Hvað var gert með hugmyndir íbúa?

Á íbúafundi í nóvember gátu þátttakendur komið því á framfæri við bæjarstjórn, hvar þeir telja að slá megi af kröfum í starfsemi bæjarins.  Þessar ábendingar voru teknar til skoðunar við gerð fjárhagsáætlunar og hafa sumar komið til framkvæmda og aðrar ekki. 

·         Ekki verða neinar gatnaframkvæmdir, nema eftir því sem nauðsyn krefur og í sumar verða færri starfsmenn í áhaldahúsi. Líklega verður eitthvað dregið úr slætti á opnum svæðum en þó lögð áhersla á að halda bænum snyrtilegum. Bæjarstjórn hefur skipað starfshóp um skólamál sem m.a. á að skoða sameiningu skólastofnana. 

·         Á fundinum var talsvert rætt um sameiningu sveitarfélaga og má geta þess að stóru bæjarfélögin á norðanverðu Snæfellsnesi hafa tekið upp viðræður um mögulegt samstarf á ýmsum sviðum. 

·         Dregið hefur verið úr götulýsingu.

·         Klukka er á ljósum á sparkvelli sem slekkur ljós kl. 22 og völlurinn er ekki lengur upphitaður.

·         Fram komu hugmyndir um að draga úr snjómokstri, en ekki var talið mögulegt að gera það. 

·         Ekki var heldur vilji til þess, að svo stöddu, að skerða þjónustu í heilsdagsskóla eða að hækka aldursmörk í leikskóla. 

·         Stungið var upp á fjölgun fjarfunda í stjórnsýslunni og að draga úr veitingum á fundum.  Fjarfundir eru raunhæfur möguleiki eftir því sem eykst samstarf innan Snæfellsness – sem vonandi verður. Veitingar á fundum eru hófstilltar og kostnaður í samræmi við það sem gengur og gerist, en þó alltaf gott að hafa kveikt á sparnaðarvitundinni. 

·         Nefnd voru ýmis atriði þar sem frumkvæðið er í höndum íbúanna sjálfra og bærinn getur hvatt til dáða.  Þar má nefna heilsueflingu, sameiningu íþróttafélaga á Snæfellsnesi, sjálfboðavinnu og “…að hver og einn sópi og týni rusl fyrir framan sitt hús og reita og rækta tré eins og grænir gera :)”.

·         Rætt var um að leggja áherslu á eflingu atvinnulífsins og nýta krafta þeirra sem eru á atvinnuleysisskrá í ákveðin átaksverkefni.  Þetta verður tekið til frekari skoðunar. 

·         Þá skal haldið til haga einni hugmynd sem gott er að eiga í handraðanum ef harðnar enn frekar á dalnum í fjárhag og veðurfari:   „Koma upp hestasteinum við banka og heilsugæslu!”