Fréttir & tilkynningar

Sunnudaginn 8. júní, tóku sveitarfélögin fimm á Snæfellsnesi og Þjóðgarðurinn Snæfellsjökull á móti skjölum til staðfestingar því að hafa hlotið umhverfisvottun frá Green Globe vottunarsamtökunum. Viðstaddir hátíðlega athöfn í Fjölbrautaskóla Snæfellinga í Grundarfirði voru m.a. forseti Íslands, Ólafur Ragnar Grímsson, forseti Alþingis og 1. þingmaður Norðvesturkjördæmis, Sturla Böðvarsson, þingmenn, sveitarstjórnafólk og fjöldi annarra gesta. Ísland getur þar með státað sig af því að vera fyrsta landið í Evrópu með umhverfisvottuð samfélög en fram til þessa hefur aðeins þremur öðrum samfélögum í heiminum tekist að ná vottun.

    Listasmiðja barna og unglinga var haldin á Snæfellsnesi í viðburðarviku Vesturlands dagana 23.-30. apríl. Þemað var Snæfellsjökull og var þetta sameiginlegt verkefni Snæfellsbæjar, Grundarfjarðarbæjar og Stykkishólms.  Í listasmiðjunni voru börn frá 1.- 7. bekk og var boðið upp á myndlist, leiklist, dans, ljósmyndun o.fl.  en þó mismunandi námskeið eftir bæjarfélögum.

Eins og flestum er kunnugt verður unglingalandsmót UMFÍ haldið hér í Grundarfirði 2009.  Þetta er viðamikið verkefni, en jafnframt mikil lyftistöng fyrir bæjarfélagið.  Búist er við allt að 10.000 manns á mótið og stefnt er að því að keppt verði í 10 keppnisgreinum. Aðstaða fyrir hinar ýmsu greinar er að miklu leiti til staðar í bæjarfélaginu, en þó er eitt og annað sem vantar en reynt er að stilla til hófs í stórframkvæmdum. Undirbúningur hefur gengið vel og þær framkvæmdir sem liggur mest á eru komnar vel á leið. 

  Forseti Íslands, hr. Ólafur Ragnar Grímsson, mun heimsækja Grundarfjörð sunnudaginn 8. júní. Tilefnið er afhending viðurkenningar vegna Green Globe vottunar sveitarfélaganna á Snæfellsnesi. Athöfnin fer fram í Fjölbrautaskóla Snæfellinga og hefst klukkan 14:30. Grundfirðingar eru hvattir til að taka hátíðlega á móti forsetanum með því að draga íslenska fánann að húni.

Eins og margir hafa sjálfsagt veitt athygli eru komin tæki og tól inn í bæinn vegna malbikunar gatna og fleiri svæða á næstu dögum.  Ekki verður hjá því komist að íbúar verði varir við þessar framkvæmdir og e.t.v. þarf að þrengja lítillega að umferð tímabundið á einstaka stað á meðan framkvæmdir standa yfir.  Takmarkið er að gera gatnakerfið sem best úr garði og yfirbragð bæjarins gott.  Vonast er til þess að íbúar sýni framkvæmdunum skilning og þolinmæði, þetta mun ekki standa yfir í langan tíma.  Athugið að enn er tækifæri til þess að koma á framfæri ósk um malbikun innkeyrsla eða bílastæða, en það verður aðeins í 1 - 2 daga í viðbót.

Mynd Sverrir Karlsson Þau Jakobína Elísabet Thomsen og Svanur Tryggvason voru heiðruð í tilefni af Sjómannadeginum 2008 í Grundarfirði.  Jakobína var gift sjómanninum Níels Friðfinnssyni en hann lést á síðasta ári. Svanur var til sjós í 40 ár og tveimur mánuðum betur.  Þeim báðum eru færðar innilegar hamingjuóskir í tilefni þessa heiðurs.    

Sveitarfélögin á Snæfellsnesi, Eyja- og Miklaholtshreppur, Grundarfjarðarbær, Helgafellssveit, Snæfellsbær og Stykkishólmsbær auk Þjóðgarðsins Snæfellsjökuls, taka þann 8. júní formlega á móti vottun frá alþjóðlegu umhverfisvottunarsamtökunum Green Globe. Þetta er merkur áfangi í sjálfbærnisögu Íslands, því sveitarfélögin eru þau fyrstu í Evrópu til að hljóta vottun fyrir stefnu og framkvæmd í sjálfbærri þróun umhverfis- og samfélagsmála og fjórða svæðið í heiminum til að ná slíkum árangri. Eiginlegt vinnuferli hófst árið 2003, en frá þeim tíma hafa orðið geysilegar breytingar á umhverfisstjórnun sveitarfélaganna.  Allir leikskólar og fimm grunnskólar af sjö á Snæfellsnesi hafa fengið Grænfánann, hafnirnar í Stykkishólmi og á Arnarstapa eru komnar með Bláfánann en báðir fánarnir undirstrika aukna umhverfisstjórnun og sjálfbærni í rekstri viðkomandi staða.

Búið er að flytja moldarkerin á lóðina við hliðina á gámastöðinni. Þar er hægt að ná sér í mold. Gróðurúrgangsgámurinn mun einnig verða fluttur þangað líka.

Valnefnd fyrir Stafholtsprestakall hefur lokið störfum og var samdóma álit nefndarinnar að velja sr. Elínborgu Sturludóttur sóknarprest í Grundarfirði til starfa í Stafholt. Er hún fyrsti kvenpresturinn sem velst til starfa í Stafholtsprestakalli. Áður hafa kvenprestar þjónað í prófastsdæminu en samtals eru sjö prestaköll í Borgarfjarðarprófastsdæmi. Eins og fram hefur komið í fréttum Skessuhorns hefur sr. Brynjólfur Gíslason sóknarprestur þjónað Stafholtsprestakalli í nærri 40 ár og lætur hann af störfum í lok ágúst. Þrettán umsækjendur voru um prestakallið, átta konur og fimm karlar.   Frétt á heimasíðu Skessuhorns 3. júní 2008. 

 Fyrir 1-6 ára  (fyrir þau sem voru í leikskóla í vetur) Námskeiðið mun vera í 6 vikur frá 3 júní til 10 júlí. þriðjudaga og fimmtudaga kl 17-18 Hittumst uppá sparkvelli. 1-4 ára þurfa að vera í fylgd með fullorðnum (12 ára eða eldri) Skráning ekki seinna en 3 júní uppá sparkvelli eða í síma 868-4474   Fyrir 6-10 ára (fyrir þau sem voru í 1 - 4 bekk í vetur) Námskeiðið verður í 5 vikur frá 9 júní til 10 júlí. mánud, þriðjud, miðvikud og fimmtud kl 12-14 Hittumst uppá sparkvelli. Skáning í síma 868-4474 fyrir 9 júní   Verð á námskeiðin. 4000 kr fyrir eitt barn 2000 kr fyrir tvö börn (systkini) Þriðja frítt.(systkini)   ATH – Nauðsynlegt er að skrá börnin á námskeiðin.   Kveðja Lára