Ályktun bæjarstjórnar um viðhald þjóðvega á Snæfellsnesi

Bæjarstjórn Grundarfjarðarbæjar skorar á samgönguráðherra og fjárlaganefnd Alþingis að tryggja fjármagn til nauðsynlegs viðhalds á þjóðvegi 54, Snæfellsnesvegi og þjóðvegi 56 um Vatnaleið. 
Ástand þjóðvegar 54, frá Borgarnesi, um Mýrar og vestur eftir Snæfellsnesi, er mjög bágborið.
Sig og frostskemmdir hafa gert veginn ósléttan yfirferðar, vegkantar eru víða brotnir og hafa gefið eftir á löngum köflum og vestan Vegamóta er vegurinn of mjór. Á kafla vestan þéttbýlis Grundarfjarðar eru vegkantar einnig lélegir og þarfnast styrkingar. Á sumum stöðum er vatnsagi á vegi mikið vandamál. Sama á við um þjóðveg 56 um Vatnaleið. 
Verulega aukin umferð á síðustu árum, sumar sem vetur, kallar á aukin framlög til Vegagerðarinnar, ekki síst til almenns viðhalds. Þó nýjar vegaframkvæmdir séu af hinu góða, þá má ekki gleymast að sinna viðhaldi eldri vega þannig að sú fjárfesting skili arðsemi; geti þjónað hlutverki sínu og öryggi vegfarenda sé tryggt.
 

Umferð um Snæfellsnes hefur aukist gríðarlega á síðustu árum eða um 50-100% á nokkrum fjölförnum stöðum á þjóðvegi 54 og 56 milli áranna 2012 og 2018.  

Hér má sjá umferðartölur inná korti Vegagerðarinnar: http://www.vegagerdin.is/upplysingar-og-utgafa/umferdartolur-a-korti/

Hér má sjá þróun yfir lengra tímabil: http://www.vegagerdin.is/upplysingar-og-utgafa/umferdin/umfthjodvegum/

Og hér má sjá nokkra lykilstaði á Snæfellsnesi: http://www.vegagerdin.is/upplysingar-og-utgafa/umferdin/tolfrumferdar/

Hér má sjá úttekt sem gerð var 2018 fyrir SSV á umferðaröryggi vega á Vesturlandi.