Fréttir & tilkynningar

Frumkvæði að því að leikskóli var stofnaður í Grundarfirði átti Rauðakrossdeildin hér, sem réðst í verkefnið „Leikskóli“ árið 1976. Þá var ákveðið að byggja leikskóla að Sólvöllum 1 og voru það Rauðakrossdeildin og sveitarfélagið sem stóðu að byggingunni.  

Á næstu mánuðum er ætlunin að kynna starfsemi einstakra stofnana Grundarfjarðarbæjar, með því að taka fyrir eina stofnun í hverjum mánuði. Hugsunin er að miðla upplýsingum, vonandi til fróðleiks og gamans í bland. Jafnvel þó allir viti af því að leikskóli, grunnskóli og áhaldahús starfi í þessum bæ, þá er örugglega ýmislegt sem varpað getur frekara ljósi á starfsemina í viðkomandi stofnun. Forstöðumaður hverrar stofnunar eða starfsemi tekur saman vikulega fróðleiksmola sem eru birtir á vef Grundarfjarðarbæjar og hefur Vikublaðið Þeyr tekið vel í að birta þetta jafnframt í blaðinu. Allar ábendingar og athugasemdir við þetta tiltæki eru vel þegnar, um leið og minnt er á vef bæjarins, www.grundarfjordur.is   Leikskólinn Sólvellir er stofnun maímánaðar og mun að auki standa fyrir opnum degi 24. maí til kynningar á starfseminni.  

Gámatöðin verður lokuð á morgun, uppstigningardag.   Gámastöðin er opin virka daga kl. 16:30-18:00 og kl. 10:00-12:00 á laugardögum. 

Franskir nemendur frá Paimpol eru nú í heimsókn í Grundarfirði og verða til 11. maí.  Heimsóknin er liður í samstarfsverkefni á milli skólanna sem byggist á verkefnavinnu, tölvusamskiptum og gagnkvæmum heimsóknum. Frakkarnir gista heima hjá 9. bekkingum sem þeir hafa verið í tölvusamskiptum við í vetur. Nemendur 9. bekkjar Grunnskóla Grundarfjarðar fara til Frakklands þann 30. maí nk. og verða þeir á heimilum Frakkanna fyrri hluta ferðarinnar en fara síðan til Parísar og verða þar í 3 daga. Áætluð heimkoma er 12. júní.  Það má búast við að Frakkarnir setji svip á bæinn þessa daga og að sjálfsögðu tökum við vel á móti þeim. Meðfylgjandi myndir voru teknar á Hótel Framnesi þar sem hópurinn, Íslendingar og Frakkar, snæddi saman.

Fyrir skemmstu fóru þrír úr unglingadeildinni Pjakk á námskeiðið Björgunarmaður 1 á Gufuskálum. Þetta námsekið er haldið á vegum Björgunarskóla Landsbjargar og er í heildina 9 dagar. Fulltrúar Pjakks voru þeir Gísli Valur Arnarson, Ólafur Kristinn Skarphéðinsson og Gústav Alex Gústavsson. Á námskeiðinu fá þeir alla grunnþjálfun á því sem björgunarmaður þarf að hafa til að geta hafið störf í björgunarsveit, s.s. rötun, fjallamennska, leitartækni, fyrsta hjálp, veðurfræði til fjalla og fl.

Nýlega var gert samkomulag milli skólastjóra grunnskóla á Snæfellsnesi og skólameistara Fjölbrautaskóla Snæfellinga um að nemendum 10. bekkja í grunnskólum Snæfellsbæjar, Grundarfjarðarbæjar og Stykkishólmsbæjar næsta skólaár standi til boða að stunda nám í FSN í kjarnaáföngum fyrsta árs námsefnis framhaldsskóla samhliða námi í 10. bekk.

Minnt er á fræðslu- og hvatningarverkefni ÍSÍ, „Hjólað í vinnuna“, sem verkefnið „Ísland á iði“ mun standa fyrir dagana 2. - 13. maí n.k. Meginmarkmið „Hjólað í vinnuna“ er að vekja athygli á hjólreiðum sem heilsusamlegum, hagkvæmum og umhverfisvænum samgöngumáta. Keppt er í 6 fyrirtækjaflokkum um flesta daga og flesta km, hlutfallslega miðað við fjölda starfsmanna í fyrirtækjum. Allir þeir sem nýta eigin orku til að koma sér til vinnu s.s. hjóla eða ganga geta tekið þátt.

Geirfinnur Þórhallsson sem verið hefur verkstjóri í áhaldahúsi Grundarfjarðar sl. 5 ár lætur af störfum hjá Grundarfjarðarbæ í dag.  Í hans stað hefur verið ráðinn Jónas Pétur Bjarnason, en fimm umsækjendur voru um starf verkstjóra.  

Eins og áður hefur komið fram hér á vefnum hefur borun ekki gengið vel undanfarna daga. Mánudaginn 18. apríl sl. slitnaði strengur í annað sinn og hefur reynst þrautin þyngri að ná brotunum upp úr holunni.  

Grundarfjarðarhöfn Meðfylgjandi frétt birtist í Morgunblaðinu 13. apríl sl. Höf: Gunnar Kristjánsson   Það sem af er þessu ári hefur óvenjumikill fiskur farið um höfnina í Grundarfirði. Af þeim þremur mánuðum sem liðnir eru hefur mars verið sá stærsti en í þeim mánuði var landað   2.634 tonnum samanborið við 1.946 tonn í mars 2004. Fyrstu þrjá mánuði ársins lætur nærri að um 2000 tonnum meiri afli hafi komið á land en sömu mánuði í fyrra. “ Við erum svo heppin að eiga hér mjög sterk útgerðafélög sem eru undirstaðan fyrir góðu gengi hafnarinnar” segir Hafsteinn Garðarsson hafnarvörður þegar hann er inntur eftir ástæðu þessara meta nú.   Þennan dag voru þrjú togskip í höfn, f.v. Helgi SH, Þorvarður SH og Kaldbakur EA, Hafsteinn stendur á Litlu-bryggjunni sem brátt víkur fyrir nýrri og verður þá hafnaraðstaðan enn betri.