Fréttir & tilkynningar

Staðfest hefur verið í framhaldi úttektar á stöðu sveitarfélaganna og Þjóðgarðsins á Snæfellsnesi að þessum aðilum verð veitt skilyrt Green Globe vottun.  Gert er ráð fyrir að vottunin verði formlega staðfest innan fárra vikna.  Stefnt er að því að sú staðfesting verði gerð við sérstaka athöfn af því tilefni.   Snæfellsnes er fyrsta samfélagið í Evrópu og sennilega þriðja samfélagið í heiminum til að ná þriðja og síðasta þrepi vottunarferlisins. Hin tvö eru á Nýja-Sjálandi og  í Indónesíu.   Um nánari upplýsingar er vísað á heimasíðu Framkvæmdaráðs  Snæfellsness.

Vorið er komið. Þá er margt sem við þurfum að huga að í okkar nánasta umhverfi. Þann 25. apríl nk. er Dagur umhverfisins og mun bæjarfélagið brydda upp á ýmsum atburðum í tilefni dagsins. Hér má lesa grein eftir Guðmund Inga Gunnlaugsson, bæjarstjóra í tilefni vorsins.

Söngæfingin miðvikudaginn 23 apríl fellur niður, næsta æfing verður miðvikudaginn 30 apríl sem verður jafnframt síðasta söngæfing vetrarins. 

Gestir á málþinginu.Er líf án þorsksins? var yfirskrift málþings um atvinnumál sem Samtök sveitarfélaga á Vesturlandi og Snæfellsbær stóðu fyrir í félagsheimilinu Klifi í Ólafsvík á föstudag. Tilefni fundarins var breytt staða í atvinnumálum á Vesturlandi, þá sérstaklega Snæfellsnesi, eftir skerðingu þorskkvótans við upphaf síðasta fiskveiðiárs. Síðustu fréttir um lélega árganga og nýliðun í stofninum benda til þess að samdrátturinn í þorskveiðum sé kominn til að vera, að minnsta kosti næstu árin. Snæfellsnes hefur verið sérstaklega háð þorskaflanum og sjávarútveginum, enda vægi sjávarútvegs hvorki meira né minna en 70% af verðmætasköpun atvinnulífsins á svæðinu. Frétt á vef Skessuhorns 21. apríl 2008.

Á sumardaginn fyrsta opnar Sigríður Erla Guðmundsdóttir myndlistarkona sýningu á verkum sínum. Sýningin er að efninu til að mestu unnin úr leir frá Fagradal á Skarðströnd en hugmyndirnar eru sóttar hingað og þangað. Þó má sjá  þráð sem liggur til Breiðafjarðar bæði til sjávar og lands. Má nefna portret af Breiðfirðingum þekktum sem óþekktum, forvitna fugla sem einu sinni  sátu á skerjum og vissu ekki annað. Tómataþroskarar og ávaxtaskálar sem spruttu upp úr hrúðurkörlum og júgrum. Beinahrúgu úr fínu frönsku postulíni og sterkleg bein úr Dölum.  

Viðburðarvika verður haldinn dagana 23. - 30. apríl nk. og af því tilefni verður sett upp listasmiðja fyrir börn sem eru í 1. - 7. bekk í grunnskóla. Hér má sjá auglýsingu með nánari upplýsingum.   

Þórunn Sveinbjarnardóttir, umhverfisráðherra fór um Snæfellsnesið í dag og hélt fundi með sveitarstjórnarfóki og fleirum.  Ráðherrann vildi m.a. kynna sér frá fyrstu hendi stöðu mála í Green Globe verkefninu.  Mörg önnur umhverfismálefni voru einnig rædd og nefna má t.d.; úrbætur í frárennslismálum, lög um verndun Breiðafjarðar, frumvörp um skipulags- og mannvirkjamál, friðlýsingar, Þjóðgarðinn, upptöku votlendis Breiðafjarðar á Ramsar skrá o.fl. o.fl.  Eftir heimsókn til Stykkishólms kom ráðherrann til Grundarfjarðar þar sem haldinn var fundur með bæjarráði Grundarfjarðarbæjar og bæjarstjóra.  Að loknum fundi með fulltrúum bæjarstjórnarinnar hélt ráðherrann í Fjölbrautaskóla Snæfellinga og síðan til Snæfellsbæjar. 

Fyrir um það bil ári tóku nemendur í 10. bekk grunnskóla á landinu öllu þátt í evrópskri rannsókn á áfengis - vímefna - og tóbaksnotkun (ESPAD). Um þessar mundir er unnið að fjölþjóðlegri skýrslu úr niðurstöðum rannsóknanna í þáttökulöndunum, sem væntanleg er á næstu misserum. Til að tryggja persónuvernd miðast niðurstöðurnar við hópa sem í eru að lágmarki 40 nemendur. Hér má sjá niðurstöður fyrir nemendur í sveitarfélögum á Snæfellsnesi. 

Grundarfjarðarbær óskar eftir að ráða starfsfólk í sundlaug Grundarfjarðar í sumar.  Starfsfólk sundlaugar annast þrif, móttöku og afgreiðslu gesta og öryggisgæslu.  Unnið er á vöktum og eru launakjör skv. kjarasamningi Launanefndar Sambands íslenskra sveitarfélaga.  Nánari upplýsingar og eyðublöð má nálgast á skrifstofu Grundarfjarðarbæjar, s. 430 8500 eða á heimasíðunni www.grundarfjordur.is.

Samtök sveitarfélaga á Vesturlandi og Snæfellsbær boða til fundar um atvinnumál í félagsheimilinu Klifi, Ólafsvík, föstudaginn 18. apríl 2008. Húsið opnar kl. 12.30. Hér má sjá dagskrá fundarins.