SSV-Þróun og ráðgjöf hefur um árabil staðið fyrir tilnefningu á Frumkvöðli Vesturlands. Þar hafa verið tilnefnd fyrirtæki, einstaklingar og samtök sem þykja hafa sýnt frumkvæði í þróun vöru, þjónustu eða viðburða fyrir landshlutann. Í ljósi breyttra efnahagslegra forsenda hefur verið ákveðið taka upp samstarf við Vaxtarsamning Vesturlands og veita peningaverðlaun fyrir fyrstu þrjú sætin í keppninni.
 

Til að hljóta tilnefningu þurfa verkefni að vera komin af hugmyndastigi á frumstig framleiðslu eða rekstrar. Þau þurfa að styðja með beinum hætti við uppbyggingu atvinnulífs á Vesturlandi en ekki er krafa um að umsækendur séu Vestlendingar. Verkefnin verða metin af sérstakri matsnefnd með hliðsjón af nýsköpunargildi, trúverðugleika og framfaragildi verkefnisins fyrir Vesturland. Dómnefnd velur þrjú áhugaverðustu verkefnin og hljóta þau verðlaun í formi fjárstyrks og ráðgjafar og jafnframt fá tilnefnd verkefni viðurkenningarplagg.

Frestur til að skila inn tilnefningum er til 6. maí nk. og verðlaunin verða afhent á Frumkvöðladegi Vesturlands.

 

Frétt af vef Samtaka sveitarfélaga á Vesturlandi.