Fréttir & tilkynningar

Af óviðráðanlegum orsökum hefur íbúaþingi sem halda átti laugardaginn 5. maí verið frestað til haustsins.   Þess í stað verður boðið til íbúafundar síðar í mánuðinum.   Bæjarstjóri 

Vaskir nemendur í Stórsveit Snæfellsness halda þrenna tónleika í byrjun maí. Stórsveitin er skipuð nemendum í Fjölbrautaskóla Snæfellinga og er fyrsta starfsári hennar að ljúka. Tónleikarnir verða skemmtilegir fyrir alla aldurshópa. Við leggjum mikið upp úr að lögin séu skemmtileg og einnig að sé góður hljómur en leigt hefur verið gott hljóðkerfi fyrir alla tónleikanna. Miðaverð er aðeins kr. 1000 en frítt er fyrir börn og ungmenni að 18 ára aldri.   Tónleikarnir í Grundarfirði eru þeir síðustu í röðinni og verða haldnir í sal Fjölbrautaskóla Snæfellinga.Þessir tónleikar eru í samstarfi við Menningarráð Vesturlands.  

Vorið er komið – og tími til að taka til hendinni!   Fimmtudaginn 3. maí 2012 stendur UMFG fyrir tiltektardegi og samveru á íþróttavellinum.   Markmiðið er að gera íþróttavöllinn og umhverfi hans snyrtilegt og aðlaðandi fyrir sumarið.   Íþróttasvæðið er nýtt á sumrin fyrir frjálsíþróttaæfingar, fótboltann, æfingar bæði yngri og eldri liða, þar eru haldnir fótboltaleikir og fjölmargir nýta sér hlaupabrautirnar til að ganga eða hlaupa á. Auk þess blasir íþróttasvæðið við þegar komið er inn í bæinn. Það skiptir því miklu máli að svæðið sé bæði snyrtilegt og sem hentugast til notkunar.  

Íbúum Grundarfjarðar er boðið upp á garðlönd við Kvíabryggju. Þeir sem vilja þiggja það geta snúið sér til starfsmanna Kvíabryggju. Þeir sem vilja vera með á póstlistanum okkar snúi sér beint til Sunnu, sunnabar (hjá) aknet.is.   Garðyrkjuvakt kvenfélagsins  

Undanfarin ár hefur Grundarfjarðarbær boðið garðeigendum að nálgast gróðurmold á gámastöðina, þeim að kostnaðarlausu. Ákveðið hefur verið að hætta að bjóða upp á þessa þjónustu og er garðeigendum bent á að snúa sér beint til söluaðila.

      Aðalfundur Skotfélagsins Skotgrundar verður haldinn fimmtudaginn 3.maí kl. 20:00 í félagshúsi Skotgrundar í Hrafnkelsstaðabotni. Við hvetjum félagsmenn til þess að fjölmenna á fundinn.Nánari upplýsingar er hægt að nálgast á heimasíðu félagins www.skotgrund.123.is eða á facebook síðu félagsins. 

148. fundur bæjarstjórnar Grundarfjarðar verður haldinn í Samkomuhúsinu, fimmtudaginn 26. apríl 2012, kl. 16:30.   Fundir bæjarstjórnar eru opinir og er öllum heimilt að koma og fylgjast með því sem fram fer.  

  Í tilefni af Frakklandsferð kórsins verða haldnir tónleikar í Grundarfjarðarkirkju undir stjórn organistans Zolt Kantór mánudagskvöldið 30. apríl kl. 20:00.   Á ferð okkar um Frakkland heimsækjum við m.a. vinabæ okkar Paimpol þar sem við munum flytja sömu dagskrá og einnig tökum við lagið með kór Paimpolbæjar. Miðaverð 1.000.- kr. frítt fyrir börn.   Verið velkomin á tónleikana okkar Kirkjukór Grundarfjarðar

Húseigendur og umráðamenn húseigna eru hvattir til að huga að frágangi girðinga, trjágróðurs og öðru sem liggur að götum, gangstéttum og gangstígum. Mikilvægt er að gróður í görðum hindri ekki vegfarendur. Bent er á 15. grein lögreglusamþykktar Grundarfjarðar. Sjá nánar samþykktina hér! Grundarfjarðarbær  

Á fundi bæjarráðs Grundarfjarðar 17. apríl 2012 var lögð fram aðsend ályktun sem send var öllum sveitarfélögum á landsbyggðinni um frumvörp ríkisstjórnarinnar til laga um stjórn fiskveiða og veiðigjöld.   Eftirfarandi ályktun var samþykkt samhljóða.   „Bæjarráð Grundarfjarðar tekur undir fyrirliggjandi ályktun/undirskriftarsöfnun um frumvörp til laga um stjórn fiskveiða og veiðigjöld, þar sem Alþingi er sterklega varað við því að samþykkja þau.   Bæjarráð skorar á stjórnvöld að leiða sjávarútvegsmál til lykta með það að leiðarljósi að sem víðtækust sátt náist í sjávarútvegi og allri annarri auðlindanýtingu.   Bæjarráð Grundarfjarðar gerir einnig kröfu um að jafnræðis verði gætt við gjaldtöku náttúruauðlinda og komi til aukinnar gjaldtöku á sjávarútveginn renni hluti hennar til sveitarfélaga í gegnum Jöfnunarsjóð sveitarfélaga en ekki beint til landshlutasamtaka. Þá vill bæjarráð minna á að skerðing þorskkvóta um 30% árið 2007 olli Grundarfirði verulegum skakkaföllum og er mikilvægt að sú skerðing gangi til baka.   Einnig mótmælir bæjarráð fyrirhugaðri skerðingu á föstum bótum vegna brests á veiðum á hörpuskel.“