Fréttir & tilkynningar

Lokahátíðin var haldin í Ólafsvíkurkirkju í gær 10. mars. Þrír fulltrúar frá grunnskólunum í Grundarfirði, Stykkishólmi og Snæfellsbæ lásu ljóð eftir Örn Arnarson, valda kafla úr bókinni Leyndardómar ljónsins eftir Brynhildi Þórarinsdóttur og að lokum ljóð að eigin vali. Allir nemendurnir stóðu sig frábærlega og var einstaklega gaman að sjá hve sjálfsöruggir og prúðir þeir voru.

Í seinustu spurningu vikunnar var spurt hvenær fyrsta bókin í bókaflokknum Fólkið, fjöllin og fjörðurinn hafi komið út og er rétt svar árið 2000 og voru 34 af 89 sem svöruðu rétt. 

Sorphirðudagatölin voru borin í hús fyrir helgi, þau ættu að vera búin að skila sér inn á öll heimili. Ef þau hafa ekki skilað sér þá er hægt að fá eintak hjá Ingibjörgu (Bibbu) í síma 840 5728. 

Vegna bilunar í skíðalyftunni verður skíðasvæðið lokað í dag og næstu daga.   Skíðadeildin 

Um síðustu helgi fór fram í annað sinn kvikmynda- og menningarhátíðin Northern Wave í Grundarfirði. Um 200 manns sóttu hátíðina heim, bæði erlendis frá sem og heimafólk og var öll gistiaðstaða í Grundarfirði fullbókuð um helgina. Dögg Mósesdóttir, skipuleggjandi hátíðarinnar, var mjög ánægð með útkomuna.

Aðsókn að bókasafninu hefur verið ágæt fyrstu tvo mánuði ársins. Fleiri og fleiri njóta þess að stoppa lengi og kíkja í bækur og blöð. Sjáið nýja uppröðun og hreinsun á vef bókasafnsins: Ársskýrsla 2008 er undir Þjónusta og aðstaða. Bókaverðlaun barnanna. Barnasíður á Vefbókasafninu. Vasadiskó, kynningar, pólskar bækur í millisafnaláni. - Verið velkomin. 

Úthlutun menningarráðs Vesturlands fór fram í Leifsbúð í Búðardal föstudaginn 27. febrúar. Alls voru það 24 milljónir króna sem úthlutað var í ár og voru það 83 verkefni sem fengu styrk að þessu sinni. Styrkina afhenti Guðbjartur Hannesson forseti Alþingis. Grundarfjarðarbær hlaut 300.000 kr. styrk fyrir verkefnið Merking sögustaða á Snæfellsnesi, Eyrbyggja sögumiðstöð hlaut 400.000 kr. styrk fyrir verkefnið Sögueyjan, sagnanámskeið og Dögg Mósesdóttir hlaut 700.000 kr. styrk fyrir verkefnið The Northern Wave film festival.   Hér má sjá styrkina sem veittir voru.

Lýðheilsustöð heldur málþing, helgað Árna Helgasyni, um stöðu áfengismála á Íslandi í Stykkishólmi þann 14. mars nk. Hægt er að lesa meira og skrá þátttöku á vefsíðu lýðheilsustöðvar: http://www.lydheilsustod.is/atburdir/arnamessa/nr/2706 Hér má sjá dagsskrá málþingsins.   Ennfremur verður haldið veglegt skákmót fyrir grunnskólanemendur alls staðar af landinu í tilefni málþingsins. Nánari upplýsingar  

  Alþjóðlega kvikmyndahátíðin Northern Wave hefst í samkomuhúsi Grundarfjarðar á morgun. Undanfarna daga hefur skipuleggjandinn, Dögg Mósesdóttir haft í mörgu að snúast við að undirbúa og kynna hátíðina. Í Morgunblaðinu í gær var umfjöllun um hátíðina og skemmtilegt viðtal við Hilmar Oddsson. Þar segir hann að staðsetningin gefi hátíðinni ævintýralegan blæ en hátíðin sjálf uppfylli stórborgarstaðla að gæðum. Dögg var í viðtali í gæmorgun (miðvikudag) á rás 2 kl. 07.15 en í fyrradag í löngu og ítarlegu viðtali á rás 1 eftir 9 fréttir. Þeir sem vilja forvitnast um hátíðina og Dögg sjálfa er bent á að hlusta má á viðtölin á www.ruv.is     Samkomuhúsið opnar kl. 17 á morgun, föstudag en sýningar hefjast kl. 18.    

Í gær var opnuð miðstöð fyrir Grundfirðinga í atvinnuleit í verkalýðshúsinu. Mæting var góð og mikill hugur í fólki. Héðan í frá verður opið hús á virkum dögum frá 9-11 og verður Kaffi á könnunni og aðgangur að internetinu í boði. Fljótlega verður kynnt dagskrá um væntanleg námskeið og fyrirlestra.