Dagur vatnsins var haldinn hátíðlegur 22. mars

Fjölmenni mætti á Dag vatnsins sem haldinn var í Samkomuhúsi Grundarfjarðar 22. mars.

Dagur vatnsins var haldinn hátíðlegur í Samkomuhúsi Grundarfjarðar sunnudaginn 22. mars síðastliðinn. Dagur vatnsins er alþjóðlegur hátíðisdagur Sameinuðu þjóðanna og er ætlað að undirstrika mikilvægi ferskvatns. 

Vatn er lífsnauðsynlegt - sama í hvaða formi það birtist. Það er ís, snjór, rennandi vatn, sjór og votlandi, en einnig gufa og raki í loftinu. Vatn snertir allt í lífi okkar; vinnuna, afþreyinguna og sjálf lifibrauðið.  

Fyrir rúmu ári síðan fékk Grundarfjarðarbær LIFE-styrk frá Evrópusambandinu til þess að bæta blágrænum ofanvatnslausnum í þéttbýli þar sem aðalmarkmiðið er að minnka álag úrkomu á fráveitukerfið og skila af okkur hreinna vatni til sjávar, en með breyttu loftslagi eru stórir úrkomuviðburðir að aukast í bænum. Hægt er að lesa nánar um verkefnið hér. 

Dagurinn heppnaðist vel og var þátttaka góð. Húsið opnaði kl. 14:00 og strax fór straumur fólks að flæða inn. Félagasamtök og stofnanir voru með bása þar sem þau voru að kynna sig, selja varning og sýna afrakstur vinnu. Katrín Lilja Sigurðardóttir, Sprengju Kata, kom og gerði tilraunir sem gestir og gangandi fylgdust áhugasamir með. 

Á dagskrá var:

• Sjómannadagsráð var með fiska til sýnis sem hægt er að veiða í Breiðafirði. 
• Lionsklúbbur Grundarfjarðar bauð upp á sína frægu fiskisúpu.
• Leikskólinn Sólvellir og 1. og 2. bekkur Grunnskóla Grundarfjarðar sýndu listaverk tengd vatni. 
• Steinunn og Heiðar - nemendur á unglingastigi Grunnskóla Grundarfjarðar sýndu listaverkið "Vatnið"
• Bergrós María Arnarsdóttir nemandi Tónlistarskóla Grundarfjarðar spilaði lagið Lækurinn á píanó. 
• Land og Skógur var með fræðslu um votlendi.
• Snæfellsjökulsþjóðgarður var með kynningu á sínu starfi og fræðslu og jökul og hraun. 
• Umhverfisvottun Snæfellsness var með fræðslu um umhverfismál. 
• Svæðisgarðurinn Snæfellsnes var með kynningu um UNESCO Vistvang. 
• Kvenfélagið Gleym-mér-ei var með kynningu á sínu starfi og sölubás.
• Björgunarsveitin Klakkur var með kynningu á sínu starfi og sýndi búnað. 
• Slökkvilið Grundarfjarðarbæjar bauð gestum að skoða dælubílinn sinn. 

Grundarfjarðarbær þakkar öllum kærlega fyrir þátttökuna, hjálpina og komuna og hlakkar til að sjá ykkur að ári.