Fréttir & tilkynningar

Tillaga að tækjagrind með bráðabirgðahitun, ætlað til upplýsinga fyrir húsbyggjendur og verktaka í nýbyggingum, er nú hægt að skoða hér á síðunni. Hægt er nálgast skjalið með því að smella hér en einnig er það aðgengilegt undir hlekknum hitaveita hér á hægri væng síðunnar.

Fimmtudaginn 11. maí sl. var við hátíðlega athöfn í Fjölbrautaskóla Snæfellinga útskrifaður fyrsti nemendahópurinn í svokölluðum Landnemaskóla. Símenntunarmiðstöð Vesturlands hafði veg og vanda af náminu sem ætlað er fullorðnu fólki á vinnumarkaði sem ekki á íslensku að móðurmáli. Námið byggist á fjórum námsþáttum: íslensku, samfélagsfræði, tölvum og stjalfstyrkingu og samskiptum.   Fyrsti útskriftarhópur úr Landnemaskólanum      

Grundarfjarðarbær hefur keypt 200 stk af öspum sem á að gróðursetja víðsvegar í bænum. Föstudaginn 12. maí sl. voru fyrstu aspirnar settar niður við vestanverða Grundargötu, að hesthúsabyggð. Á næstu dögum verða gróðursettar aspir meðfram Grundargötu frá hafnargarði að fyrsta húsinu við austanverða Grundargötu. Einnig verða settar plöntur í Sæból, meðfram lóð Fjölbrautaskóla Snæfellinga og meðfram Torfabót. Fleiri plöntur verða settar á grunnskólalóð auk þess sem nokkrar verða settar niður á lóð áhaldahúss/bóksafns. Þórður Runólfsson skógfræðingur frá Lágafelli í Miklaholtshreppi sér um að planta öspunum. Áætlað er að verkinu ljúki fyrir vikulok.    

Mesta fjölgun kjósenda á Vesturlandi frá síðustu sveitarstjórnarkosningum er í Grundarfirði. Kjósendur á kjörskrá í Grundarfirði við sveitarstjórnarkosningarnar 27. maí nk. eru 631 en voru 581 við síðustu sveitarstjórnarkosningar. Fjölgunin nemur 50 manns eða 8,6%. Á landinu öllu eru kjósendur 5,5% fleiri en við kosningarnar 2002 og á Vesturlandi er fjölgunin 3%.  

69. fundur bæjarstjórnar Grundarfjarðar verður haldinn mánudaginn 15. maí 2006 kl. 17.00 í Fjölbrautaskóla Snæfellinga.  Fundurinn er öllum opinn. Dagskrá fundarins.   Bæjarstjóri

Innritun fyrir skólaárið 2006-2007 fer fram 12. – 26. maí 2006   Allir nemendur Tónlistarskólans og Grunnskólans hafa nú þegar fengið afhent umsóknareyðublöð en einnig má nálgast eyðublöðin í Hrannarbúðinni, Tónlistarskólanum og hjá ritara Grunnskólans.  

Á dögunum voru hér staddir nemendur frá alþjóðlegu umhverfisstofnuninni við Lundarháskóla í Svíþjóð, ásamt kennara.  Hópurinn var mjög alþjóðlegur, frá Ástralíu, Georgíu, Ghana og Kólumbíu, auk sænsks kennara.  Létu þau vel af dvöl sinni í Grundarfirði, en verkefni þeirra snerist um að meta stöðu og mögulegar lausnir varðandi umhverfismál helstu sjávarútvegsfyrirtækja í bæjarfélaginu.  Sérstök áhersla var lögð á frárennslismál og meðhöndlun lífræns úrgangs. Unnið hefur verið að verkefninu síðan í mars og var dvölin í Grundarfirði lokaáfangi verkefnisins.   Nemendur og forsvarsmenn Grundarfjarðarbæjar og fyrirtækjanna í verkefninu.  

Kjörskrá vegna sveitarstjórnarkosninganna sem fram fara 27. maí 2006 mun liggja frammi á bæjarskrifstofunni, almenningi til sýnis frá og með föstudeginum 12. maí 2006 til kjördags, á opnunartíma skrifstofunnar, mánudaga til fimmtudaga kl. 9.30-15.30 og föstudaga kl. 9.30-14.00. Ennfremur liggur ljósrit af kjörskrá frammi á bókasafninu á opnunartíma þess. Athugasemdum við kjörskrá má koma á framfæri í samræmi við lög um kosningar til sveitarstjórna nr. 5/1998. Sjá nánari auglýsingar á vef Grundarfjarðarbæjar www.grundarfjordur.is og á vef félagsmálaráðuneytis www.kosningar.is, en þar er m.a. að finna leiðbeiningar um kosningar og kosningarétt á tíu erlendum tungumálum.   Bæjarstjóri  

Hópur barna í Leikskólanum Sólvöllum voru að tína rusl á leikskólalóðinni í dag þegar ljósmyndara bar að garði.    

Veðurstofa Íslands hefur tekið saman upplýsingar um veður í Grundarfirði árið 2005. Í samantektinni kemur fram að meðalhiti í Grundarfirði var 4,9°C, hæsti hiti mældist 26. júlí, 18.7°C og lægsti hiti var -11,0°C hinn 23. janúar. Meðalvindur á árinu var 5,4 m/s sem var sá sami og í Stykkishólmi en logn mældist hér 2,9% en 1,1% í Stykkishólmi.