Fréttir & tilkynningar

Endanlegar tölur um kjörsókn Alls greiddu 557 atkvæði í kosningunum. Kjörsókn var 88,27%.   Kjörsókn kl. 18 Alls hafa 336 kosið á kjörstað eða 53,2% kjósenda. Auk þess hafa borist um 120 utankjörfundaratkvæði. Alls hafa því 456 kjósendur nýtt kosningarétt sinn eða 72,3%.   Kjörsókn kl. 15 Kl. 15 höfðu 210 kosið á kjörstað í Grundarfirði, eða nákvæmlega þriðjungur kjósenda, 33,3%.   Kjörsókn kl. 12 Kjörsókn fór vel af stað í morgun og höfðu 80 kosið kl. 12, eða 12,68% þeirra sem eru á kjörskrá. Á kjörskrá eru 631 og hefur kjósendum fjölgað um 50 frá síðustu sveitarstjórnarkosningum 2002.   Niðurstöður kosninganna munu að sjálfsögðu birtast hér á vefnum um leið og þær liggja fyrir. Einnig verður bein útsending á vefnum frá talningu í samkomuhúsinu.

Í dag var undirritaður samningur milli Grundarfjarðarbæjar og Orkuveitu Reykjavíkur um kaup bæjarins á raforku af OR. Samningurinn tryggir bænum raforku á hagstæðara verði en áður hefur boðist.  Raforkan er m.a. notuð til húshitunar og götulýsingar, auk þess sem höfnin er stór notandi og selur rafmagn til viðskiptavina sinna. Það er einmitt Orkuveita Reykjavíkur sem  stendur nú að hitaveituframkvæmdum í Grundarfirði og er þess að vænta að á næstu misserum heyri það sögunni til að hús séu kynt með raforku. Orkuveitan rekur einnig Vatnsveitu Grundarfjarðar sem fyrirtækið keypti á síðasta ári.       Ingibjörg Valdimarsdóttir og Hafrún Þorvaldsdóttir frá OR og Björg Ágústsdóttir bæjarstjóri handsala samninginn

Mánudaginn 22. maí sl. var udirritaður tryggingasamningur til fimm ára við Vátryggingafélag Íslands. Grundarfjarðarbær hefur átt í áratuga löngum viðskiptum við VÍS og forvera félagsins. Mjög gott samstarf hefur verið við félagið alla tíð. Meðfylgjandi mynd var tekin við undirritun samningsins á Hótel Framnesi.  

Í gær, 23. maí, var haldinn borgarafundur í samkomuhúsinu með frambjóðendum við sveitarstjórnarkosningarnar.   Yfir 100 manns komu á fundinn. Frambjóðendur voru með framsögu og svöruðu spurningum fundarmanna.  Fundurinn tókst í alla staði vel og var ánægjulegt að sjá hve margir komu.

Tilraunadælingu á borholu BS-01 á Berserkseyri er lokið og dælan var tekin upp 15. og 16.maí.  Hún er nú til skoðunar ásamt fylgihlutum.  Á síðari stigum tilraunadælingarinnar dró stöðugt úr afköstum dælunnar, þannig að dælt magn minnkaði og vatnsborð í jarðhitakerfinu hækkaði.  Ýmsar getgátur voru uppi um ástæður, meðal annars að dæluhjólin væru slitin eða tærð.  Sökudólgurinn er kominn í ljós, göt mynduðust á dælurörið, flest á samsetningum, sjá mynd, og vatnið hefur sprautast þar út.  Á þeim sex mánuðum sem liðið hafa frá því dæling hófst hefur vatnið náð að tæra sig í gegnum dælurörin.    

Félagsmálaráðuneytið hefur gefið út leiðbeiningar um hvernig kosningar til sveitarstjórnar skulu fara fram. Meðfylgjandi er útdráttur úr þessum leiðbeiningum sem sjá má í heild sinni hér.   Þegar kjósandi hefur gert grein fyrir sér fær hann afhentan einn kjörseðil. Ath. kjósandi getur þurft að gera grein fyrir sér með því að sýna persónuskilríki með mynd.   Kjósandi fer með seðilinn inn í kjörklefa og að borði því er þar stendur. Á borðinu skulu ekki vera færri en tvö venjuleg dökk ritblý. Þar skal einnig vera blindraspjald sem auðveldar sjóndöprum og blindum að kjósa.   Kjósandi greiðir atkvæði á þann hátt að hann markar með ritblýi kross á kjörseðilinn fyrir framan bókstaf þess lista sem hann vill kjósa af þeim sem í kjöri eru.  

Vortónleikar Tónlistarskólans voru haldnir í Fjölbrautaskóla Snæfellinga sunnudaginn 21. maí sl. Góð mæting var á tónleikana og stóðu nemendur sig prýðilega. Myndir frá tónleikunum hafa verið settar í myndabankann undir fræðslumál en einnig er hægt að skoða þær með því að smella hér.

Helgina 5.-7. maí sl. fóru 34 krakkar frá Grundarfirði í ferð í Vatnaskóg, ásamt krökkum úr Snæfellsbæ, frá Hvammstanga, Hofsósi og Sauðárkróki. Alls voru því næstum því 150 krakkar í Vatnaskógi þessa helgi og voru öll pláss nýtt. Er skemmst frá því að segja að ferðin var hin ánægjulegasta í alla staði og voru krakkarnir allir til mikillar fyrirmyndar. Ekki skemmdi fyrir að veðrið var með ólíkindum gott eins og sést á meðfylgjandi myndum, sól og blíða á laugar- og sunnudeginum og fór hitinn í 19 stig. Bregður því eflaust mörgum í brún, nú í kuldakastinu að sjá krakkana synda í Eyrarvatni eins og væru þeir á sólarströnd.   

Kjörfundur vegna sveitarstjórnarkosninga verður haldinn laugardaginn 27. maí nk. Kjörstaður er í Samkomuhúsinu Grundarfirði. Kjörfundur stendur frá kl. 10.00 til kl. 22.00. Athygli er vakin á því að kjósendur geta þurft að gera kjörstjórn grein fyrir sér með því að framvísa persónuskilríkjum með mynd.   Talning atkvæða fer fram fyrir opnum dyrum í Samkomuhúsinu og hefst um það bil klukkustund eftir að kjörfundi lýkur. Hægt er að fylgjast með talningunni hér á vefnum, en bein útsending með vefmyndavél verður frá talningunni og hefst u.þ.b. klukkustund eftir að kjörfundi lýkur.   Grundarfirði, 23. maí 2006   F.h. kjörstjórnar Grundarfjarðarbæjar Bæjarstjórinn í Grundarfirði

Frá og með mánudeginum 29. maí verður sundlaugin opin virka daga frá kl. 8-21 og kl. 12-17 um helgar.   Athugið að sundlaugin er lokuð í dag 22. maí vegna bilunar.