Fréttir & tilkynningar

Skráning er nú í fullum gangi í fiskiréttakeppnina sem haldin verður að þessu sinni í fiskvinnslu Soffanías Cecilssonar Hf.  Hrefna Rósa Sætran mun dæma í keppninni í ár en verðlaunin eru ekki af slakari endanum. Sigurvegarar í keppninni fá í verðlaun gjafabréf, út að borða fyrir tvo í smakkréttamatseðil á Fiskmarkaðinn. Hægt er að skipta smakkmatseðlinum út fyrir annað ef fleiri en tveir eru í vinningsliðinu. Þátttakendur geta skráð sig með því að hafa samband við Dögg Mósesdóttur í síma 7700577, á facebook eða með tölvupósti á info@northernwavefestival.com.   Í ár verður í fyrsta sinn rukkað um aðgangseyri sem hefur verið haldið í algjöru lágmarki, 2.500 kr fyrir armband með aðgang að allri hátíðinni. Við vonum að sem flestir vilji styðja hátíðina í verki með þessum hætti. Hægt verður að kaupa armböndin í kaffisölunni í Samkomuhúsinu. Allir Grundfirðingar eru velkomnir í Fiskiveisluna og á bíósýningar og þurfa ekki að kaupa armbönd til þess, frekar en þeir kjósa. Þeir sem taka þátt í Fiskiréttakeppninni og leikstjórar/fulltrúar mynda fá að sjálfsögðu armbönd, þeim að kostnaðarlausu.   Við hlökkum til að sjá ykkur sem flest á hátíðinni um næstu helgi.    

Auglýsing vegna úthlutunar byggðakvóta á fiskveiðiárinu 2013/2014 sbr. reglugerð um úthlutun byggðakvóta til fiskiskipa nr. 665, 10. júlí 2013   Fiskistofa auglýsir eftir umsóknum um byggðakvóta til fiskiskipa fyrir: Grundarfjarðarbær (Grundarfjörður) Kaldrananeshreppur (Drangsnes) Akureyrarkaupstaður (Grímsey) Borgarfjarðarhreppur (Borgarfjörður eystri) Auk reglugerðarinnar er vísað til sérstakra úthlutunarreglna í neðanskráðum byggðalögum sbr. auglýsingu nr. 990/2013 í Stjórnartíðindum   Snæfellsbær  (Arnarstapi, Hellissandur, Rif og Ólafsvík) Húnaþing vestra (Hvammstangi) Sveitarfélagið Skagaströnd Fjallabyggð (Siglufjörður og Ólafsfjörður) Grýtubakkahreppur (Grenivík) Langanesbyggð (Þórshöfn og Bakkafjörður) Breiðdalshreppur (Breiðdalsvík) Sveitarfélagið Hornafjörður   Umsóknum skal skilað til Fiskistofu ásamt samningi við vinnsluaðila, á eyðublöðum sem er að finna á heimasíðu stofnunarinnar (fiskistofa.is), og þar eru ofangreindar reglur einnig aðgengilegar.  Umsóknarfrestur er til og með 25. nóvember 2013.   Fiskistofa, 8. nóvember 2013.

Lesið við kertaljós   Upplesturinn hefst  kl. 18:00 mánudaginn 11. nóv. Lesið á sama tíma fyrir börn og fullorðna   Heitt og kalt á könnunni.     Bókasafnið í Sögumiðstöðinni                                                              

Í ár eins og síðustu ár hefur Grundarfjarðarbærstaðið fyrir ljósmyndasamkeppni. Tilgangur keppninnar er að safna myndum til birtingar. Myndefnið í ár var „Fjaran". Alls bárust 68 myndir frá 19 þátttakendum. Úrslit keppninnar voru tilkynnt á Markaði kvenfélagsins í Sögumiðstöðinni þann 9. nóvember síðastliðinn. Eins og síðustu ár voru veitt peningaverðlaun fyrir þrjár bestu myndirnar. 50 þúsund fyrir fyrsta sætið. 30 þúsund fyrir annað sætið og 20 þúsund fyrir þriðja sætið.   Verðlaunahafar ársins 2013 eru: 1. sæti: Tómas Freyr Kristjánsson 2. sæti: Salbjörg Nóadóttir 3. sæti: Signý Gunnarsdóttir  

Svipmyndir frá Rökkurdögum eru komnar inn á Facebooksíðu bæjarins.  

Foreldrar og forvarnir í Fjölbrautaskóla Snæfellinga, Grundarfirði Miðvikudaginn 13. nóv. 2013, kl. 18:00.   Viltu vita hvað þú getur gert sem foreldri til að efla forvarnir og styðja barnið þitt í uppvextinum?   Dagskrá: Sólveig Karlsdóttir, verkefnastjóri hjá Heimili og skóla og SAFT – Samtaka foreldrar Björn Rúnar Egilsson, verkefnastjóri hjá Heimili og skóla og SAFT – Rafrænt uppeldi Guðrún Björg Ágústsdóttir, ICADC ráðgjafi hjá Vímulausri Æsku-Foreldrahúsi – Hvað er til ráða? Fræðslan er öllum opin og foreldrar hvattir til að fjölmenna.   Frír aðgangur.    

Ragnheiður Arnardóttir og Alexander Freyr Ágústsson fengu glaðning fyrir þátttöku í kosningu um bestu barnabók ársins 2012. Aukaspyrna á Akureyri eftir Gunnar Helgason og Dagbók Kidda Klaufa: Svakalegur sumarhiti eftir Jeff Kinney í þýðingu Helga Jónssonar fengu flest atkvæði í kosningu 6-12 ára krakka á Íslandi.  

Vöfflur og ljósmyndasamkeppni   Fimmtudaginn 7. nóvember verður opið hús í Sögumiðstöðinni. Starfsmenn munu steikja vöfflur og bjóða upp á kaffi. Á sama tíma verða ljósmyndir úr ljósmyndasamkeppni Grundarfjarðarbæjar til sýnis í Bæringsstofu. Myndefnið í ár var fjaran og voru þátttakendur 19 með um 70 myndir. Úrval ljósmynda mun einnig hanga uppi á meðan að hátíðinni stendur en verðlaun verða veitt laugardaginn 9. nóvember.   Meðan að gestir gæða sér á vöfflum verða Bókaverðlaun barnanna veitt. Almennings og skólabókasöfn landsins veita verðlaunin hvert ár fyrir tvær bækur, aðra frumsamda og hina erlenda. Á Bókasafni Grundarfjarðar verður dregið úr innsendum seðlum og bókaverðlaun veitt tveimur börnum, öðru úr 1.-3. bekk og hinu úr 4.-6. bekk.   Ostaskólinn í Grundarfirði Um árabil hefur sérvöruverslunin Búrið í Nóatúni rekið ostaskóla við gífurlegar vinsældir. Nú ætlar ostaskólinn í fyrsta sinn að leggja land undir fót og heimsækja okkur íbúa Grundarfjarðar. Sælkerinn Eirný Sigurðardóttir mun leiða okkur inn í heim ostanna af sinni alkunnu snilld. Hún mun einnig fræða okkur um vín og samspil þessara tveggja afurða á bragðlaukanna. Þemað er Frakkland og því eingöngu franskir ostar og vín á boðstólum. Nemendur fá að smakka á allmörgum tegundum osta og má segja að námskeiðið jafngildi heilli máltíð. Skráning fer fram á bæjarskrifstofunni eða í netfang alda@grundarfjordur.is  Skólagjaldið er 4.900 krónur.      Skemmtikvöld nemendafélags FSN   Nemendafélag FSN ætlar að halda eitt af skemmtikvöldum vetrarins fimmtudaginn 7. nóvember. Það er engum blöðum um það að fletta að aðal númer kvöldsins er stjarnan Friðrik Dór. Hann mun halda tónleika og skemmta nemendum skólans. Viðburðurinn er öllum opinn og aðgangseyrir 1.500 krónur.  Auk tónleikanna verður fjölbreytt dagskrá á skemmtikvöldinu.    

Ég elska þig stormur   Við byrjum hátíðina að þessu sinni með fyrirlestrinum Ég elska þig stormur. Þar mun Guðrún Nína Petersen veðurfræðingur frá veðurstofu Íslands tala um vind og áhrif landslags á vindinn. Eru til einhverjar fyrirbyggjandi aðferðir sem gætu virkað í Grundarfirði? Þessari spurningu og mörgum fleiri mun Guðrún Nína svara í Bæringsstofu miðvikudagskvöldið 6. nóvember kl 20.00. Það verður heitt á könnunni og frítt inn á fyrirlesturinn.

Fræðist um líf og aðbúnað franskra sjómanna á Íslandsmiðum á liðnum öldum í tilefni af heimsókn gesta frá Paimpol um Rökkurdagana. Samantekt bókasafnsins í Grundarfirði.