Janúarpistill bæjarstjóra - 2026

Fallegur morgunn 29. janúar 2026.

Nokkrir punktar frá bæjarstjóra um verkefni og starfsemi bæjarins í janúar 2026

Fyrsti mánuður ársins leið hratt og mikið var hann ljúfur, veðurfarslega séð. Það er munur að fá svona góða tíð, sleppa við kostnað við vetrarþjónustu á götum og gangstígum, og geta unnið ýmis útiverk sem alla jafna tilheyra ekki janúar. 

Áramótakveðja bæjarins er annars fyrsti punktur ársins, þar er þakkað fyrir liðið ár 2025 og nýárskveðjan 2026 send, heimatilbúin með söng og myndum - sjá frétt og myndband.  

Þrettándagleði var haldin í Þríhyrningnum, þar sem jólin voru kvödd, en bærinn sá um undirbúning, söngnemendur úr Tónlistarskólanum sungu og að beiðni bæjarins settu félagar úr Björgunarsveitinni Klakki upp glæsilega flugeldasýningu.  

En þó veðrið hafi verið einstaklega rólegt, þá hefur ekki verið nein lognmolla í starfseminni í janúar. Bæjarstjórn fundaði viku af janúar og bæjarráð í 3ju viku ársins. Skipulagsnefnd, hafnarstjórn, íþrótta- og tómstundanefnd og skólanefnd hafa einnig hist yfir sínum málum. Fyrirferðarmest eru skipulagsmálin, en í þau fer mikil vinna þessi misserin. Við finnum fyrir áhuga á uppbyggingu á svæðinu og bæjarstjórn hefur unnið að því að auðvelda hana. Gott skipulag er þar grunnur.

Höfnin

Í janúarmánuði var metafla landað í Grundarfjarðarhöfn eða ríflega 2900 tonnum. Það er stærsti janúarmánuður frá upphafi á höfninni okkar. Höfnin er einstaklega góð frá náttúrunnar hendi, þar hefur verið byggð upp góð aðstaða og þjónustuaðilar eru einstaklega liprir og samstilltir. Það er alltaf gaman að heyra að þetta kunna viðskiptavinir að meta. Okkur munar verulega um aðkomubátana, þeir færa okkur aukin umsvif og tekjur í bæinn; löndun. flutningar, ís, þjónusta og einnig kaupa skipin sinn kost (mat, nauðsynjavörur) í búðinni, o.s.frv.

Ef við laumumst aðeins inní febrúarmánuð, þá var verkið „Grjótvörn við Norðurgarð" boðið út á vef Vegagerðarinnar 6. febrúar 2026. Þar á að færa út grjótvörn og stækka "krikann" upp við Norðurgarð, til að rýma fyrir aðkomu á landi, að og frá Norðurgarði. Þetta er meginframkvæmd hafnarinnar í ár og tekur ríkið þátt í henni á móti hafnarsjóði. 

Hér má einnig lesa uppgjör okkar Hafsteins hafnarstjóra, um starfsemina árið 2025. 

Smellið á myndirnar til að lesa textann.

Bætt aðstaða við Kirkjufellsfoss

Lokaúttekt fór fram í byrjun janúar á verkframkvæmd við byggingu palla og stíga við Kirkjufellsfoss, en Grundarfjarðarbær er verkkaupi og vinnur fyrir styrk úr Framkvæmdasjóði ferðamannastaða. Verkið felur í sér stórbætta aðstöðu fyrir gesti við fossinn. Það er arkitektastofan Landslag, Þráinn Hauksson og félagar, sem hannaði mannvirkið og hefur hannað aðstöðuna við fossinn frá upphafi. Landslag hefur séð um hönnun á fjölmörgum vinsælum áningarstöðum um allt land, t.d. stigann uppá Saxhól í Snæfellsbæ. Verktaki var JK & Co. slf., en verkið fór í verðkönnun, undirverktaki við stálsmíði var Fönix ehf. á Rifi. Verkís á Vesturlandi sá um eftirlit með verkinu. 

Sund og orkuskipti

Sundlaugin okkar var mjög vinsæl í janúar, en þetta er í fyrsta sinn í næstum 49 ár, frá því laugin var tekin í notkun, sem íbúar geta notið þess að fara í heita sundlaug yfir háveturinn. Áður var hún einungis opin frá apríl og fram í september/október. Síðustu árin hefur heitu pottunum þó verið haldið opnum allt árið. Það er orkuskiptum að þakka að laugin er heit og fín og aðgengileg. Íbúar kunna sannarlega að meta það, en gestafjöldi var 532 í janúar og jókst um 95% frá janúar 2025. Hér má lesa um sundlaugina, orkuskiptin í skóla- og íþróttamannvirkjum og fleira. 

Verkefni þjónustumiðstöðvar

Það er vel þegið að njóta þessa góða tíðarfars, því á meðan vinnast útiverkin betur. Í janúar hefur þjónustumiðstöðin (áhaldahús og eignaumsjón) okkar fengist við ýmis verkefni.

Meðal verkefna sem þjónustumiðstöð hefur komið að undanfarnar vikur var uppsetning á nýjum varmadælum, ein í miðrými leikskóla og önnur í anddyri grunnskólans og er óhætt að segja að það muni verulega um þessa viðbótarorku. 

Unnið hefur verið að því að endurbæta lýsingu í húsnæði heilsdagsskólans og leikskóladeildarinnar Eldhamra og skipta yfir í LED-perur að hluta til í grunnskólanum. Lagfæringar/endurbætur hafa farið fram á föndurherbergi í leikskóla, verið er að lagfæra ýmislegt í rými slökkviliðsins og einnig í íþróttahúsi og kjallara hans, sem og í kjallara Grundargötu 30, þar sem UMFG er að standsetja píluaðstöðu með miklum myndarbrag. 

Átak hefur verið gert í tiltekt á lóðum og í eigum bæjarins, t.d. með því að útbúa nýtt geymslusvæði í Ártúni fyrir um ári síðan, en því fylgdi mikil tiltekt á gamla geymslusvæðinu og á lóð áhaldahúss. Hreinsað hefur verið til í geymslum á vegum bæjarins í kjallara Fjölbrautaskólans og afar góðar umbætur hafa nú verið gerðar á lóð áhaldahússins að Nesvegi 19, þar sem malbikað var sl. sumar og nú er búið að hlaða steyptum kubbum til afmörkunar á lóðinni, sem virðist miklu stærri fyrir vikið.

Nýr ljósastaur er kominn í notkun uppá Hjaltalínsholti, á horni Fellabrekku/Fellasneiðar. Áningarbekkir hafa verið lagaðir og málaðir, þannig að þeir séu klárir fyrir komandi vor, en auk þess voru gerðar tilraunir með gamlar ruslatunnur, sem voru skipalakkaðar og síðan sett á þær endurskinsmerking. Þrír vegprestar voru settir upp með nýjum prófílum í stað lerkistaura en álprófíllinn á að standa af sér veður og vind. 

Mötuneyti skólanna

Í upphafi árs færðum við mötuneyti skólanna aftur í húsnæði leikskólans og er þar nú eldað fyrir bæði leik- og grunnskóla. Undanfarin nokkur ár hafa verið rekin tvö eldhús, í leikskólanum og í FSN fyrir grunnskólann (og FSN), en nú höfum við sameinað þetta aftur, ekki síst af hagkvæmnisástæðum. Breytingar á húsnæði mötuneytis eru áformaðar aftur í haust og er verið að skoða með að mötuneytið geti rúmast innan veggja grunnskólans. 

Fundir og ráðstefnur 

Ferðamálastofa hélt árlega Ferðaþjónustuviku dagana 13.-15. janúar sl. með fjölbreyttri dagskrá. Ég tók þátt í pallborðsumræðum á miðvikudeginum 14. janúar, á ráðstefnuhluta dagskrárinnar þar sem rætt var um ábyrgð og upplýsingagjöf, þá sérstaklega í samhengi við gjaldtöku á áfangastöðum. Fjallað var um kosti og galla gjaldtöku og hvort gjaldtaka geti breytt væntingum ferðamanna, ábyrgð og kröfum til innviða, öryggisráðstafana og miðlunar upplýsinga, eins og sagði í kynningu Ferðamálastofu. Það er mjög lærdómsríkt að taka þátt í svona umræðu og gefur helling í sarpinn. 

Á síðasta ári kom út skýrsla sem Blámi, í samtarfi við Gleipni, vann fyrir Samtök sveitarfélaga á Vesturlandi um orkumál á rafkyntum svæðum á Vesturlandi. Við bæjarstjórar á köldum (rafkyntum) svæðum Vesturlands (Grundarfjarðarbær, Snæfellsbær og Dalabyggð) fengum kynningu á skýrslunni 20. janúar, þar sem starfsmenn Bláma fóru yfir niðurstöðurnar. Markmiðið með skýrslunni var að skoða hvering varmadælur og aðrar orkusparandi lausnir geta hjálpað íbúum og fyrirtækjum að lækka húshitunarkostnað, bæta nýtingu orkunnar og auka öryggi í orkumálum til framtíðar. Skýrslan er hluti af áhersluverkefni Sóknaráætlunar Vesturlands um orkumál á köldum svæðum.

Stjórn Samtaka sveitarfélaga á köldum svæðum, sem ég sit í, fundaði 21. janúar en þar eru ýmis hagsmunamál "köldu svæðanna" í vinnslu. Um miðjan mars nk. verður málþing í Reykjavík á vegum samtakanna, en auk þess eru ýmis mál í meðförum þings og ráðherra, sem samtökin fylgjast með og fylgja eftir.

Framkvæmdir 2026 og undirbúningur

Í framhaldi af fyrri verkefnum eða í samræmi við fjárhagsáætlun 2026, sem bæjarstjórn samþykkti 11. desember sl., höfum við unnið að undirbúningi fyrir ýmsar framkvæmdir bæjarins á þessu ári.

Verið er að undirbúa útboð á klæðningu íþróttahúss auk þakviðgerðar, gluggaskiptum o.fl. og höfum við Hinrik íþrótta- og tómstundafulltrúi setið verkfundi með okkar ráðgjafa í janúar til að undirbúa það. Um er að ræða tveggja ára verkefni.

Endurbæta á rafmagn og rafmagnstöflu í íþróttahúsi og búið er að kaupa loftljós sem skipt verður út í íþróttasalnum, eftir að aflað var tilboða í þau. Hreinsað var út úr gamla gufubaðsklefanum í hittifyrra og í ár stendur til að innrétta hann sem "sérklefa" sem á að geta nýst fötluðum og fólki með sérþarfir, en reynslan sýnir að þörf er á slíku.

Við höfum einnig verið að undirbúa gangstéttarframkvæmdir, t.d. á að ljúka við endurbætur gangstéttar á austanverðum Hlíðarvegi, ljúka frágangi á Hrannarstíg miðjum (frá Fagurhól og niður að Grundargötu), farið verður í gatnagerð á iðnaðarsvæði, áframhaldandi endurbætur verða gerðar á skólalóðum leikskóla og grunnskóla, sem og á leiksvæðunum á Hjaltalínsholti og Sæbóli.

Áformað er að ljúka viðgerð á suðurhluta Sögumiðstöðvar, en á síðasta ári fóru fram viðgerðir vegna bágborins ástands á hluta innviða hússins. Einnig er ætlunin að flikka uppá samkomuhúsið að utan, endurnýja aðstöðuhús á gámastöðinni, halda áfram uppbyggingu í Þríhyrningi, svo eitthvað sé nefnt.

Stóra styrkverkefnið okkar

Árið 2026 er annað árið af sex ára verkefni um blágrænar fráveitulausnir, en út á það fékk bærinn stóran Evrópustyrk í árslok 2024. Inní því verkefni eru í raun mörg verkefni eða verkþættir og þá ekki síst umtalsverðar framkvæmdir, sem hlutu stuðning. Á fundi bæjarráðs 22. janúar sl. gerði Nanna Vilborg verkefnisstjóri grein fyrir stöðu verkþáttanna og undirbúningi þeirra, Hér má lesa fundargerð bæjarráðsins (liður nr. 4).

Einn af verkþáttunum í þessu verkefni felst í að styrkja á jarðveg og gróðurþekju á opnu svæði ofan byggðarinnar (merkt OP-5 í aðalskipulagi). Á einföldu máli þá á að gera ráðstafanir til að draga úr því að "ofanvatn" (regnvatn og leysingavatn) æði niður brekkurnar og niður í þéttbýlið. Land og Skógur sér um að greina gróðurþekju og jarðveg á svæðinu og leggja fram tillögur um hvernig megi styrkja það. Að þessu verkefni koma m.a. Nanna verkefnisstjóri skipulags- og umhverfismála, Hinrik íþrótta- og tómstundafulltrúi, enda eru stígar og útivist mikið lýðheilsumál, og síðan Pálmi forstöðumaður menningar- og markaðsmála, þar sem merkingar og upplýsingagjöf heyra undir hann. Nýlega var skipaður vinnuhópur um verkefnið og mun hann leita til hagaðila og áhugasamra sem nýta svæðið eða vilja nýta það, .s.s. til skógræktar, útivistar eða annars. Unnin verður útivistaráætlun fyrir upplandið þar sem hægt verður að byggja upp gott stígakerfi og áningarstaði ofan byggðar, sem henta fyrir fjölbreytt not og útivist.  Ég er mjög spennt fyrir að þetta verkefni fari af stað.

Okkur vantar tæknifræðing

Að lokum bendi ég á að við höfum sett í loftið auglýsingu sem gjarnan má deila, en okkur vantar sárlega tæknfræðing eða aðra tæknimenntaða manneskju til starfa. Okkur vantar sumsé verkefnastjóra tækni- og byggingarmála, því það eru mörg spennandi og knýjandi verkefni í gangi og nóg að starfa fyrir slíka manneskju.