Fréttir & tilkynningar

Í kvöld, þriðjudaginn 22. des. fer fram á Kaffi 59 Pub Quiz nr 8 og er þemað að þessu sinni Grundarfjörður.    Við hefjum leik kl. 21:00 og aðgangur er aðeins kr. 500 sem rennur óskiptur til Meistaraflokks karla í knattspyrnu.   Gummi Gísla og Gunni Kristjáns hafa verið sveittir undanfarna daga við að semja spurningar fyrir þennan stórfenglega viðburð.   Við hvetjum alla til að mæta með jólaskapið og lyfta sér upp svona rétt fyrir jólin.   Meistaraflokksráð.

Eftirfarandi ályktun var gerð föstudaginn 18. desember s.l.   "Bæjarstjórn Grundarfjarðar  lýsir þungum áhyggjum af boðuðum niðurskurði  hjá  Sýslumanni Snæfellinga.   Bæjarstjórnin  ítrekar fyrri ályktanir og mótmælir því að niðurskurður á þjónustu hins opinbera skuli fyrst og fremst verða á landsbyggðinni.   Bæjarstjórn Grundarfjarðar mótmælir harðlega ákvörðun um lokun umboðsskrifstofu sýslumannsembættisins í Grundarfirði  frá áramótum  og telur að ákvörðunin sé ekki byggð á faglegum forsendum heldur sé um tilviljanakennda ákvörðun að ræða. Dagleg opnun umboðsskrifstofunnar í Grundarfirði hefur mælst mjög vel fyrir og verið vel nýtt af íbúum í fjölbreyttum erindagjörðum. Lokun skrifstofunnar ýtir sparnaði embættisins yfir á almenna íbúa í Grundarfirði og eykur kostnað þeirra. Bæjarstjórnin skorar á sýslumann að endurskoða þessa ákvörðun með hliðsjón af þörfum og  þjónustu við íbúa. Boðuð fækkun í löggæsluliði yfir vetrartímann um 25% á þessu víðfeðma landsvæða minnkar öryggi íbúa svæðisins og lengir viðbragðstíma lögreglunnar verulega. Bæjarstjórnin telur að nú þegar sé allt of langt gengið  í niðurskurði á löggæslu á svæðinu.   Bæjarstjórn Grundarfjarðar skorar á dómsmálaráðherra  og fjárveitingavaldið að endurskoða fjárveitingar til embættis Sýslumanns Snæfellinga."

Vegurinn í Kolgrafafirði er farinn í sundur sunnan við mótorkrossbrautina. Þeir sem eiga leið þar um eru beðnir að fara með gát. 

Jólatónleikar tónlistarskólans verða haldir í kvöld í hátíðarsal FSN klukkan 19:30. Ljúfir tónar, ljúf stemning. Allir velkomnir. 

Herra Nóvember   Nokkrir vaskir drengir í Slökkvilið Grundarfjarðar hafa tekið sig til og gert dagatal fyrir árið 2010. Þetta skemmtilega framtak er hugsað til fjáröflunar fyrir slökkviliðið á þessum erfiðu tímum og verður ágóðanum varið til kaupa á björgunarklippum, námskeiða fyrir slökkviliðsmenn og annarra verkefna til eflingar sveitarinnar. Dagatalið er til sölu í Gallerí Kind og einnig munu fyrirsæturnar ganga í hús á næstu dögum. Dagatalið kostar 2.500 kr.

Nýburahátíð var haldin í safnaðarheimili Grundarfjarðarkirkju s.l. þriðjudag. Þar mættu galvaskir þeir 13 Grundfirðingar sem fæddust á árinu, ásamt foreldrum sínum, og hlutu sængurgjafir. Nýburahátíðin er samvinnuverkefni Grundarfjarðarbæjar, heilsugæslunnar, leikskólans, Rauða krossins og Grundarfjarðarkirkju. Að vanda varð þetta hin ánægjulegasta samverustund fyrir unga og aldna.  Efri röð frá vinstri: Alexandra Björg Andradóttir, Ásgeir Veigar Sólbergsson, Heikir Darri Hermannsson, Díana Lóa Óskarsdóttir, Fanney María Jónsdóttir, Friðjón Ingi Davíðsson og Kolbrún Emma Óskarsdóttir. Neðri röð frá vinstri: Oliwia Wiszniewska, Reynir Már Jónsson, Agnes Ísabella Jónasdóttir, Sól Jónsdóttir, Katrín Ósk Aðalsteinsdóttir og Blíða Líf Víkingsdóttir.  

Á mánudagskvöldið tóku Grundfirðingar á móti Hamri frá Hveragerði í 2. deild karla í blaki. Leikurinn, sem fram fór í Grundarfirði, var mjög jafn og skemmtilegur. Með stuðningi áhorfenda og trommusveitarinnar náðu heimamenn að landa naumum sigri  3:2. Hrinurnar voru allar jafnar og spennandi eins og tölurnar bera með sér (25:22, 20:25, 25:22, 19:25  og 18:16). Þetta var annar sigur Grundfirðinga í 2. deildinni í vetur. Um 90 áhorfendur voru í íþróttahúsinu og var stuðningur þeirra mikilvægur í þessum mikla baráttuleik, sem var sá síðasti hjá Grundfirðingum á þessu ári í blakinu.   Af vef Skessuhorns 16.12.2009

Nýendurvakinn Leikklúbbur Grundarfjarðar byrjar með krafti. Þó aðeins séu nokkrar vikur frá því að starfið hófst verður fyrsta leiksýningin haldin eftir tvo daga. Þá verður frumsýndur danski einþáttungurinn "Aðfangadagur á háaloftinu". Nánari upplýsingar um þetta frábæra framtak má finna í vikublaðinu. 

Á 113. fundi bæjarstjórnar s.l. föstudag, var fjárhagsáætlun Grundarfjarðarbæjar fyrir árið 2010 lögð fram. Áætlunin er lögð fram eftir ítarlega umfjöllun í bæjarráði og var mótuð sameiginlega af meirihluta og minnihluta bæjarstjórnar. 

  Útskriftarhátíð Fjölbrautaskóla Snæfellinga 18. desember 2009     Útskriftarhátíð Fjölbrautaskóla Snæfellinga verður haldin föstudaginn 18. desember 2009 í hátíðarsal skólans. Hátíðin hefst kl.15:00 og að henni lokinni verða kaffiveitingar í boði skólans.   Allir velunnarar skólans eru velkomnir.   Skólameistari