Fréttir & tilkynningar

50. fundur bæjarstjórnar Grundarfjarðar var haldinn í Samkomuhúsi Grundarfjarðar í gær. Á dagskrá var m.a. ákvarðanir um gjaldskrár/álagninu vegna fjárhagsáætlunar 2005. Í ljósi minnkandi skatttekna á undanförnum misserum sér bæjarstjórn sig knúna til að hækka skattprósentu fasteignagjalda, vatnsskatts, holræsagjalda og lóðarleigu. Samþykkt var samhljóða að vísa fjárhagsáætlun 2005 til síðari umræðu.  

Í kvöld, fimmtudagskvöld 2. desember, verða tónleikar í Ólafsvíkurkirkju þar sem Páll Óskar Hjálmtýsson, söngvari, og Monika Abendroth, hörpuleikari, koma fram ásamt strengjakvartett.

50. fundur bæjarstjórnar verður haldinn í samkomuhúsinu fimmtudaginn 2. desember kl. 17:30. Á dagskrá eru fundargerðir bæjarráðs, fyrri umræða um fjárhagsáætlun bæjarsjóðs og stofnana ásamt forsendum áætlunar, ákvörðun um nýtingu tekjustofna, breyting á samþykkt um kattahald, umsögn umtillögu sameiningarnefndar félagsmálaráðherra og ýmis gögn til kynningar.   Bæjarstjóri

Kynningarfundur um þá vinnu sem SSV (Samtök sveitarfélaga á Vesturlandi) hafa unnið á síðastliðnu ári verður í Sögumiðstöðinni í dag, miðvikudaginn 1. desember, kl. 17:00. Meðal efnis verður kynning á rannsókn um áhrif Hvalfjarðarganga, skýrsla um sameiningarmál á Vesturlandi og skýrsla um almenningssamgöngur. Fundurinn er öllum opinn.  

Fulltrúar KSÍ, þeir Eyjólfur Sverrisson, fyrrum atvinnumaður í knattspyrnu, Geir Þorsteinsson, framkvæmdastjóri KSÍ og Jakob Skúlason, landshlutafulltrúi KSÍ, afhentu formlega þá gjöf sem fólst í lagninu gervigrassins á sparkvöllinn sem lagður hefur verið á lóð Grunnskóla Grundarfjarðar.

Í dag, miðvikudaginn 1.desember, kl. 18:00 er stefnt að því að kveikja á jólatrénu í miðbæ Grundarfjarðar (við heilsugæslustöðina). Mætum öll og sjáum jólaljósin tendruð ef veður leyfir!

Miðvikudaginn 1. desember nk. kl. 11:00 koma Eyjólfur Sverrisson og fleiri forsvarsmenn KSÍ og munu við litla athöfn afhenda þá gjöf sem fólst í lagningu gervigrasvallarins á sparkvöll Grundfirðinga, en KSÍ  gekkst sl. vor og sumar fyrir átaki þar sem sveitarfélögum var boðið að þiggja lagningu gervigrass á sparkvelli. Boltar verða afhentir Grunnskóla Grundarfjarðar frá Evrópska knattspyrnusambandinu (UEFA) auk þess sem sambandið færir Ungmennafélagi Grundarfjarðar gjafabréf. Á meðan á athöfninni stendur verður nemendum grunnskólans gefið frí til þess að vera viðstaddir athöfnina. Allir eru boðnir velkomnir á völlinn til að vera viðstaddir athöfnina.

Þriðjudaginn 30. nóvember fóru elstu nemendur leikskólans ásamt kennurum í heimsókn í grunnskólann. Þar tók Ragnheiður Þórarinsdóttir, aðstoðaskólastjóri, á móti þeim og sýndi þeim húsnæði skólans. Þessi heimsókn er liður í samstarfi leik- og grunnskóla til að auðvelda skiptin á milli skólastiganna. Að venju var vel tekið á móti þessum væntanlegu nemendum grunnskólans og voru þau ánægð með heimsóknina. Elstu börnin á Leikskólanum Sólvöllum í heimsókn í Grunnskóla Grundarfjarðar

Íbúar við Hlíðarveg eru beðnir afsökunar á þeim óþægindum sem kunna að fylgja stífluðu holræsi í götunni. Skolphreinsunarbíll kemur í fyrramálið til að losa stífluna.   Skipulags- og byggingarfulltrúi

Á fjölskyldudegi kvenfélagsins þann 27. nóv. sl. var íþróttamaður Grundarfjarðar árið 2004 kjörinn. Átta einstaklingar voru tilnefndir af hinum ýmsu deildum og félagasamtökum í bænum.