Fréttir & tilkynningar

  Fjölbrautaskóli Snæfellinga tekur til starfa í ágúst á þessu ári og undirbúningur hefur staðið yfir frá því í apríl síðastliðnum. Samið hefur verið við verktaka og er bygging skólans komin á fullt skrið. Undirbúningur annarra þátta skólastarfsins heldur einnig áfram af miklum krafti:

  Bæjarráð Grundarfjarðar hefur samþykkt nýja tilhögun greiðslu kostnaðar við minka- og refaveiða í Eyrarsveit.   Á undanförnum árum hefur sveitarfélagið ráðið veiðimenn til minkaveiða og greitt verðlaun fyrir minka- og refaskott til veiðikortshafa. Nú er svo komið að þessi kostnaður hefur sjaldnast haldist innan fjárhagsáætlunar. Ennfremur hefur Umhverfisstofnun tilkynnt sveitarfélögum skerðingu á kostnaðarhlutdeild ríkissjóðs. Sem viðbrögð við þessum breyttu forsendum hefur bæjarráð samþykkt að hætta að veita verðlaun og greiða einvörðungu til ráðinna veiðimanna þannig að forsendur fjárhagsáætlunar standist.   EB

Nýtt símkerfi hefur verið tekið í notkun á bæjarskrifstofunni. Símanúmerið verður óbreytt, 430 8500, en faxnúmerið breytist og er 430 8501.   Bæjarbúar og aðrir sem þurfa að hringja í okkur á bæjarskrifstofunni eru beðnir að sýna okkur þolinmæði næstu daga á meðan við tileinkum okkur þetta nýja símkerfi.

  Þann 4. október 2002 hófust rennslismælingar á svæði í um 450 metra hæð undir Hafliðagili á tveimur stöðum og stóðu þessar mælingar fram til 21. apríl 2003.   Þykja þær vísbendingar sem þarna fengust lofa góðu og ástæða til frekari aðgerða og rannsókna í þeirri von að þarna mætti afla neysluvatns fyrir vatnsveitu Grundarfjarðar í framtíðinni að einhverjum hluta.

Afli árið 2003 var 12.766 tonn en árið 2002 var aflinn 14.844 tonn. Skipakomur til Grundarfjarðar voru 1.432 árið 2003 Í Grundarfjarðarhöfn var landaður afli í janúar 1.265.376 kg en janúar 2003 1.108.250 kg.   Hér fyrir neðan er aflinn sundurskiftur eftir tegundum bæði árin.  Tegundir 2003   2004   Þorskur............... 395.302 kg 312.296 kg Ýsa...................... 185.956 kg 215.866 kg Karfi..................... 122.877 kg 8.967 kg Steinbítur............ 90.567 kg 47.630 kg Ufsi...................... 35.812 kg 8.582 kg Hörpudiskur...... 0 kg 0 kg Beitukóngur....... 0 kg 0 kg Rækja................. 0 kg 0 kg Langa ................ 957 kg 1.730 kg Keila.................... 148 kg 2.153 kg Gámafiskur*...... 310.256 kg 632.817 kg Aðrar tegundir .. 28.428 kg 18.352 kg Samtals 1.170.303 kg 1.248.393 kg Það sem stendur á bak við gámafisk er að stærstum hluta ýsa, steinbítur og þorskur. HG

Guðmunda Hjartardóttir fékk afhenta fyrstu íbúðina í nýja raðhúsinu að Hrannarstíg 28 – 40 nú um helgina. Síðar í vikunni munu Ragnar Kristjánsson og Þórdís Gunnarsdóttir fá sína íbúð afhenta. Fyrirhugað er að þriðja íbúðin verði tilbúin um miðjan mánuðinn og tvær síðustu þann 15. maí næstkomandi. Þá verður eftir að ljúka frágangi lóðar og vinnu utanhúss sem áætlað er að verði lokið 1. júní.  

Á sunnudaginn kemur, 1. febrúar, verða liðin 100 ár frá því Íslendingar fengu heimastjórn, þingræði var fest í sessi og Stjórnarráð Íslands stofnað. Flutningur framkvæmdavaldsins til Íslands 1. febrúar 1904 markaði þáttaskil og var stærsta skrefið í baráttu þjóðarinnar fyrir sjálfstæði. Sjá nánar á www.heimastjorn.is   Flaggað verður við opinberar byggingar á sunnudaginn og hvatt er til þess að almenningur geri slíkt hið sama.    

Sveitarstjórnarmenn úr öllum sveitarfélögunum í Snæfellsnes- og Hnappadalssýslu komu saman til fundar í Grundarfirði í gærkvöldi, þar sem umræðuefnið var möguleg aukin samvinna sveitarfélaganna og jafnvel sameining þeirra. Það var héraðsráð Snæfellinga sem boðaði til fundarins.   Ágætis umræður voru á fundinum en það var mál manna að ekki eigi að gefa sér fyrirfram hvort eigi að sameina sveitarfélögin, heldur verði slík ákvörðun að byggjast á sterkum rökum. Einnig voru reifaðir möguleikar á aukinni samvinnu sveitarfélaganna.   Samþykkt var að fela héraðsráði Snæfellinga að koma með tillögu til sveitarstjórnanna um tilhögun könnunar á kostum og göllum sameiningar.  

Á næstunni verða þær breytingar á bæjarskrifstofunni að Eyþór Björnsson sem gegnt hefur starfi bæjarstjóra í fæðingarorlofi Bjargar Ágústsdóttur, mun flytja sig um set yfir í Snæfellsbæ um mánaðamótin mars/apríl og taka við starfi bæjarrita í eitt ár. Björg mun koma aftur til starfa í byrjun maí.   Friðbjörg Matthíasdóttir skrifstofustjóri, hefur ákveðið að koma ekki til starfa þegar fæðingarorlofi hennar lýkur 1. maí nk. Henni eru færðar þakkir fyrir samstarfið. Í hennar stað hefur Björn Steinar Pálmason verið ráðinn skrifstofustjóri en hann hefur gegnt starfinu frá miðju síðasta ári.

4. flokkur karla tók þátt í riðlakeppni íslamdsmótsins í fótbolta á sunnudaginn. Strákarnir sigruðu riðilinn sem er hreint frábær árangur og fara þeir því í úrslitakeppnina sem verður á Akranesi 14.febrúar. Fyrsti leikur þeirra var við Selfoss og endaði hann 4-4,þá var komið að Keflavík og vannst sá leikur 2-5,leikurinn á móti Njarðvík fór einnig 2-5 fyrir okkar strákum,Grundarfjörður – Víðir/Rynir fór 4-3,við unnum FH 4-2 og síðasti leikurin var á móti Víking R og fór hann 2- 0 fyrir okkar strákum. Frábær árangur þetta.