16,7 milljóna króna sparnaður með endurnýtingu malbiks í Grundarfirði

650 m3 eða rúmlega 1.500 tonn af malbiki var kurlað niður í sumar

Grundarfjarðarbær tók mikilvægt skref í átt að aukinni endurnýtingu og hagkvæmari framkvæmdum í sumar þegar 650 rúmmetrar, eða rúmlega 1.500 tonn, af upprifnu malbiki voru kurlaðir og endurnýttir í stað þess að flytja efnið til förgunar og kaupa nýtt efni í staðinn. Aðgerðin skilaði samkvæmt kostnaðarsamantekt um 16,7 milljóna króna beinum sparnaði, eða um 89,5% lægri kostnaði miðað við þá leið að flytja efnið til förgunar og kaupa sambærilegt nýtt efni.

Malbik fellur reglulega til þegar unnið er að endurnýjun gatna, gangstétta og lagna í bænum. Í stað þess að líta á upprifið malbik sem úrgang var ákveðið að safna því saman og kurla á staðnum þannig að hægt væri að nýta efnið aftur innan sveitarfélagsins.

Minni flutningar og betri nýting hráefna

Ávinningurinn er ekki aðeins fjárhagslegur. Ef malbikið hefði verið flutt frá Grundarfirði til endurvinnslu hefðu þurft um 43–44 vörubílsferðir, eða samtals um 17.300 km akstur samkvæmt útreikningum bæjarins. Með því að vinna efnið á staðnum fellur sá akstur niður. Jafnframt dregur endurnýting efnisins úr þörf fyrir nýtt námuefni sem annars þyrfti að vinna, flytja og kaupa. Þannig fer fjárhagslegur ávinningur verkefnisins saman við minni þungaflutninga og betri nýtingu hráefna.

Verkefnið fellur jafnframt vel að áherslu sveitarfélagsins um sjálfbærni og ábyrga nýtingu auðlinda. Það er einnig gott dæmi um hringrásarhagkerfi í framkvæmd, þar sem efni sem áður hefði þurft að flytja frá svæðinu er þess í stað unnið og nýtt áfram sem hráefni í framkvæmdum. Með því má draga úr þörf fyrir ný hráefni og efnistöku og nýta betur þau efni sem þegar eru til staðar.

Þessi nálgun hefur einnig skýra tengingu við loftslagsmál. Minni efnisflutningar og minni þörf fyrir vinnslu og flutning nýrra hráefna geta dregið úr kolefnisspori framkvæmda. Verkefnið sýnir þannig hvernig sveitarfélag getur samþætt hringrásarhugsun og loftslagsáherslur inn í hefðbundnar gatnaframkvæmdir.

Gamalt malbik fær nýtt hlutverk

Kurlaða malbikið nýtist sem undirlag og burðarefni við ýmsar framkvæmdir. Hluti þess hefur þegar fengið nýtt hlutverk, meðal annars við Ölkelduveg 17, þar sem malbikskurl var lagt niður og þjappað sem undirlag fyrir bráðabirgðagönguleið. Einnig var það nýtt í holuuppfyllingar við höfnina og við námu bæjarins.

Markmiðið er að þessi vinnubrögð verði fest í sessi sem verkferill við framkvæmdir og viðhald gatna hjá Grundarfjarðarbæ.

Verkefnið sýnir með einföldum hætti hvernig breytt verklag getur skilað miklum ávinningi. Efni sem áður hefði skapað kostnað við flutning og förgun verður að verðmætu hráefni fyrir næstu framkvæmdir bæjarins.

Það er í senn hringrásarhugsun, umhverfisvernd og góð meðferð fjármuna sveitarfélagsins.