Fréttir & tilkynningar

83. fundur bæjarstjórnar Grundarfjarðarbæjar verður haldinn í samkomuhúsinu þriðjudaginn 11. september 2007, kl. 16.15 og er öllum opinn.  Sjá dagskrá og fundarboð með því að smella hér.   

Námskeið fyrir konur um stofnun og rekstur fyrirtækja   Impra nýsköpunarmiðstöð gengst nú í níunda sinn fyrir svokölluðum Brautargengisnámskeiðum á landsbyggðinni. Haustið 2007 er áætlað að halda námskeiðið á þremur stöðum á landinu, þ.e. á Patreksfirði, Grundarfirði og Akureyri. Námskeiðin eru skipulögð í samvinnu við sveitarfélög og Atvinnuþróunarfélög á hverjum stað. Alls hafa á sjötta hundrað konur víðs vegar um land lokið Brautargengisnámskeiði frá upphafi.

Rafmagnslaust verður í Sæbóli ,Eyravegi og Sólvöllum frá miðnætti og fram eftir nótt vegna vinnu í spennistöð.  Tilkynning frá RARIK.

Þann 4. september sl. kom fjallskilanefnd saman á fund.  Á fundinum voru lögð fram og samþykkt drög að fjallskilum fyrir árið 2007.  Smölunar- og réttadagar voru ákveðnir og eru eftirfarandi:   Fyrri smölunardagur verður laugardaginn 15. september 2007 og réttað verður sama dag.   Seinni smölunardagur verður laugardaginn 29.  september 2007 og réttað verður sama dag.  Réttað verður að Hömrum og Mýrum.  

Opnuð hefur verið ný heimasíða með grunnupplýsingum um Green Globe verkefnið á Snæfellsnesi. Slóðin inn á heimasíðuna er www.nesvottun.is. Einnig er hægt að smella á Green Globe merkið sem er hér Hægramegin á síðunni.  

Mánudaginn 17. september n.k. kl. 14-15 verður Elísabet Haraldsdóttir, menningarfulltrúi Vesturlands á bæjarskrifstofunni til að kynna mögulegar styrkveitingar Menningarráðs og huga að verðugum verkefnum næsta árs eins og segir í tilkynningu.   Elísabet býður öllum sem áhuga hafa að koma á skrifstofu Grundarfjarðarbæjar á fyrrgreindum tíma og ræða málin.

Jafnréttisráð lýsir eftir tilnefningum til jafnréttisviðurkenningar fyrir árið 2007. Viðurkenningu geta hlotið einstaklingar, hópar, fyrirtæki eða félagasamtök, sem á einn eða annan hátt hafa skarað fram úr eða markað spor á sviði jafnréttismála. Tilgangurinn er að verðlauna fyrir vel unnin störf í þágu jafnréttis kvenna og karla og hvetja um leið til frekari dáða.   Tilnefningum skal skilað eigi síðar en 24. september n.k. til Jafnréttisráðs, Borgum, 600 Akureyri, í síma 460 6200, bréfsíma 460 6201 eða í tölvupósti  jafnretti@jafnretti.is

Grundarfjarðarbær auglýsir eftir umsóknum um starf ráðsmanns.  Starfið er við umhirðu, varðveislu, minniháttar viðhald og aðstoð við mat á ástandi eigna og búnaðar fyrir gerð fjárhagsáætlana.  Daglegur starfstími skiptist á milli fastrar viðveru og verkefna undir stjórn skólastjóra í grunnskóla og í íþróttamannvirkjum Grundarfjarðarbæjar og svo við verkefni tengd öðrum fasteignum og búnaði undir stjórn skipulags- og byggingafulltrúa.  Áherslur í starfinu eru mismunandi á milli tímabila og geta hlutföll í skiptingu vinnutíma verið breytilegar innan og utan við starfstíma grunnskólans.  Samstarf og samráð eru við starfsmenn í áhaldahúsi Grundarfjarðarbæjar og forstöðumenn allra stofnana bæjarins.  Viðkomandi þarf að geta unnið sjálfstætt en einnig undir verkstjórn næstu yfirmanna.  Æskilegt er að viðkomandi hafi iðnmenntun, en er ekki skilyrði.

Samkvæmt samþykkt bæjarráðs Grundarfjarðarbæjar þ. 4. júlí 2007 er hér með auglýst tillaga að deiliskipulagi Framness austan við Nesveg skv. 25. gr. laga nr. 73 / 1997 m.s.br.  Skipulagssvæðið afmarkast af Nesvegi og nýrri götu „Bryggjuvegi”.  Deiliskipulagstillagan nær til lóðanna nr. 4 - 14 við Nesveg.  Skipulagsreitir í tillögunni eru R6 og R9.  Deiliskipulagstillagan felur m.a. í sér breytingar á stærðum lóða og breytingu á blandaðri notkun lóða á skipulagssvæðinu.  Deiliskipulagstillagan er í samræmi við samþykkta landnotkun í aðalskipulagi þéttbýlis Grundarfjarðarbæjar 2003 - 2015.   Tillagan verður til sýnis á heimasíðunni og á bæjarskrifstofunni Grundargötu 30, Grundarfjarðarbæ, frá og með 6. september til og með 4. október 2007. Þeim sem eiga hagsmuna að gæta er gefinn kostur á að gera athugasemdir við tillöguna til fimmtudagsins 18. október 2007.  Skila skal skriflegum athugasemdum til umhverfisnefndar Grundarfjarðarbæjar á skrifstofu bæjarins.  Þeir sem ekki gera athugasemdir við tillöguna teljast henni samþykkir.   Hér má sjá tillögu að deiliskipulagi Framness austan við Nesveg   Grundarfjarðarbæ, 6. september 2007, Grundargötu 30, 350 Grundarfjörður. __________________________________ Guðmundur Ingi Gunnlaugsson, bæjarstjóri.    

Grundarfjarðarbær óskar eftir tilboðum í eftirfarandi verk; Niðurföll og fráveita við Ölkelduveg og Hrannarstíg.   Byggingafulltrúinn í Grundarfirði óskar eftir tilboði í lagnir, gröft og tilheyrandi í ofangreint verk.   Um er að ræða nýjar lagnir fyrir fráveitu og niðurföll ásamt greftri og frágangi.   Verkkaupi óskar eftir að hafist verði handa við verkið sem allra fyrst.   Magnskrá liggur fyrir og í tilboðinu skal gefa upp einingarverð  Í einingaverðum tilboðsins skal vera innifalinn allur kostnaður við verkið s.s. gröftur, lagning kerfis, tengingar og frágangur og allt efni og öll vinna sem verktaki telur sig þurfa við verkið og frágangur allur að verki loknu.