CLIA og Cruise Iceland í Grundarfirði

Frá vinstri: Hans Chen Braas svæðisstjóri Norðurlanda og Eystrasaltsríkja CLIA, Ragnhildur Sigurðardóttir þjóðgarðsvörður Snæfellsjökulsþjóðgarði, Elín Hróðný Ottósdóttir umboðsmaður skipafélaganna fyrir Snæfellsnes, Pálmi Jóhannsson forstöðumaður menningar- og markaðsmála, Margrét Björk Björnsdóttir fagstjóri áfangastaða- og markaðssviðs SSV, Birkir Jón Jónsson bæjarstjóri, Sigurður Jökull Ólafsson framkvæmdarstjóri Cruise Iceland, Nikos Mertzanidis framkvæmdarstjóri CLIA, Ingvar Örn Jónsson ráðgjafi og Hafsteinn Garðarson hafnarstjóri.

 CLIA og Cruise Iceland í heimsókn í Grundarfirði

Nikos Mertzanidis framkvæmdarstjóri CLIA (Cruise Line International Association) og Hans Chen Braas CLIA-svæðisstjóri fyrir Norðurlönd og Eystrasaltsríkin heimsóttu Grundarfjörð í síðustu viku ásamt Sigurði Jökli Ólafssyni framkvæmdarstjóra Cruise Iceland. Hópurinn var á ferð um landið í þeim tilgangi að hitta sveitastjórnarfólk og hafnarstarfsfólk og ræða framtíð skemmtiferðaskipakoma til Íslands.

 Sigurður Jökull hefur verið tíður gestur í Grundarfirði og hafa Nikos og Hans einnig komið áður, síðast fyrir rúmu ári síðan og höfðu þeir orð á því hvað það væri gaman að sjá alla þá uppbyggingu sem hefur átt sér stað á höfninni undanfarin ár. Má þar nefna að í júlí var lokið við að bæta við nýrri flotbryggju og stækka móttökusvæði fyrir gesti. Þessi framkvæmd gerir það að verkum að Grundarfjarðarhöfn getur tekið á móti tveimur skemmtiferðaskipum á ankeri á sama tíma.

Eins og áður segir var hljóðið í hópnum gott hvað varðar Grundarfjörð og Grundarfjarðarhöfn en áhyggjuraddir heyrast hinsvegar varðandi Ísland í heild sem áfangastað. Síðustu þrjú ár hafa einkennst af mikilli óvissu í sambandi við innviðagjald og nýjum reglum um að leiðangursskip sem sigla innan íslenskrar lögsögu séu viðrisaukaskattskyld. Umhverfið skemmtiferðaskipa á Íslandi hefur einkennst af ófyrirsjáanleika sem hefur orðið til þess að skipakomum hefur almennt fækkað milli ára og hefur þetta mikil áhrif á smærri byggðarlög eins og Grundarfjörð. Skv. upplýsingum frá Cruise Iceland námu efnahagsleg áhrif skemmtiferða- og leiðangursskipa á Íslandi meira en 40 milljörðum króna árið 2023.

Fundurinn var góður og var m.a. rætt um hvort það sé grundvöllur fyrir því að skemmtiferðaskip geti komið fyrr á vorin og siglt lengra inn í veturinn og þannig stækkað skemmtiferðaskipatímabilið. 28. október í fyrra kom Vasco da Gama til hafnar og hefur skemmtiferðaskip aldrei komið eins seint á árinu til Grundarfjarðar. Það er því ljóst að tækifæri eru til staðar. Virkt samtal og samvinna sveitarfélaga, hafna, skemmtiferðaskipaútgerða, ferðaþjónustu og hagsmunaaðila er lykillinn að áframhaldandi velgengni.