Forvarnardagurinn í Grunnskóla Grundarfjarðar

Forvarnardagurinn var haldinn í þriðja sinn þann 6. nóvember.  Nemendur í 9. bekk um allt land eru þátttakendur í forvarnardeginum.  Nemendur í 9. bekk Grunnskóla Grundarfjarðar létu ekki sitt eftir liggja og dagskráin byrjaði á því að Tómas Freyr Kristjánsson, fulltrúi Ungmennafélagsins, kom í heimsókn.  Hann afhenti nemendum upplýsingar um net-ratleik og gaf þeim penna.  Tómas Freyr spjallaði síðan við nemendur um það sem Ungmennafélagið hefur upp á að bjóða og nemendur spurðu hann spurninga.  Þar kom m.a. fram að mikill áhugi er meðal nemenda á að æfa handbolta.

 Eftir að Tómas kvaddi þá horfðu nemendur á myndband þar sem forseti Íslands, herra Ólafur Ragnar Grímsson, og fleiri þjóðþekktir einstaklingar töluðu til þeirra og gáfu góð ráð um það hvernig ætti að forðast áfengis- og vímuefni.  Síðan kom að eiginlegri vinnu nemendanna en þeir áttu að ræða og svara spurningum um samveru, íþrótta- og æskulýðsstarf og að hvert ár skipti máli.  Nemendur höfðu ákveðnar skoðanir á þessum málefnum og komu fram með marga góða punkta.  Niðurstöður þessarar verkefnavinnu eru svo sendar til skipuleggjenda forvarnardagsins sem vinna síðan áfram með þær.               

Dagurinn endaði síðan á því að nemendur unnu veggspjöld úr umræðum dagsins.  Nemendur 9. bekkjar voru ánægðir með daginn og það er engin spurning að forvarnardagurinn er gott framtak og skilar góðum árangri.