Fréttir & tilkynningar

Það voru 18 krakkar sem tóku þátt á 17.júní sundmóti UMFG og var yngsti keppandinn 6 ára. Keppt var í bringusundi og skriðsundi. Nokkru fyrir mótið kom í leitirnar farandbikar sem veita á ár hvert, fyrir besta afrek mótsins, bikarinn hafði verið vel geymdur uppi í hillu hér í bæ í nokkur ár, en er nú kominn í umferð aftur. Besta afrek mótsins átti Jóhanna Steinþóra og fær hún gripinn til varðveislu í eitt ár.  

Í dag, miðvikudaginn 16. júní, voru opnuð tilboð í viðbyggingu Leikskólans Sólvalla ásamt breytingum á eldra húsnæði og tilheyrandi lóðarframkvæmdum. Eitt tilboð barst, frá Trésmiðju Guðmundar Friðrikssonar í Grundarfirði og hljóðar upp á tæpar 50,5 millj. kr. Kostnaðaráætlun hönnuða var tæpar 39,3 millj. kr. Eftir á að yfirfara tilboðið.

Búið er að koma nýju hafnarvoginni við Grundarfjarðarhöfn fyrir. Vogin er tæpir 23 metrar á lengd og getur nú vigtað stóra flutningabíla í heild sinni. Ragnar Haraldsson vígði vigtina í dag þegar hann ók einum flutningabíl fyrirtækisins Ragnars og Ásgeirs ehf. upp á vogina. Bíllinn er um það bil 18 metra langur og rúmaðist því vel á voginni.     Ragnar Haraldsson, Hafsteinn Garðarsson, hafnarvörður og Runólfur Guðmundsson formaður hafnarstjórnar  

Grein bæjarstjóra, birt í Vikublaðinu Þey 16. júní 2005:   Hjá Grundarfjarðarbæ verðum við mjög fljótt vör við það þegar þrengist um á fasteignamarkaði, bæði hvað varðar leiguhúsnæði og fasteignir til kaups/sölu. Mikið er leitað til bæjarins um leiguhúsnæði og með almennar fyrirspurnir um laust íbúðarhúsnæði í bænum. Undanfarna mánuði, og reyndar um alllangt skeið, hefur verið töluverð hreyfing á húsnæði og sú staða er uppi nú að mjög fá hús eru til sölu, kannski má segja að það sé bara búið að kaupa flest það íbúðarhúsnæði sem yfirhöfuð er til sölu, a.m.k. þessa stundina. Mjög mikil eftirspurn er eftir húsnæði og mikið spurt um lóðir og ljóst að margir íhuga nýbyggingar, án þess þó að hafa látið til skarar skríða.

Fyrsta skemmtiferðaskip sumarsins kom til hafnar í Grundarfirði sunnudaginn 12. júní sl. Alls hafa 10 skip boðað komu sína í sumar auk þess sem ein skúta hefur tilkynnt komu sína til Grundarfjarðar. Næsta skemmtiferðaskip, Ocean Monarc, kemur kl. 08:00 í fyrramálið og stoppar til  kl. 13:30.   Paloma 1 þegar það sigldi út fjörðinn á sunnudagskvöld 

Innritun nýnema (nemenda sem eru að koma úr 10. bekk) verður dagana 13. og 14. júní kl. 10:00 – 17:00. Nemendur eru beðnir um að koma til viðtals í skólann með foreldrum/forráðamönnum sínum þá daga. Gert er ráð fyrir að nemendur hafi lokið rafrænni skráningu þegar þeir koma til viðtals, en þeir geta einnig fengið aðstoð við skráninguna á staðnum.

Á föstudaginn spilaði 4.fl kv á móti HK. Stelpurnar í UMFG sigruðu þann leik 11-3. Lið UMFG átti stórleik og vonum við að þetta hafi aðeins verið byrjunin á því sem koma skal í sumar. Næsti leikur hjá 4.fl kv er miðvikudaginn 22.júní en á spila þær við Þrótt R í Reykjavík. 2.fl kvenna spilar á mánudaginn við lið Ægis í Þorlákshöfn og 5.fl ka fer á miðvikudaginn og spilar við lið Álftaness á Bessastaðavelli. Nú eru síðustu forvöð að panta félagsgalla UMFG í bili. Tekið verður við pöntunum 13 júní og síðan ekki fyrr enn eftir 13.júlí. UMFG

16. Kvennahlaup ÍSÍ fór fram laugardaginn 11. júní í Grundarfirði eins og víðar á landinu, og reyndar erlendis líka. Lagt var af stað frá Esso-plani kl. 11.00 og var gengið tvær vegalengdir, 2,5 og 5 km. Að hlaupi eða gögnu lokinni var boðið upp á hressingu í Þríhyrningnum og  allir þátttakendur fengu verðlaunapening. Frítt var í sundlaugina á eftir. Veður var hentugt til hreyfingar, milt og gott.  

Starfsemi Skógræktarfélags Eyrarsveitar hefur verið öflug á liðnum árum. Á árunum 1987-88 var byrjað að planta í svæðið þar sem nú er kominn nokkuð myndarlegur „skógur“ á Fellsásnum, svæði undir Fellunum fyrir ofan Hjaltalínsholt. Plantað hefur verið í svæðið fyrir ofan byggðina undir Fellunum, fyrir neðan vatnstankinn, í Ölkeldudal og nánast allt að spennistöð. Nú nýverið var á vegum bæjarins útbúið aðkomusvæði fyrir Skógræktina frá nýja veginum um Ölkeldudal.   Stjórn Skógræktarfélagsins við „skóginn“ á Holtinu.  

Fyrsta skemmtiferðaskip sumarsins kemur til Grundarfjarðar sunnudaginn 12. júní nk. Skipið heitir Paloma 1 og er 12.586 br tonn. Skipið kemur til hafnar kl. 14:30 og fer aftur kl. 22:00.    Tekið verður á móti skipinu við komu þess með hljóðfæraleik. Allir velkomnir niðrá bryggju! (munum þó öryggissvæðið).  Einnig er stefnt er að því að hafa útimarkað við Sögumiðstöð ef næg þátttaka fæst.