13.11.2009
Stjórnsýsla - fréttir

„Bæjarstjórn Grundarfjarðarbæjar tekur undir ályktun stjórnar Hafnasambands Íslands frá 2. nóvember 2009, þar sem mótmælt er harðlega hugmyndum um upptöku skatts á farþega skemmtiferðaskipa og tvöföldun vitagjalds.

Á undanförnum árum hefur Grundarfjarðarhöfn lagt í umtalsverða markaðssetningu á höfninni til að laða að aukinn fjölda skemmtiferðaskipa.  Áform stjórnvalda geta,  ef af verða,  kippt grunninum undan þessari starfsemi  og hleypt fjárfestingu heimamanna í innviðum hafnarinnar og markaðssetningu í uppnám. 

 

„Stjórn Hafnasambands Íslands mótmælir harðlega öllum hugmyndum um

upptöku nýs skatts á ferðamenn á Íslandi og hækkun vitagjalds, en hvort

tveggja mun leiða til aukinnar gjaldtöku af farþegum og útgerðum

skemmtiferðaskipa sem leggja leið sína til landsins.

Stjórn hafnasambandsins skorar á ríkisstjórnina að endurskoða þessar

fyrirætlanir, sem munu ef af verður skaða þá markaðssetningu sem hafnir og

ferðaþjónustuaðilar hafa staðið fyrir á liðnum árum varðandi

skemmtiferðaskipin og fækka verulega komum þessara skipa til landsins. Það

mun hafa ófyrirsjáanlegar afleiðingar til hins verra fyrir fjárhag þeirra hafna,

sem skemmtiferðaskipin hafa átt viðskipti við eða stefna að viðskiptum við.

 

Greinargerð:

Nú er að störfum nefnd fjármálaráðuneytisins sem skoðar valkosti um skattlagningu

vegna komu ferðamanna til Íslands, þ.m.t. skatt á farþega skemmtiferðaskipa. Þá liggur

fyrir tillaga um tvöföldun svonefnds vitagjalds, sem skilar ríkissjóði nú þegar 145

m.kr., en er áætlað að skili um 290 m.kr. á árinu 2010. Stjórn Hafnasambands Íslands

hefur skilning á þörf ríkissjóðs til frekari tekjuöflunar, en varar við handahófskenndri

skattlagningu af þessum toga. Á síðustu árum hafa hafnir og ferðaþjónustuaðilar unnið

öflugt markaðsstarf við að fjölga komum skemmtiferðaskipa til Íslands og hefur

farþegum með þessum skipum einnig fjölgað verulega. Ríkissjóður hefur notið góðs af

þessari markaðssetningu án þess að leggja fram teljandi fjármuni. Stjórn Hafnasambands

Íslands hvetur ráðherra ríkisstjórnarinnar að gæta hófs í nýrri skattlagningu

af þessum toga og varar við afleiðingum óskynsamlegrar skattlagningar. Þá undrast

stjórnin að á sama tíma og hafnir, sem flestar standa afar höllum fæti fjárhagslega, eru

hvattar til að gæta hófs í breytingum á gjaldskrám, þá gengur ríkissjóður fram í

veigamiklum hækkunum skatta. Stjórn Hafnasambands Íslands bendir á eftirfarandi í

þessu efni:

 

a) Ný skattlagning á farþega skemmtiferðaskipa heggur í heimildir hafna til gjaldtöku

samkvæmt hafnalögum.

b) Bent er á reynslu frá Alaska og Noregi þar sem vanhugsuð gjöld drógu úr fjölda

ferðamanna.

c) Af hálfu hafna kemur ekki til greina að hafnirnar annist innheimtu fyrir ríkissjóð á

nýjum farþegaskatti.

d) Samkvæmt lögum er gert ráð fyrir að vitagjald standi undir rekstri

Siglingastofnunar. Þar er nú gert ráð fyrir 10% niðurskurði og verulegum

breytingum á starfsemi stofnunarinnar þannig að hækkun vitagjaldsins er

augljóslega hugsuð sem nýr tekjustofn ríkissjóðs.

e) Hækkun vitagjaldsins mun væntanlega nema hærri fjárhæð en heildarhækkun

hafna á gjaldskrám sínum fyrir árið 2010.

f) Hækkun vitagjaldsins og nýr farþegaskattur munu skaða þá markaðssetningu sem

hafnir og ferðaþjónustuaðilar hafa staðið fyrir á liðnum árum varðandi

skemmtiferðaskipin.““

Aftur í fréttayfirlit