Fréttir & tilkynningar

Jæja þá er þessi frábæra helgi liðin sem við blakkonur vorum búnar að bíða svo spenntar eftir. Aldrei fyrir þessa helgi hefðum við trúað því að við myndum upplifa aðra eins stemningu og við upplifðum síðastliðið laugardagskvöld er við mættum Víkingi Ólafsvík í okkar eina heimaleik. Íþróttarhúsið var yfirfullt af fólki og hefðu alveg örugglega ekki fleiri komist inn þó þá hefði langað, þarna sat fólk með lúðra, trompet, trommur og ýmislegt fleira til að reyna að mynda sem mesta stemningu.   Lið UMFG í 1. sæti í 5. deild    

Framboðsfrestur vegna sveitarstjórnarkosninganna sem fram fara laugardaginn 27. maí n.k. rennur út kl. 12 á hádegi laugardaginn 6. maí n.k. Skila má framboðslistum til formanns kjörstjórnar, Þorvarðar M. Sigurðssonar, sími 860 4141. Kjörstjórn mun ennfremur taka á móti framboðslistum á bæjarskrifstofu Grundarfjarðar laugardaginn 6. maí n.k. milli kl. 11.00 og 12.00.  Formaður kjörstjórnar 

Þann 1. maí sl., á alþjóðlegum frídegi verkafólks, héldu Verkalýðsfélagið Stjarnan og Starfsmanna félag Dala- og Snæfellsnessýslu sína árlegu skemmtun að þessu sinni á veitingahúsinu Kaffi 59. Ræðumaður dagsins var formaður Verkalýðsfélags Stykkishólms. Idolstjarnan Alexander Aron söng nokkur lög og leikarinn Björgvin Frans Gíslason skemmti og söng. Að dagskrá lokinni var boðið upp á kaffiveitingar.   Alexander Aron   Sjá fleiri myndir í myndabanka síðunnar.

Í dag voru opnuð tilboð í verkið „Ný litla bryggja - stálþil“. Alls bárust þrjú tilboð í verkið. Kostnaðaráætlun hljóðar upp á 85.823.540 kr. Tilboðin sem bárust voru eftirfarandi: Hagtak hf., 94.489.600 kr. eða 110% af kostnaðaráætlun. Íslenska gámafélagið, 91.153.160 kr. eða 106% af kostnaðaráætlun. Berglín ehf., 83.769.900 kr. eða 97,6%.

Kosningarrétt í sveitarstjórnarkosningum á hver íslenskur ríkisborgari sem náð hefur 18 ára aldri þegar kosning fer fram og á lögheimili í sveitarfélaginu. Ennfremur eiga kosningarrétt danskir, finnskir, norskir og sænskir ríkisborgarar sem átt hafa lögheimili hér á landi í þrjú ár samfellt fyrir kjördag og aðrir erlendir ríkisborgarar sem átt hafa lögheimili hér á landi í fimm ár samfellt fyrir kjördag og hafa náð 18 ára aldri. Á kjörskrá skal taka þá sem uppfylla þessi skilyrði og skráðir voru með lögheimili í sveitarfélaginu samkvæmt íbúaskrá þjóðskrár þremur vikum fyrir kjördag. (úr lögum um kosningar til sveitarstjórna nr. 5/1998)  

Landnámsmennirnir þrír í Eyrarsveit hétu Herjólfur, Vestar og Kolur. Alls tóku 105 þátt þessa vikuna og voru 63 eða 60% með rétt svar. 

Nú fer í hönd árlegt hreinsunarátak í bænum. Bæjarbúar eru hvattir til þess að taka til á lóðum sínum, koma rusli fyrir í sorppokum og koma því út fyrir lóðamörk. Verkstjóri áhaldahússins verða á ferðinni um bæinn og hirðir upp rusl frá húseigendum sem sett hefur verið í poka útfyrir lóðamörk dagana 28. apríl – 2. maí.   Ef óskað er upplýsinga um hreinsunina má hafa samband við verkstjóra í s: 691-4343   Að gefnu tilefni er rétt að geta þess að moldarhaugar sem búið er að setja í og við Hönnugil verða sléttaðir út í næstu viku.   Stöndum saman og gerum bæinn okkar snyrtilegan fyrir sumarið!  

Gám fyrir gras og garðaúrganga hefur verið komið fyrir á gámastöðinni. Athugið að eingöngu má setja í hann garðaúrgang en ekki svarta ruslapoka eða annað þess háttar.   Mold í körum er nú einnig fáanleg. Bæjarbúum er bent á að hafa samband við verkstjóra áhaldahúss í s: 691-4343 um tilhögun við moldina. Moldin er afhend endurgjaldslaust á Gilóseyrum en íbúar verða sjálfir að sjá um flutning á körunum þaðan.    Verkstjóri  

Frábær stemning var í íþróttahúsinu í kvöld, fullt hús á báðum leikjum UMFG. Fólk mætti með lúðra og trommur og gengu margir hásir út í nóttina.   Karlarnir töpuðu sínum leik gegn Þrótti N en konurnar unnu glæsilegan sigur á Víkings konum.  

Laugardagskvöld kl 22:15 spila UMFG karlar við Þrótt N.Leikurinn er í Grundarfirði.