Fréttir & tilkynningar

Alþjóða friðarhlaupið fer fram hér á Íslandi dagana 1-16 júlí. Áætlað er að hlaupa hér í Grundarfirði 13. júlí klukkan 12:30. Eru þetta 30 hlauparar frá ýmsum þjóðlöndum sem koma og hlaupa hér, eiga allir hressir krakkar að mæta við gervigrasvöllinn og hlaupa með. Hlaupið verður með kyndil og verður þetta voða gaman og hægt er að skoða myndir og fleira á heimasíðunni www.worldharmonyrun.org 

Frétt á vef Skessuhorns 2. júlí 2009: Á dögunum boðaði Þórunn Kristinsdóttir fyrrverandi formaður Verkalýðsfélagsins Stjörnunnar í Grundarfirði stjórn Dvalarheimilisins Fellaskjóls á sinn fund í húsnæði félagsins að Borgarbraut. Tilefnið var ærið því það var komið að því að efna fundarsamþykkt aðalfundar Stjörnunnar frá árinu 2007 um fjárstyrk til Fellaskjóls. Upphaflega var samþykktin fólgin í því að styrkja Dvalarheimilið í fimm ár um eina milljón króna árlega en þeirri samþykkt var breytt áður en kom til sameiningar verkalýðsfélaganna á Snæfellsnesi og var styrkurinn nú greiddur út í einu lagi krónur 5 milljónir. 

Vatnsleikfimin byrjar á morgun nánar á ellismellir.123.is  

Fjölbrautaskóli Snæfellinga óskar eftir því að ráða stuðningsfulltrúa. Umsóknarfrestur er til 10. júlí 2009.      

Af vef Skessuhorns 30. júní 2009: Fjölbrautaskóli Snæfellinga hefur auglýst eftir tilboðum í rekstur mötuneytis við skólann. Opnunartími þess verður frá 9.00 – 15.30 virka daga og verður boðið upp á morgunmat og heita máltíð í hádeginu, ásamt öðrum veitingum. Nemendur við skólann eru um 200 og starfsmenn um 30. Vettvangsskoðun og kynningarfundur verður í skólanum fimmtudaginn 9. júlí 2009 klukkan 16.00.  Óska má eftir útboðsgögnum frá skólameistara, Skúlínu Hlíf Kjartansdóttur, með tölvupósti:  skulina@fsn.is– eða í síma 693 4967.  

Samkaup úrval bauð krökkunum í vinnskólanum upp á kók og prins póló í dag er þau voru að vinna upp í þríhyrning, og vildu þau koma á framfæri þakklæti til Samkaups fyrir veitingarnar.  

Frétt af vef Skessuhorns  25.06.2009    Gallerí Kind nefnist nýtt handverkshús sem opnað hefur verið í Grundarfirði. Þar verður ýmiskonar handverk til sölu og lögð áhersla á íslensku ullina. Ingibjörg Sigurðardóttir er eigandi gallerísins en hún og fjölskylda hennar eru með nokkrar kindur. Ingibjörg spinnur sína eigin ull og stefnir að því að vinna ullina frá “kind í kápu.” Rokkurinn verður því látinn snúast fyrir gesti í Gallerí Kind. Einnig verða í boði ýmsir handunnir skraut- og nytjahlutir frá fleirum en Ingibjörgu.  Opið verður frá klukkan 13 til 16 virka daga og flestar helgar yfir sumartímann. Annars er opnunartími frjáls og gestir geta banka upp á ef einhver er heima. Þá verður aukið við opnunartímann þegar skemmtiferðaskip hafa viðdvöl í Grundarfirði.

Nýstofnað Ferðafélag Snæfellsness stendur fyrir fjalladögum um helgina. Boðið er upp á ýmsar skemmtilegar göngur. Nánari upplýsingar er að finna hér. 

Eyþór Björnsson hefur störf sem skrifstofustjóri Grundarfjarðarbæjar. Hann er mörgum Grundfirðingum kunnur enda að snúa aftur eftir fimm ára fjarveru.    

20 ár eru frá því að fyrsta kvennahlaupið var haldið hér á landi og sífellt hefur fjölgað þeim konum sem hlaupa allstaðar um landið.  Eins og undanfarin ár var hlaupið hér í Grundarfirði og tóku 28 konur og stúlkur þátt, en á föstudagskvöldinu hlupu 10 konur frammi á Akurtröðum þar sem þær voru á ættarmóti.  Farið var í léttan ratleik þar sem 20 vísbendingum og spurningum var dreift um allan bæin og höfðu þátttakendur 30 mín til að finna sem flestar.  Að loknu hlaupi var boðið upp á kristal, svala, epli og appelsínur.  Grundarfjarðarbær bauð konunum í sund eftir hlaupið og Lyfja Grundarfirði gaf þeim ilmvatnsprufur.