Fréttir & tilkynningar

Rósa Guðmundsdóttir, nýráðinn framkvæmdastjóri menningarhátíðarinnar Rökkurdaga, hefur hafið störf og er skipulagning Rökkurdaga komin á fullt skrið. Grundfirðingar hafa tekið vel í og þegar hafa nokkrir menningaratburðir verið skráðir í dagskrá Rökkurdaga.  

Í gær, 15. september, voru opnuð hjá Ríkiskaupum tilboð í áætlunarakstur á sérleyfisleiðum á tilteknum þjónustusvæðum á landinu, boðið út fyrir hönd Vegagerðarinnar, og í skólaakstur m.a. fyrir Fjölbrautaskóla Snæfellinga á árunum 2006-8. Hægt er að finna fundargerð opnunarfundar á vef Ríkiskaupa með því að smella hér.    

Rósa Guðmundsdóttir hefur verið ráðin til að skipuleggja menningarhátíðina Rökkurdaga sem haldin verður í lok október byrjun nóvember næst komandi.  

Fyrsti fundur bæjarstjórnar eftir sumarleyfi verður haldinn, 15. september kl. 17.00 í samkomuhúsinu. Á dagskrá eru m.a. fundargerðir nefnda og ráða, rekstraryfirlit, kynningarbæklingur og skipan kjörnefndar vegna sameiningarkosninga 8. október n.k., tillaga um val á arkitektastofu til að taka að sér skipulagsverkefni, umræða um veitumálefni og kl. 18 á fundinum verður kynning á drögum að aðalskipulagi dreifbýlis. Fundurinn er öllum opinn.   Bæjarstjóri  

Sinfóníuhljómsveit Íslands heldur tónleika í Félagsheimilinu á Klifi í Snæfellsbæ í kvöld klukkan 20.00. Miðasala verður við innganginn. Á  þessum tónleikum mun hornleikarinn Stefán Jón Bernharðsson leika einleik, en hljómsveitarstjórinn Bernharður Wilkinson er faðir hans.    

Nú í vikunni á að fara að setja djúpdælu niður í borholuna á Berserkseyri, sem mun dæla upp vatni næstu mánuði, til að sannreyna hver afköst holunnar verða í sekúndulítrum en vonast er til að holan gefi um 25 – 30 ltr/sek.  Til að hægt sé að athafna sig við að koma dælunni niður verður að "kæfa" vatnsrennsli uppúr holunni, enda rennur nú uppúr henni um 5 sekúndulítrar af 75 gráðu heitu vatni. Þetta er gert með svokölluðum saltpækli, sem dælt er niður í holuna og við það mun rennsli uppúr henni stöðvast tímabundið. 

Ráðið hefur verið í allar stöður í Tónlistarskóla Grundarfjarðar. Þórður Guðmundsson, sem ráðinn var skólastjóri í námsleyfi Friðriks Vignis, mun sjá um kennslu á píanó, hljómborð og bassa. Aðrir kennarar eru Ari Einarsson sem sér um gítarkennslu og Baldur Orri Rafnson sem kennir á slagverk og tónfræði auk þess að deila forskólakennslu með Arnhildi Þórhallsdóttur.

Þann 8. október n.k. verður kosið um sameiningu fimm sveitarfélaga á Snæfellsnesi, skv. tillögu sameiningarnefndar sem skipuð var af félagsmálaráðherra. Um kosningarnar, kjörskrár o.fl. fer skv. lögum um kosningar til sveitarstjórna nr. 5/1998.

Hér er eru myndir sem voru teknar á sjávarútvegssýningunni sem haldin er í  Smáranum.  

Sjávarútvegssýningin 2005 verður haldin í Fífunni Kópavogi dagana 7. – 10. september 2005. Grundarfjarðarhöfn, Ragnar og Ásgeir ehf., Guðmundur Runólfsson hf., Snæís hf., Fiskmarkaður Íslands hf., Vélsmiðjan Berg ehf., og Djúpiklettur ehf. verða með kynningarbás á sýningunni, bás nr. P24. Allir þessir aðilar eiga það sameiginlegt að þjónusta viðskipavini hafnarinnar.   Fisksölufyrirtækið Hagfiskur bíður gestum og gangandi upp á ekta grundfirskan plokkfisk alla dag sýningarinnar á eftirtöldum tímum:   Miðvikudag kl. 15:00 Fimmtudag kl. 15:00 Föstudag kl. 14:00 Laugardag kl. 14:00   Hljómsveitin Rauðir Fiskar, sem er að mestu skipuð brottfluttum Grundfirðingum, spilar í kynningarbásnum milli kl. 16:00 og 18:00 á föstudag.   Grundarfjarðarbær hvetur alla til þess að mæta á sýninguna og kynna sér það helsta í íslenskum sjávarútveg!