Artak350 Residency í Grundarfirði - Adelina Ivan myndlistamaður frá Rúmeníu

Artak350 Residency í Grundarfirði - Adelina Ivan myndlistamaður frá Rúmeníu (fréttatilkynning)

Verið hjartanlega velkomin á sýningu Artak350 í Grundarfirði!

Gestalistamaður mánaðarins, Adelina Ivan, sýnir ný verk bæði inni á vinnustofunni og úti, nánar tiltekið á salthaug í næsta nágrenni við vinnustofuna að Grundargötu 26 í Grundarfirði.

Verkin á sýningunni eru innsetningar, unnar með blandaðri tækni, málað og teiknað á pappír, textíl og gler.

Adelina Ivan ber saman eftirlíkingu og hið náttúrulega, ásamt því að vitna í form og lögun mannslíkamans í innsetningu sinni. Hún dregur innblástur úr íslenskri náttúru þar sem fjöllin í bakgrunni ramma inn salthaug þar sem komið hefur verið fyrir skúlptúr sem minnir samtímis á línur landslagsins í kring og útlínur mannveru.

Í skissum og teikningum sem hún sýnir á vinnustofu sinni samhliða innsetningunni tileinkar hún verkið síendurteknum hreyfingum þar sem línulegur gangur tímans er afhjúpaður. Huglæg form lýsa tvíhyggju líkamans sem landslagi, auk þess sem þau ná að fanga einfaldleika náttúrunnar í línum. Grundvöllur listrænnar tjáningar Adelinu er félagsleg og menningarleg gagnrýni á hefðbundnar birtingarmyndir kvenlíkamans. Hún notar líkamann til þess að sýna jafnvægi milli styrks og veikleika, varnarleysis og verndar, hverfulleika og varanleika, ásamt því að miðla hugmyndum um hrynjanda og endurteknar hreyfingar.

Adelina Ivan (fædd 1971 í Búkarest, Rúmeníu) útskrifaðist frá Listahálskólanum í Búkarest með MA-gráðu árið 1998. Síðan þá hefur hún sýnt í heimalandinu Rúmeníu, bæði einkasýningar og tekið þátt í samsýningum ásamt því að hafa einnig sýnt víða erlendis, þar á meðal í Þýskalandi, Frakklandi, Austurríki, Tyrklandi, Tokyo og New York. Þetta er hennar fyrsta sýning á Íslandi.