að helstu tekjuforsendum Grundarfjarðarbæjar.
  
  Gögn um útsvarstekjur eru orðin betri og aðgengilegri núna en þau voru 2018, m.a. vegna þess að Grundarfjarðarbær hefur átt þátt í að þrýsta á um haldbetri upplýsingar um þennan megintekjustofn sveitarfélaga.
  
  Auk útsvarsins á að skoða Jöfnunarsjóðstekjur bæjarins og þróun þeirra, sem og fasteignamatið og þróun þess.
  
  Greiningin ætti að liggja fyrir í apríl nk.
  
• 4.3 2203043 Leikskólinn Sólvellir - Skipulag skólastarfs 2022
  Heiðdís Lind Kristinsdóttir skólastjóri Leikskólans Sólvalla er gestur undir þessum dagskrárlið.
  
  Formaður bauð Heiðdísi velkomna á fundinn.
  
  Bæjarráð - 585 Leikskólastjóri fór yfir starfsemi leikskólans. Rætt var um það starf sem nú fer fram með ráðgjöfum frá Ásgarði, sem vinna með stjórnendum leikskólans. Ásgarður veitir faglegan stuðning við skipulag og framkvæmd skólastarfs í leik- og grunnskólum.
  
  Það sem einkum er til skoðunar nú er "skipulag og barngildi" þar sem unnið er með starfsfólki leikskólans að því að rýna fyrirkomulag starfseminnar og finna bestu útfærslur m.v. starfið í dag. Auk þess er unnið að endurskoðun verklags við veitingu sérkennslu og stuðnings.
  
  Út úr vinnunni kemur eftirfarandi:
  
  i) dagsskipulag, sett niður eftir rýni starfsfólks (mögulega breytt frá því sem nú er)
  ii) tillaga um endurskoðuð barngildisviðmið, þ.e. mönnun og skipulag út frá viðmiðum um barngildi fyrir leikskólastig,
  iii) tillaga um fyrirkomulag við að meta sérkennsluþörf nemenda og viðmið um stuðning, og um stjórnskipulag og verklag skólans við að veita þá þjónustu
  og
  iv) svokallaðar "fáliðunarreglur", sem eru bindandi viðmið um hvernig unnið er þegar margir starfsmenn eru forfallaðir eða þegar ekki tekst að ráða leikskólakennara/starfsfólk. Slíkar reglur hafa verið settar hjá mörgum sveitarfélögum/leikskólum, m.a. hjá Reykjavíkurborg.
  
  Liðir ii), iii) og iv) eru teknir til umsagnar í skólanefnd og bæjarráði, og til staðfestingar hjá bæjarstjórn. Ætlunin er að þær tillögur verði tilbúnar og teknar fyrir í bæjarráði og skólanefnd fyrir páska.
  
  Rætt var um mönnun í leikskólanum. Þrátt fyrir ítrekaðar auglýsingar eftir starfsfólki hefur ekki tekist að ráða að fullu í afleysingar vegna þeirra starfsmanna sem nú eru í leyfi vegna fæðingarorlofs og í lækkuðu starfshlutfalli vegna náms.
  Á þessu ári hefur einnig gengið erfiðlega að manna stöður í eldhúsi.
  
  Af þessum sökum hefur ekki verið unnt að taka inn tvö 12 mánaða gömul börn nú í mars. Tvö börn verða síðan 12 mánaða í apríl.
  
  Bæjarráð tekur undir með leikskólastjóra, um að ekki sé hægt að fórna gæðum leikskólastarfsins með því að taka inn börn umfram það sem mönnun leyfir. Inntaka 12 mánaða barna í leikskólann sé því alltaf háð þeim skilyrðum að hægt sé að tryggja öryggi og gæði í leikskólastarfi.
  
  Leikskólastjóri ræddi sérstaklega um starfsemi eldhúss í leikskólanum, um mönnun og fyrirkomulag, sem hefur verið talsverð áskorun undanfarnar vikur.
  
  Heiðdísi var þakkað fyrir komuna og góðar umræður og vék hún hér af fundinum.
  
• 4.4 2201015 Samþykkt um stjórn Grundarfjarðarbæjar og erindisbréf nefnda
  Í vinnslu eru drög að endurskoðuðum samþykktum um stjórn Grundarfjarðarbæjar og endurskoðuðum erindisbréfum fastanefnda.
  Bæjarráð - 585 Rætt var um endurskoðun samþykktanna og um fjölda nefndarmanna.
  Bæjarstjórn mun taka endurskoðaðar samþykktir til afgreiðslu á næsta fundi sínum.
  
• 4.5 2203025 Grundarfjarðarbær - Um þjónustu HVE í Grundarfirði
  Málefnið var til umræðu á 257. fundi bæjarstjórnar þann 10. mars sl.
  
  Frekari ábendingar hafa borist frá íbúum um fyrirkomulag þjónustu HVE um helgar, þegar sjúklingum er gert að sækja þjónustu læknis til Ólafsvíkur. Ábendingarnar gefa tilefni til að leita eftir skýringum HVE á fyrirkomulagi við veitingu þjónustunnar.
  
  Bæjarráð - 585 Bæjarráð telur að ábendingarnar gefi enn frekari ástæðu til þess að kalla eftir skýrum svörum HVE um fyrirkomulag á vaktþjónustu lækna um helgar við íbúa Grundarfjarðar, og eftir svörum heilbrigðisyfirvalda um þjónustustig.
  
  Bæjarráð felur bæjarstjóra að kalla eftir skýringum í samræmi við umræður fundarins.
  Bókun fundar Bæjarstjóri sagði frá svarbréfi framkvæmdastjóra HVE við erindi bæjarstjóra í framhaldi af bókun bæjarstjórnar. Þar kemur fram að svars sé ekki að vænta fyrr en 13. apríl nk.
  
• 4.6 2203006 Samband íslenskra sveitarfélaga - Samþykkt stjórnar Sambandsins og yfirlýsing CEMR vegna Úkraínu
  Lögð fram svör félagsmálaráðuneytis í tölvupósti 18. mars sl. við spurningum frá bæjarstjóra um ýmis atriði varðandi framkvæmd við móttöku flóttafólks frá Úkraínu.
  Auk svara ráðuneytisins bendir ráðuneytið á vefinn:
  https://www.mcc.is/fagfolk/
  
  Bæjarráð - 585
• 4.7 2203042 Fellaskjól - Tilkynning um hækkað verð á máltíðum, mótt. 18.03.2022
  Lagt fram bréf Fellaskjóls um að matarverð hækki um 200 kr.
  
  Bæjarráð - 585 Bæjarráð samþykkir samhljóða að hækka gjaldskrá fyrir heimsendan mat sem þessari hækkun nemur og fari því úr 950 í 1150 kr.
  
  Í erindinu er jafnframt óskað eftir viðgerðum (holufyllingum) í innkeyrslu að Fellaskjóli. Bæjarráð felur bæjarstjóra að koma þeirri beiðni áleiðis til áhaldahúss, til framkvæmdar.
  
• 4.8 2002037 Unicef Ísland - Barnvæn sveitarfélög - Innleiðing Barnasáttmála Sameinuðu þjóðanna
  Lagður fram til kynningar undirritaður samningur bæjarins við mennta- og barnamálaráðherra og UNICEF frá 11. mars 2022.
  Ennfremur til kynningar handbók um hlutverk umsjónarmanns og stýrihóps.
  
  Bæjarráð - 585 Bæjarstjóri sagði frá því að íþrótta- og tómstundafulltrúi vinni að undirbúningi vegna innleiðingar sveitarfélagsins á verklagi barnvænna sveitarfélaga. Meðal annars er unnið að því að fá börn og ungmenni í ungmennaráð, en skipa þarf viðbótarfulltrúa í það.
  
• 4.9 2202014 Þjóðskrá Íslands - Skýrsla fyrir Grundarfjarðarbæ
  Lögð fram sjálfvirk skýrsla fyrir Grundarfjarðarbæ með lykiltölum frá Þjóðskrá, m.v. dagsetninguna 22. mars 2022.
  
  Sjá hér:
  https://storage.googleapis.com/a2p-v2-storage/4ddc5e33-c019-41f2-a623-bf638ac03d41
  
  Bæjarráð - 585 Í skýrslunni kemur m.a. fram að fjölgað hefur um 6 íbúa í sveitarfélaginu frá 1. desember 2021.
  
• 4.10 2203007 Skátafélagið Örninn - Samningur um fánaumsýslu 2021-2022
  Lagður fram samningur Grundarfjarðarbæjar við Skátafélagið Örninn um fánaumsýslu fyrir bæinn 2021-2022.
  
  Bæjarráð - 585
• 4.11 2203029 Stofnun stjórnsýslufræða og stjórnmála - Ný skýrsla - Reynsla og viðhorf kjörinna fulltrúa í bæjar- og sveitarstjórnum á Íslandi
  Lögð fram til kynningar skýrsla (febrúar 2022) um reynslu og viðhorf kjörinna fulltrúa í bæjar- og sveitarstjórnum á Íslandi.
  
  
  Bæjarráð - 585
• 4.12 2203010 Samband íslenskra sveitarfélaga - Hækkun lífeyrisskuldbindinga 2021
  Lagt fram til kynningar minnisblað Sambandsins frá 22. febrúar 2022 um hækkun lífeyrisskuldbindinga sveitarfélaga.
  Bæjarráð - 585 Fram kemur að lífeyrisskuldbindingar margra sveitarfélaga vegna ársins 2021 hafa hækkað verulega. Rekja má hækkunina til (1) hækkunar launa, (2) breyttra forsendna um lífaldur og (3) hækkandi hlutar launagreiðenda.
  
  Breytingin leiðir til talsverðrar hækkunar lífeyrisskuldbindinga og ákvað fjármálaráðherra að heimila lífeyrissjóðum að innleiða hinar breyttu forsendur á næstu tveimur árum, þ.e. 2021 og 2022.
  Brú lífeyrissjóður starfsmanna sveitarfélaga ákvað að nýta ekki heimild til frestunar á lokuðum sjóðum í hans umsjón. Sveitarfélögum gefst því ekki kostur á frestun og því ljóst að lífeyrisskuldbindingar munu hækka strax á árinu 2021.
  
  Ljóst er að hækkun lífeyrisskuldbindinga mun leiða til minni rekstrarafgangs margra sveitarfélaga.
  
• 4.13 2203037 Samband íslenskra sveitarfélaga - Um sveitarstjórnarkosningar 2022 og breytingar á kosningalögum
  Lagður fram til kynningar tölvupóstur Sambandsins til sveitarfélaga og kjörstjórna um undirbúning fyrir sveitarstjórnarkosningar 14. maí nk., um breytingar á kosningalögum og um kynningarfundi.
  
  Bæjarráð - 585
• 4.14 2203011 Samband íslenskra sveitarfélaga - Samráðs- og upplýsingafundir til undirbúnings stefnumótunarvinnu
  Lagt fram til kynningar bréf Sambandsins um samráðs- og upplýsingafundi sem haldnir eru með sveitarstjórnarmönnum til undirbúnings stefnumótunarvinnu á landsþingi sambandsins í september 2022.
  
  Bæjarráð - 585
• 4.15 2203036 Sjóvá - Samantekt frá morgunverðarfundi um forvarnir sveitarfélaga
  Lögð fram til kynningar samantekt frá morgunverðarfundi sem vátryggingarfélagið Sjóvá hélt 3. mars sl. um forvarnir sveitarfélaga.
  
  Upptöku fundarins má finna hér: https://www.youtube.com/watch?v=uoYtL28yZ1E
  
  Bæjarráð - 585
• 4.16 2203039 Líkamsræktin ehf. - Erindi um aukið rými fyrir starfsemi Líkamsræktarinnar
  JÓK vék sæti áður en liðurinn var tekinn til afgreiðslu og yfirgaf fundinn þar sem þetta var síðasti dagskrárliðurinn.
  
  Lagt fyrir erindi Líkamsræktarinnar Grundarfirði þar sem sett er fram hugmynd um sameiginlega nýtingu Líkamsræktarinnar á sal Tónlistarskólans, fyrir spinningtíma sem eru hluti af starfsemi Líkamsræktarinnar. Innangengt er úr húsnæði því sem Líkamsræktin leigir og inní salinn.
  
  Einnig liggur fyrir umsögn skólastjóra grunn- og tónlistarskóla um nýtingu skólanna á rýminu.
  
  Bæjarráð - 585 Bæjarráð þakkar Líkamsræktinni fyrir erindið.
  
  Í ljósi upplýsinga skólastjóra um nýtingu rýmisins sér bæjarráð sér ekki fært að verða við erindinu.
  Bókun fundar Til máls tóku JÓK, GS og BÁ.

Málsnúmer 2203003FVakta málsnúmer

• 5.1 2203043 Leikskólinn Sólvellir - Skipulag skólastarfs 2022
  Bæjarráð - 586 Lögð fram drög að viðmiðum um barngildi og mönnun sem og reglur um fáliðun á Leikskólanum Sólvöllum.
  
  Undir þessum lið sátu fundinn gegnum teams Gunnþór E. Gunnþórsson, ráðgjafi hjá Ásgarði, Heiðdís Lind Kristinsdóttir, leikskólastjóri, bæjarfulltrúarnir Hinrik Konráðsson, Rósa Guðmundsdóttir og Garðar Svansson, sem jafnframt er formaður skólanefndar og aðrir fulltrúar skólanefndar, þau Valdís Ásgeirsdóttir og Loftur Árni Björgvinsson, auk Sigríðar G. Arnardóttur, varabæjarfulltrúa.
  
  Kynning þessi er til undirbúnings umsagna bæjarráðs og skólanefndar og afgreiðslu bæjarstjórnar síðar í vikunni.
  
  Gunnþór, ráðgjafi hjá Ásgarði, fór yfir tilurð vinnu við setningu barngildisviðmiða og reglur um fáliðun á leikskólum. Með þessum tillögum er verið að skerpa á þeim viðmiðum sem unnið hefur verið eftir. Tillögurnar eru unnar með stjórnendum Leikskólans Sólvalla og eru þær hluti af frekari vinnu við að styrkja starf leikskólans.
  
  Skv. reglunum er gert ráð fyrir að grunnmönnun sé 8 börn á hvert stöðugildi. Að jafnaði skulu stöðugildi vera í takt við fjölda barna, en fjöldi barna á hvert stöðugildi fækkar með lækkandi aldri, en miðað er við 4 börn á hvert stöðugildi í yngsta aldurshópnum. Til viðbótar koma svo stöðugildi sem miða við stuðningsþarfir barna hverju sinni. Unnið er að verklagsreglum um sérkennslu og stuðning, sem verða lagðar fyrir á næstu vikum.
  
  Fáliðun telst þegar fáir starfsmenn eru við vinnu og viðmiðið er að fjöldi barna fari ekki yfir 8 á hvern starfsmann. Reglurnar gera grein fyrir því til hvaða úrræða skuli gripið ef fjöldi barna á hvert stöðugildi fer yfir grunnviðmið.
  
  Fram fór umræða fundarmanna um tillögurnar.
  
  Bæjarráð fagnar framlögðum og skýrum tillögum og leggur til við bæjarstjórn að þær verði samþykktar.
  
  Samþykkt samhljóða.
  Bókun fundar Til máls tóku JÓK og SGA.
  
• 5.2 2202006 Lausafjárstaða 2022
  Bæjarráð - 586 Lagt fram yfirlit yfir lausafjárstöðu.
  
• 5.3 2202005 Greitt útsvar 2022
  Bæjarráð - 586 Lagt fram bráðabirgðayfirlit yfir greitt útsvar. Skv. yfirlitinu hefur greitt útsvar lækkað um 1,3% miðað við sama tímabil í fyrra.
  
• 5.4 2204001 Tillaga um afskriftir viðskiptakrafna
  Bæjarráð - 586 Lögð fram tillaga um afskrift viðskiptakrafna Grundarfjarðarbæjar að fjárhæð 36.389 kr.
  
  Samþykkt samhljóða.
  
• 5.5 2203052 Alþingi - 418. mál til umsagnar
  Bæjarráð - 586 Lögð fram til kynningar tillaga til þingsályktunar frá heilbrigðisráðherra um mótun stefnu í aðdraganda aðgerðaáætlunar í heilbrigðisþjónustu við aldraða til ársins 2030.
  
  Bæjarstjóra falið að gera umsögn um málið í samræmi við umræður á fundinum.
  
  Samþykkt samhljóða.
  
• 5.6 2203048 Samband íslenskra sveitarfélaga - Viðmiðunarreglur um framlög til stjórnmálaflokka
  Bæjarráð - 586 Lagt fram til kynningar bréf Sambands íslenskra sveitarfélaga, dags. 25. mars sl., um viðmiðunarreglur um framlög til stjórnmálaflokka.
  
• 5.7 2203059 Hesteigendafélag Grundarfjarðar - Ársreikningur 2021
  Bæjarráð - 586 Lagður fram til kynningar ársreikningur Hesteigendafélags Grundarfjarðar vegna ársins 2021.
  
• 5.8 2203045 Artak ehf - Ársreikningur 2021
  Bæjarráð - 586 Lagður fram til kynningar ársreikningur Artaks ehf. vegna ársins 2021.
  

Málsnúmer 2204003FVakta málsnúmer

• 6.1 1808033 Málefni leikskólans
  Gestir undir þessum dagskrárlið eru Heiðdís Lind Kristinsdóttir leikskólastjóri, Sigurborg Knarran Ólafsdóttir fulltrúi starfsfólks og Karítas Eiðsdóttir fulltrúi foreldra.
  
  Leikskólastjóri lagði fram minnispunkta sína.
  Einnig lá fyrir fundinum erindi leikskólastjóra um breytingu á skóladagatali, dags. 25. mars 2022, sem áður hafði verið samþykkt rafrænt af nefndarmönnum.
  
  Skólanefnd - 161 Leikskólastjóri fór yfir minnispunkta um starfsemi leikskólans.
  Eftirfarandi kom fram í minnispunktum hennar:
  
  Starfsmannamál og nemendur
  Starfið í vetur hefur falið í sér heilmiklar áskoranir. Covid og veikindi hafa sett strik í reikninginn, auk þess sem þó nokkrir starfsmenn eru í leyfi og hefur þurft að fá starfsfólk í afleysingar. Mönnun eldhúss hefur reynst umtalsverð áskorun.
  
  Nýr starfsmaður hefur störf í lok apríl og þá verður hægt að taka inn fjögur ný börn sem urðu/verða 12 mánaða í mars og apríl. Þá eru orðin ellefu börn á yngstu deildinni, músadeild. Þau hafa verið átta, en eitt barn færist nú yfir á ugludeild. Rýmið fyrir þau yngstu, sem búið var til með kerfisveggnum, hentar nú illa stærðarlega séð. Verið er að skoða fyrirkomulag og möguleika í rýminu.
  
  Starfið
  Í vetur hefur verið farið í íþróttahúsið og klifurhúsið þegar veður hefur leyft - og hefur það verið frábær viðbót við starfið. Elsta deildin hefur einnig verið að fara á bókasafnið undanfarið. Leikskólastjóri segir frábært að geta átt samstarf um þetta og að geta boðið upp á fjölbreytt starf.
  Leikskólastjóri er farin að huga að næsta vetri, hvernig húsnæðið hentar og árgangar eru samsettir.
  
  Faglegt starf og umbótavinna
  Spennandi vinna er í gangi við að byggja upp faglegt starf leikskólans eftir ákveðnum gæðaviðmiðum, en þar hefur verið unnið með skólaráðgjöfum frá fyrirtækinu Ásgarði, sem sérhæfir sig í skólaráðgjöf. Starfsdagur leikskólans þann 18. mars sl. var mjög vel heppnaður, þar sem farið var yfir grunnþætti menntunar og var hafin vinna við deildarnámskrár. Mikil ánægja er með að hefja þá vinnu og með að efla enn frekar faglega starfið.
  
  Leikskólastjóri gerði grein fyrir þeim verkefnum sem Ásgarður liðsinnir stjórnendum og starfsfólki nú með. Það eru verkefni sem felast í að rýna dagsskipulag skólastarfsins, en þá er starfið skoðað „tíma fyrir tíma“ yfir daginn. Fundið er út hvernig tíminn og mannauðurinn sé sem best nýttur í þágu skólastarfs barnanna. Út úr þeirri rýni vinnur starfsfólkið tillögur að mögulegum umbótum.
  Einnig er verið að endurskoða starfslýsingar, skoða verklýsingar, vinna við starfsáætlun næsta skólaárs, endurskoða námsskrána, auk þess sem deildarnámskrár eru í vinnslu núna eins og áður sagði.
  Einnig vinnur Ásgarður að því með stjórnendum að endurskoða fyrirkomulag og verklag sérkennslu og stuðnings. Sjá einnig næsta dagskrárlið.
  
  Heimasíða leikskólans
  Leikskólastjóri hefur lagt áherslu á að heimasíða leikskólans sé aðgengileg, snyrtileg og í sinni því hlutverki að vera handbók bæði foreldra og einnig starfsfólks: að öll þau gögn sem eiga að vera til séu aðgengileg þar inni. Í samráði við bæjarstjóra var ákveðið að fá tilboð og ganga til samnings við Stefnu um að setja upp nýjan vef fyrir leikskólann, og er hann í samræmi við vef bæjarins.
  Heimasíðan er gluggi inn í skólastarfið, og mikilvægur ekki síst fyrir fólk sem er að flytja t.d. í sveitarfélagið.
  
  Námsferð
  Starfsfólks leikskólans fer í námsferð á Akueyri dagana 26. - 28. maí nk. og er skipulagning í gangi. Ætlunin er að skoða aðra leikskóla, fræðast og fá innblástur. Starfsdagur leikskólans verður 27. maí og óskaði leikskólastjóri eftir breytingu á skóladagatali þannig að starfsdagur í byrjun júní færist til 27. maí.
  Vorgleði starfsmannafélags leikskólans verður einnig hluti af ferðinni þar sem starfsfólkið ætlar að gera sér dagamun og enda þennan vetur saman á gleðilegum nótum.
  
  Leikskólakennarar
  Á næstunni verður auglýst eftir starfsfólki fyrir næsta vetur, leikskólakennurum þá sérstaklega. Ánægjulegt er þó að það er að fjölga hjá okkur um einn leikskólakennara þegar Sigurborg útskrifast í vor og einnig er starfsfólk að ljúka fyrri áfanga í grunnnámi, sem er frábær þróun, segir leikskólastjóri.
  
  Heiðdísi var þakkað fyrir yfirferðina.
  
  Undir þessum dagskrárlið er einnig erindi leikskólastjóra frá 25. mars sl. þar sem hún óskar eftir að skólanefnd samþykki breytingu á skóladagatali, þannig að starfsdagur sem vera átti 3. júní 2022 verði 28. maí 2022. Með þeirri breytingu verður hægt að fara í endurmenntunar- og starfsmannaferð. Nefndarmenn höfðu áður samþykkt ósk leikskólastjóra rafrænt og er sú ákvörðun staðfest með bókun nú.
  
  
• 6.2 2203043 Leikskólinn Sólvellir - Skipulag skólastarfs 2022
  Undir þessum dagskrárlið sátu áfram sömu gestir og undir dagskrárlið nr. 1.
  
  Fyrir fundinum lá tillaga til umsagnar skólanefndar, um barngildisviðmið og mönnun, sem og reglur um fáliðun fyrir Leikskólann Sólvelli.
  
  Skólanefnd - 161 Formaður sagði frá því að í gær, á fundi bæjarráðs, hefðu bæjarfulltrúar og skólanefndarfulltrúar fengið kynningu Gunnþórs E. Gunnþórssonar, skólaráðgjafa hjá Ásgarði, en hann fór yfir tilurð vinnu við setningu barngildisviðmiða og drög að reglum um fáliðun á leikskólum. Með tillögum sem nú liggja fyrir er verið að skerpa á þeim viðmiðum sem unnið hefur verið eftir. Tillögurnar eru unnar með stjórnendum Leikskólans Sólvalla og hafa verið kynntar starfsfólki, og eru þær hluti af frekari vinnu við að styrkja starf leikskólans.
  
  Skv. reglunum er gert ráð fyrir að grunnmönnun sé 8 börn á hvert stöðugildi. Að jafnaði skulu stöðugildi vera í takt við fjölda barna, en fjöldi barna á hvert stöðugildi fækkar með lækkandi aldri, og er miðað við 4 börn á hvert stöðugildi í yngsta aldurshópnum.
  
  Til viðbótar koma svo stöðugildi sem miða við stuðningsþarfir barna hverju sinni. Unnið er að verklagsreglum um sérkennslu og stuðning, sem verða lagðar fyrir skólanefnd til umsagnar á næstu vikum.
  
  Fáliðun telst þegar fáir starfsmenn eru við vinnu og viðmiðið er að fjöldi barna fari ekki yfir 8 á hvern starfsmann og færri eftir því sem börnin eru yngri, sbr. það sem fyrr segir.
  Reglurnar gera grein fyrir því til hvaða úrræða skuli gripið ef fjöldi barna á hvert stöðugildi fer yfir grunnviðmið.
  
  Fram fór umræða fundarmanna um tillögurnar. Fram kom að reglurnar verði einnig kynntar fyrir foreldrum/forráðamönnum leikskólabarna.
  
  Skólanefnd fagnar framlögðum tillögum og þeirri vinnu sem fram hefur farið. Skólanefnd leggur til við bæjarstjórn að reglurnar verði samþykktar.
  
  
  Að lokinni umræðu um þennan lið véku gestir af fundi og var þeim þakkað fyrir komuna.
  
  
• 6.3 2203016 Mennta- og barnamálaráðuneytið - Orðsending frá mennta- og barnamálaráðherra
  Lagt fram erindi mennta- og barnamálaráðherra frá 22. febrúar 2022 þar sem fram kemur að samræmd könnunarpróf verði ekki lögð fyrir á árinu 2022. Hafin sé vinna við hönnun Matsferils, nýrrar yerkfærakistu kennara og skóla. Matsferill mun innihalda fjölbreytt og hnitmiðuð verkfæri fyrir kennara, til nota í umbótaskyni, nemendum til hagsbóta. Ráðuneytið gerir ráð fyrir að vorið 2022 liggi fyrir verkáætlun um innleiðingu Matsferils.
  Skólanefnd - 161
• 6.4 2203021 Mennta- og barnamálaráðuneytið - Orðsending vegna fyrirlagnar PISA 2022
  Lagt frá bréf mennta- og barnamálaráðuneytis frá 3. mars 2022, þar sem óskað er eftir góðu samstarfi við nemendur, starfsfólk grunnskóla, sveitarfélög og skólaþjónustu sveitarfélaga um þátttöku í PISA könnuninni sem framundan er.
  
  Skólanefnd - 161 Í bréfinu kemur eftirfarandi fram:
  
  "PISA er alþjóðleg könnun á vegum Efnahags- og framfarastofnunarinnar (OECD) sem mælir lesskilning 15 ára nemenda og læsi þeirra á stærðfræði og náttúruvísindi á þriggja ára fresti. Einnig fylgja ýmsir spurningalistar með PISA könnuninni sem gefa mikilvægar upplýsingar. PISA könnunin sem nær til yfir 80 þjóða er eina alþjóðlega samanburðarrannsóknin á frammistöðu menntakerfisins sem fram fer hér á landi."
  
  
• 6.5 2202018 Samtök sveitarfélaga á Vesturlandi - Barnamenningarverkefni
  Lagt fram fréttabréf SSV og erindi um "List fyrir alla".
  
  Einnig var rætt um að í gær rann út frestur til að sækja um styrk í Barnamenningarsjóð, en sótt er um til Rannís. Bæjarstjóri sagði frá því að Grundarfjarðarbær hefði sótt um styrk í Barnamenningarsjóð til að efla listgreinar í dagskrá sumarnámskeiðs fyrir börn í 1.-4. bekk.
  
  Skólanefnd - 161

Málsnúmer 2204002Vakta málsnúmer

Málsnúmer 1808015Vakta málsnúmer

Málsnúmer 1806014Vakta málsnúmer

Málsnúmer 2201015Vakta málsnúmer

Málsnúmer 2203043Vakta málsnúmer

Málsnúmer 2009014Vakta málsnúmer

Málsnúmer 2204004Vakta málsnúmer

Málsnúmer 2203002Vakta málsnúmer

Málsnúmer 2203058Vakta málsnúmer

Málsnúmer 2203034Vakta málsnúmer

Málsnúmer 2203032Vakta málsnúmer

Málsnúmer 2203040Vakta málsnúmer

Málsnúmer 2203057Vakta málsnúmer

Málsnúmer 2203054Vakta málsnúmer

Málsnúmer 2203049Vakta málsnúmer

Málsnúmer 2203051Vakta málsnúmer

Málsnúmer 2203055Vakta málsnúmer

Málsnúmer 2203050Vakta málsnúmer

Málsnúmer 2204007Vakta málsnúmer