Líf og fjör í Sögumiðstöðinni

Mikið líf er í Sögumiðstöðinni þessa dagana og húsið vel nýtt frá viku til viku. Fastir dagskrárliðir eru í húsinu flesta daga vikunnar, auk annarra viðburða sem bætast við.

Í vetur hefur starfsemin aukist enn frekar og tveir nýir liðir bæst við. Kvikmyndaklúbburinn er á dagskrá flest miðvikudagskvöld og mömmumorgnar eru haldnir á miðvikudagsmorgnum.

Framkvæmdir stóðu yfir í húsinu síðasta sumar og nýuppgert rými er nú tilbúið til notkunar. Stefnt er að því að setja þar upp listasýningu á næstunni.

Föstu hittingarnir í Sögumiðstöðinni eru mikilvægur hluti af félagslífinu í bænum. Þar gefst fólki kostur á að hittast reglulega, spjalla og eiga góða stund saman.

Samverustaðir eins og Sögumiðstöðin geta skipt samfélagið miklu máli, ekki síst fyrir fólk sem er hætt á vinnumarkaði og nýtur ekki lengur þeirra daglegu samskipta sem áður fylgdu vinnunni. Reglulegir hittingar skapa tækifæri til samveru og félagslegra samskipta og geta þannig átt mikilvægan þátt í að vinna gegn félagslegri einangrun.

Eftirfarandi starfsemi er í Sögumiðstöðinni í hverri viku:

• Mánudagar: Vinahús
• Þriðjudagar: Handavinnuhópur
• Miðvikudagar: Mömmumorgnar, Molakaffi og Kvikmyndaklúbbur
• Fimmtudagar: Karlakaffi

Auk þess fer þar fram regluleg starfsemi sem er sjaldnar á dagskrá, meðal annars á vegum Krabbameinsfélagsins og Lions. Eins er haldið mánaðarlegt kaffispjall með bæjarfulltrúum og bæjarstjóra. 

Sögumiðstöðin nýtist einnig vel í kringum stærri menningarviðburði í Grundarfirði. Húsið var mikið notað í kringum Rökkurdaga og Hrekkjavökuna og verður einnig nýtt í tengslum við viðburðinn Grundarfjörður – bókaborgin í nóvember. Þannig nýtist húsið bæði fyrir reglulegt félagsstarf og sem vettvangur menningarviðburða.

Leikskólinn er einnig duglegur að nýta Sögumiðstöðina og á þar fasta tíma tvisvar í viku.

Bókasafnið er sömuleiðis mikilvægur hluti af daglegu lífi í Sögumiðstöðinni og er vel sótt. Þangað koma bæði fastagestir og aðrir sem eiga leið um húsið. Olga tekur vel á móti gestum og gefur sér tíma til að aðstoða þá sem leita til hennar.

Ferðamenn líta einnig öðru hvoru inn í Sögumiðstöðina og fá þar góðar móttökur. Olga svarar spurningum þeirra og veitir upplýsingar um Grundarfjörð og nágrennið, auk þess sem hún leysir úr ýmsum öðrum fyrirspurnum gesta.

Það er alltaf pláss fyrir frekari starfsemi í Sögumiðstöðinni. Grundarfjarðarbær hvetur einstaklinga, hópa og félagasamtök sem hafa áhuga á að nýta Sögumiðstöðina til að hafa samband.

Hugmyndin þarf ekki að vera stór eða flókin. Það getur verið reglulegur hittingur, klúbbur eða önnur starfsemi sem gefur fólki tækifæri til að koma saman og eiga góða stund.