Fréttir & tilkynningar

Bæjarstjórn Grundarfjarðar samþykkti á fundi sínum þann 15.desember 2011 að auglýsa tillögu að nýju deiliskipulagi  samhliða auglýsingu á breytingu á aðalskipulagi, skv. 41.gr.skipulagslaga nr.123/2011.  Í tillögunni stækkar hesthúsasvæðið í samræmi við aðalskipulagsbreytinguna.  Þegar hafa verið reist 10 hesthús á svæðinu og er gert ráð fyrir 7 lóðum í viðbót fyrir hesthús og einni lóð fyrir reiðhöll í deiliskipulaginu.  

Bæjarstjórn Grundarfjarðar samþykkti á fundi sínum þann 15.desember 2011 að auglýsa tillögu að breytingunni skv. 31.gr. skipulagslaga nr. 123/2010.  Breytingin felur í sér stækkun á hesthúsasvæðinu úr 3 ha í 9 ha.  Við það breytist um 6 ha óbyggt svæði í opið svæði til sérstakra nota.  Samhliða auglýsingu á aðalskipulagi er auglýst nýtt deiliskipulag af svæðinu.  

Árleg hundahreinsun mun fara  fram í janúar og verður auglýst nánar síðar. 

  Jólatónleikar tónlistarskólans voru haldnir síðastliðinn fimmtudag þann 15. desember í sal Fjölbrautaskóla Snæfellinga. Nemendur léku listir sínar af stakri snilld fyrir gesti sem fóru alsælir heim eftir frábæra tónleika og ljúfa stund. Fullt var út úr dyrum og kom fólk víða að, s.s. frá Akranesi og Reykjavík. Óhætt er að segja að jólatónleikar Tónlistarskóla Grundarfjarðar eigi sér fastan sess í hugum margra og sé orðinn ómissandi hluti af jólahátíðinni.  Hér má sjá nokkrar myndir frá tónleikunum.

Fjárhagsáætlun ársins 2012 var samþykkt samhljóða við síðari umræðu í bæjarstjórn 15. desember sl. Undanfarin ár hefur verið lögð áhersla á góða samvinnu beggja lista í bæjarstjórn við gerð fjárhagsáætlunar og hefur það fyrirkomulag gengið mjög vel.   Þess má geta að við fyrri umræðu í bæjarstjórn lagði oddviti minnihlutans fram fjárhagsáætlun ársins, en hann stýrði þeim fundi sem varaforseti bæjarstjórnar. Ekki er vitað til þess að slíkt hafi gerst áður.   Hér að neðan er rekstraryfirlit og helstu tölur ásamt greingargerð bæjarstjóra við fjárhagsáætlun.  

Sunnudaginn 18. desember nk. verða haldnir jólatónleikar í Grundarfjarðarkirkju þar sem Svafa Þórhallsdóttir, óperusöngkona, syngur íslensk sönglög og jólaklassík við undirleik Zsolt Kántor. Tónleikarnir hefjast kl. 20.00 Frír aðgangur. 

Útskriftarhátíð Fjölbrautaskóla Snæfellinga verður haldin laugardaginn 17. desember 2011 í hátíðarsal skólans í Grundarfirði. Hátíðin hefst kl. 14.00 og að henni lokinni verða kaffiveitingar í boði skólans. Allir velunnarar skólans eru velkomnir. Skólameistari. 

Jólatónleikar Tónlistarskólans verða haldnir fimmtudaginn 15. desember nk. kl. 16.00 í sal Fjölbrautaskóla Snæfellinga. Hlökkum til að sjá ykkur. 

144. fundur bæjarstjórnar Grundarfjarðar verður haldinn fimmtudaginn 15. desember 2011, kl. 18:30 í  Samkomuhúsinu.   Fundir bæjarstjórnar eru opnir og öllum velkomið að fylgjast með því sem fram fer.  

Minnt er á að umsóknarfrestur vegna styrkja úr Menningarráði Vesturlands fyrir árið 2012 rennur út 10. desember nk. Umsækjendur geta verið einstaklingar, félagasamtök, fyrirtæki, stofnanir og sveitarfélög á Vesturlandi. Hægt er að nálgast rafrænar umsóknir á heimasíðu Menningarráðs Vesturlands. Ennfremur er minnt á að frestur fyrir lokauppgjör þeirra sem fengu styrk þetta árið er 15. desember nk. Lokaskýrslu er einnig hægt að nálgast á heimasíðu Menningarráðs Vesturlands. Ef ekkert verður úr verkefnum síðasta árs gengur sá peningur inn í næstu úthlutun.