Aðventugluggar 2021

Fyrsti jólaglugginn 2020, í Ráðhúsinu.

Aðventan er handan við hornið og Grundarfjarðarbær er hægt og rólega farinn að taka á sig vetrarlega mynd, með fallegum ljósum og skreytingum sem minna á aðventuna framundan. Í fyrra brydduðum við upp á skemmtilegri nýjung, Aðventugluggunum, sem lýstu virkilega upp bæinn okkar á aðventunni.

Þar sem þeir slógu svo vel í gegn í fyrra þá höfum við ákveðið að endurtaka leikinn og halda áfram með jólagluggana, sjá nánar hér.  

Á hverjum degi frá 1. til 24. desember opnast einn jólagluggi, sem fyrirtæki, stofnun eða íbúi í Grundarfirði hefur skreytt og býður vegfarendum að kíkja á gluggann. Gluggarnir voru hver öðrum skemmtilegri í fyrra og gaman að sjá mismunandi útfærslur. Það þarf ekki að vera mikið, dýrt eða flókið - einfalt er gott!

Eins og í fyrra geta fyrirtæki, stofnanir eða einstaklingar tekið þátt.

Menningarnefnd auglýsir eftir áhugasömum aðilum til að taka þátt í þessu verkefni með okkur.

Á hverjum degi til jóla birtum við mynd af aðventuglugganum snemma morguns á vef og Facebook-síðu Grundarfjarðarbæjar, þar sem fólki gefst tækifæri til að reyna að giska á hvar hann er í bænum. Það er líka tilvalin hreyfistund með fjölskyldunni á aðventunni, að fara saman út að skoða jólagluggana í bænum.

Áhugasamir eru vinsamlegast beðnir um að hafa samband við Þuríði Gíu á bæjarskrifstofunni á netfangið thuri(hjá)grundarfjordur.is fyrir mánudaginn 22. nóvember.

Aðventukveðjur,

Menningarnefnd