Fréttir & tilkynningar

Kjörfundur vegna forsetakosninga 26. júní 2004 hefst kl. 10 árdegis og honum lýkur í síðasta lagi kl. 22.   Kjörstaður er í samkomuhúsi Grundarfjarðar, efri sal.   Minnt er á að kosningar fara fram samkvæmt gildandi kjörskrá. Kjörskrá er til sýnis á bæjarskrifstofu Grundarfjarðar, Grundargötu 30 til kjördags á opnunartíma skrifstofunnar, kl. 09:30-12:15 og 13:00-15:30.

Hátíðardagskráin var með hefðbundnu sniði hér í Grundarfirði. Dagurinn byrjaði með sundmóti UMFG og í kjölfarið var hlaupið Grundar- og Kvernárhlaup. Fyrir skrúðgöngu var börnum boðið upp á andlitsmálningu. Að því loknu hélt skrúðgangan með Hesteigendafélag Grundarfjarðar í broddi fylkingar upp í þríhyrning.  

Tveir nýir starfsmenn hafa verið ráðnir í ný störf hjá Grundarfjarðarbæ.  Annars vegar er um að ræða umsjónarmann fasteigna og hins vegar aðalbókara/ritara á bæjarskrifstofu.  Umsjónarmaður fasteigna er Gunnar Pétur Gunnarsson vélfræðingur og rafeindavirki. Hann mun taka til starfa um miðjan ágúst. Aðalbókari/ritari á bæjarskrifstofu er Helga Hjálmrós Bjarnadóttir viðskiptafræðingur. Hún hefur þegar hafið störf.   Þau Gunnar og Helga eru boðin velkomin til starfa hjá Grundarfjarðarbæ!  

Í tilefni þess að áfanga í hreinsunarátaki er lokið bjóða Grundarfjarðarbær og Kaffi 59 til grillveislu við Sögumiðstöð kl. 18:00 í dag.   Allir velkomnir!   

  Glaðst var yfir enn einum áfanga í uppbyggingu Eyrbyggju-sögumiðstöðvar í dag þegar svonefnd Gestastofa var formlega tekin í notkun. Í Gestastofu, sem jafnframt er upplýsingamiðstöð fyrir ferðamenn, er farið ótroðnar slóðir við að koma upplýsingum og fróðleik á framfæri.    

  Miklar annir voru hjá Hafsteini hafnarverði Grundarfjarðarhafnar í dag. Um sexleytið í morgun lagðist fyrsta skemmtiferðaskip sumarsins að stóru bryggju og fyrir hádegi var einnig mætt olíuskipið Kyndill, auk heimaskipa sem komin voru inn til löndunar.  

  Nú liggja fyrir tölulegar upplýsingar sem unnar hafa verið úr umsóknum um skólavist í hinum nýja Fjölbrautaskóla Snæfellinga. Alls sóttu 106 einstaklingar um skólavist og fer aðsóknin langt fram úr væntingum, en gert hafði verið ráð fyrir um 50-60 nemendum fyrsta skólaárið.    

Kjörskrá Grundarfjarðarbæjar vegna forsetakosninga 26. júní 2004 hefur verið yfirfarin og staðfest af bæjarráði.   Kjörskrá liggur frammi á bæjarskrifstofunni almenningi til sýnis frá og með kl. 13.00 miðvikudaginn 16. júní til kjördags á opnunartíma skrifstofunnar, kl. 09:30-12:15 og 13:00-15:30.  

Fyrsta skemmtiferðaskip sumarsins, Funchal, lagðist að bryggju hér í morgun. Með skipinu eru einkum Bretar að þessu sinni og um 150 þeirra ætla að rölta um bæinn í stað þess að fara í skipulagðar ferðir. Funchal stoppar stutt við og mun leggja úr höfn kl. 14 í dag.  

Grundfirðingar hafa löngum verið stoltir af sveitarfélaginu sínu, fallegu landslagi og umhverfi. Það hefur auk þess verið metnaðarmál íbúanna að hafa snyrtilegt og fínt í kringum sig og leggja þannig sitt af mörkum til að skapa samfélag þar sem okkur líður vel og við getum af stolti boðið heim gestum. Okkur hefur á síðustu árum gengið ágætlega í þessari viðleitni – en við getum samt alltaf gert betur.   Nú tökum við á því og gerum skínandi hreint, í bæ og sveit.