Fréttir & tilkynningar

Í tilefni af Degi leikskólans í dag 6.febrúar þá langar okkur hér í leikskólanum Sólvöllum að vekja athygli á verkefni sem við höfum verið að vinna að síðastliðin tvö ár.  Verkefni þetta heitir Lífsleikni og er þróunarverkefni sem unnið var á þremur leikskólum á Akureyri í samvinnu við Háskólann á Akureyri. Verkefnið byggir á 12 dygðum en þær eru: ábyrgð, áreiðanleiki, glaðværð, hjálpsemi, hófsemi, hugrekki, kurteisi, samkennd, sköpunargleði, vinsemd, virðing og þolinmæði.  Megintilgangurinn með þessari vinnu  er að gera börn og starfsfólk tamt að nota hugtökin í máli, leik og starfi.  Í handbók kennara sem fylgir verkefnapakkanum segir m.a.: „Félags-og tilfinningagreind barna er í mótun öll bernskuárin. Því er mikilvægt að byrja snemma að hlúa að og efla þá þætti með einstaklingnum.  Rannsóknir benda til að grunnurinn sé lagður að félags-og tilfinningaþroska á fyrstu árum þess.  Það er hverjum einstaklingi mikilvægt að vera læs á tilfinningar, þ.e. fær um að hafa taumhald á sér og geta sýnt umhyggju og samúð með öðrum“ (Handbók fyrir kennara. 2007. Ritstjóri: Sonja Kro. Akureyri).  

Forsvarsmenn í atvinnulífinu í Grundarfirði eru boðaðir til fundar í Samkomuhúsinu Grundarfirði þriðjudaginn 11. febrúar nk. kl. 16.30.  Málefnið er Skólastefna í vinnslu – Aðkoma atvinnulífs. Fundinum stýrir Gunnar Kristjánsson verkefnisstjóri.   Grundarfjarðarbær.    

Við minnum á að dýralæknirinn verður í áhaldahúsinu á morgun, miðvikudaginn 5. febrúar kl. 12:30-16:00.  Öllum hundeigendum er skylt að mæta með hunda sína.     

Í síðustu viku komu þeir Hilmar Atli Þorvarðarson og Ómar Hall Sölvason, nemendur á starfsfbraut FSN í heimsókn til okkar hér í leikskólann. Þeir komu færandi hendi og gáfu okkur spil sem þeir höfðu búið til sjálfir. Við færum þeim okkar bestu þakkir fyrir.  

Verðum að sauma í vinahúsinu í Sögumiðstöðinni á miðvikudögum kl 13:00 til 16:00 Allir velkomnir, kaffi á könnunni. Barnaföt 0-1 árs, sængurföt, fleace, garn o.fl. Vel þegið.   Rauða kross deild Grundarfjarðar    

Enn á ný er blásið til söngbúða með Kristjönu Stefánsdóttur, djass söngkonu,þar sem öllum syngjandi konum á Vesturlandi er velkomið að taka þátt.    Söngbúðirnar verða í Hjálmakletti í Borgarnesi helgina 1.-2. mars 2014. Þátttakendur munu læra og æfa söng undir stjórn Kristjönu Stefánsdóttur.  Zsuzsanna Budai mun vera hennar hægri hönd við að þjálfa hópinn. Allar nánari upplýsignar er að finna hér.  

Grundarfjarðarbær efnir til hugmyndasamkeppni um nýtt nafn á Sögumiðstöð, Grundargötu 35. Á síðustu mánuðum hafa miklar breytingar á starfsemi hússins átt sér stað. Húsið gegnir nú hlutverki menningar- og samfélagsmiðstöðvar. Þangað geta félagasamtök og klúbbar leitað og fengið aðstöðu fyrir fundi.  

Það hefur ekki farið framhjá íbúum Grundarfjarðar frekar en landsmönnum öllum það tíðarfar sem verið hefur undanfarið. Þar hefur mikill klaki og hálka gert íbúum erfitt um vik með að komast ferðar sinnar á öruggan hátt. Ástandið þykir óvenjulegt og hafa elstu menn varla upplifað annað eins. Hið sama á við víða um landið. Ástandið er erfitt og ekki síst hversu langan tíma það hefur varað.   Starfsmenn bæjarins og verktakar við snjómokstur hafa unnið sleitulaust að því að vinna bug á þessum erfiða vanda. Salt og sandur hefur verið notaður í ómældu magni til að reyna að vinna bug á klakanum, en saltað hefur verið upp á hvern einasta dag frá jólum. Saltnotkun frá jólum er orðin meiri en hún var allan veturinn á undan.    

Bæjarstjórn Grundarfjarðar lýsir yfir áhyggjum vegna forsendubrests við rekstur Dvalar- og hjúkrunarheimilisins Fellaskjóls. Miðað við núverandi stöðu er rekstrargrundvöllur dvalarheimilis brostinn vegna fækkunar hjúkrunarrýma og of lágra daggjalda. Bæjarstjórn skorar á heilbrigðisráðherra og ríkisstjórn að hækka daggjöld til dvalar- og hjúkrunarheimila nú þegar.   Bókun bæjarstjórnar á fundi 23. janúar 2014.   Bæjarstjórn Grundarfjarðar lýsir áhyggjum vegna forsendubrests við rekstur Dvalar- og hjúkrunarheimilisins Fellaskjóls. Heimilið er sjálfseignarstofnun og hefur frá upphafi verið rekið af mikilli útsjónarsemi. Nú er hins vegar svo komið að daggjöldin sem koma frá ríkinu nægja ekki fyrir kostnaði. Sambærileg staða virðist vera uppi um allt land, jafnt á stórum og smáum hjúkrunarheimilum.    Jafnframt hefur hjúkrunarrýmum á Fellaskjóli verið fækkað um eitt, meðan þörf fyrir hjúkrunarrými fer vaxandi. Brýnt er að sú ákvörðun verði afturkölluð.   Bæjarstjórn Grundarfjarðar skorar á heilbrigðisráðherra og ríkisstjórn að hækka nú þegar, daggjöld til dvalar- og hjúkrunarheimila.    

Laugardaginn 25. janúar kl. 12:00 verða stofnuð Hollvinasamtök Heilbrigðisstofnunar Vesturlands. Stofnfundurinn verður haldinn á sjúkrahúsinu á Akranesi sem er starfsstöð stofnunarinnar. Grundarfjarðarbær hvetur íbúa til að mæta á fundinn og gerast þannig stofnfélagar.  Lagt er til að árgjald verði kr. 3000. Þeir sem ekki komast á fundinn geta að honum loknum gerst félagar m.a. með því að fara inn á heimasíðu samtakanna vesturlandsvaktin.is, en heimasíðan verður opnuð á stofnfundinum. Einnig verður hægt að fylgast með starfsemi samtakanna á Facebook:  https://www.facebook.com/vesturlandsvaktin?ref=hl.