Fréttir & tilkynningar

Í dag er síðasta skemmtiferðaskip sumarsins í Grundarfirði. Þetta er skipið Tahitian Princess, en það er að koma í annað skiptið í ár. Að því tilefni eru handverksmarkaðir í Grundarfirði opnir.

107. fundur bæjarstjórnar Grundarfjarðarbæjar verður haldinn í Samkomuhúsinu fimmtudaginn 10. september 2009 kl.16.15. Fundir bæjarstjórnar eru opnir og eru allir velkomnir að koma og hlýða á það sem fram fer.

Slysavarnardeildin Snæbjörg vill koma á framfæri þakklæti til allra þeirra sem lögðu hönd á plóg í útkalli okkar á dögunum. Það er mikilvægt að standa saman er eitthvað bjátar á og það gerðu Grundfirðingar. Krakkarnir í Unglingadeildinni Pjakk sýndu mikinn dugnað, er leitað var til þeirra, og eru þar upprennandi björgunarsveitarmenn á ferð.   Bestu þakkir til ykkar allra.

Nú er 9. hefti bókarinnar, Fólkið, fjöllin og fjörðurinn komin út og búið er að ganga í hús í Grundarfirði og selja hana. Bókin er komin í sölu í Hrannarbúðinni og einnig er hægt að panta hana hjá Eyrbyggjum á netinu. Sendið póst á eyrbyggjar@grundarfjordur.is og þið fáið bókina senda. Bókin kostar 2.750 kr.

Hér má sjá endurbætta tímatöflu UMFG. Bætt hefur verið við útiæfingum fyrir 2. flokk kvenna.

Frétt á vef Skessuhorns 4. september 2009: Í gærmorgun var Busadagur hjá Fjölbrautaskóla Snæfellinga í Grundarfirði. Um 80 nýnemar voru leiddir um bæinn af eldri nemendum, íklæddir svörtum ruslapokum með litað hár og andlit.  Nýnemarnir urðu síðan að hlýða í einu og öllu fyriskipunum sér eldri nemenda og reyndari til að mynda að syngja og sýna með látbragði “Höfuð herðar hné og tær,” bæði á íslensku og ensku. Þeir sem ekki stóðu sig nógu vel fengu á sig væna sprautu úr vatnsbyssu þeirra elstu, eins og sjá má á myndinni.  Allt fór þetta þó vel fram og allir sýndust hafa gaman af.  Þess má geta að svipuð busavígsla mun fara fram í Fjölbrautaskóla Vesturlands á Akranesi eftir hádegi í dag, en sú athöfn mun fara að mestu fram á Langasandi. 

Tímatafla UMFG tekur gildi föstudaginn 4. september, en frjálsar byrja ekki fyrr en á mánudag. Samkvæmt tímatöflu byrjar því fótbolti í dag kl. 15.10-18.30. Hér má sjá tímatöfluna. 

Nú stendur yfir sameiginlegt átak Grundarfjarðarbæjar og Ferðafélags Snæfellsness um merkingar gönguleiða í Grundarfirði. Undanfarnar helgar hafa verið stikaðar tvær leiðir, önnur í kringum Kirkjufell og hin upp á Mön. Nú á sunnudaginn verður næsta leið merkt og liggur hún austan Stöðvarinnar út að Sandvík. Reiknað er með að halda áfram að merkja gönguleiðir á meðan snjór og vetrarveður eru ekki til trafala. Svæðið hér í kring er að mörgu leyti ónýtt auðlind sem alltof fáir hafa uppgötvað. Með merkingu gönguleiða er verið að efla möguleika til útivistar og afþreyingar fyrir heimamenn og gesti. Merktar  gönguleiðir auka öryggi þeirra sem vilja ganga um svæðið og einnig er með þeim verið að stýra umferð og vernda umhverfið. Að merkja gönguleiðir er hin besta skemmtun og eru Grundfirðingar hvattir til að taka þátt. Hópurinn ætlar að hittast í Sögumiðstöðinni klukkan 16:00 á sunnudaginn áður en haldið er í verkið.

5. og 6. umferð Íslandsmótsins í rallakstri fer fram á Snæfellsnesi um helgina. Keppt verður á föstudegi og laugardegi.   Nánari upplýsingar má finna í hlekkjum hér að neðan: Dagskrá Ferjuleiðalýsingar Sérleiðalýsingar Tímamaster Upplýsingaskýrsla

Eins og margir eflaust vita, hefur grundfirska hljómsveitin Nögl staðið í ströngu síðastliðið ár við að spila  og skapa sér nafn í tónlistarbransanum ásamt því að hljóðrita tónlist sína til útgáfu. Diskurinn, sem kom út 21. ágúst s.l. heitir I proudly present og hefur hlotið lof fyrir vandaðar tónsmíðar og góðan hljóm. Hann hefur verið til sölu á Kaffi 59 en seldist upp í síðustu viku. Nú eru komnir fleiri diskar á Kaffið fyrir þá sem vilja ná sér í eintak.